ចានក្នុងរាវរមែងប៉ះទង្គិចគ្នាជារឿងធម្មតាយ៉ាងណា ការរស់នៅ ការធ្វើការងាដោយពួក ដោយក្រុម ក្នុងចំណោមមនុស្សលែងអីនឹងមានប៉ះពារដោយពាក្យសម្តី លែងអីនឹងមានចំណុចខ្វះខាតក៏យ៉ាងនោះដែរ។ ដូច្នេះដើម្បីឱ្យការរស់នៅ និងជីវិតការងាររួមគ្នា មានសាមគ្គី មានភាពរឹងមាំបានសុខយូរអង្វែង បុគ្គលគួរដើរតាមគន្លងគុណធម៌៦ប្រការដូចខាងក្រោមនេះ ៖
១-ប្រកបដោយមេត្តាចិត្ត គឺការសម្តែងចរិយាសុភាពរាបសា គោរពរាប់អានគ្នាដូចជា សំពះ ចាប់ដៃគ្នា ប្រើទឹកមុខញញឹមរកគ្នា និងជួយហុចនេះ ហុចនោះ ឬរៀបចំទុកដាក់របស់របរជាដើមដោយក្តីពេញចិត្ត ។
២-ជួយចង្អុលបង្ហាញអ្វីដែលជាប្រយោជន៍ ដាស់តឿនក្រើនរំលឹកដោយបំណងល្អ ចរិតសុភាពរាបសា សម្តែងសេចក្តីគោរពរាប់អានគ្នា ប្រើពាក្យសម្ដីពីរោះពិសា សម្តែងទឹកមុខរីករាយរាក់ទាក់ទន់ភ្លន់រកគ្នា ។
៣-ផ្គងចិត្តតែក្នុងអំពើល្អ គិតអ្វីដែលជាប្រយោជន៍ដល់គ្នាទៅវិញទៅមក នឹកគិតរកគ្នាដោយសុទិដ្ឋិនិយម គិតក្នុងគោលបំណងរកវិធីសាស្ត្រល្អៗក្នុងនាមជាមនុស្សរស់នៅក្នុងអង្គភាព ក្នុងសង្គមរួមគ្នា ត្រូវចេះជួយគ្នា ។
៤-កាលបានវត្ថុអ្វីមួយមកដោយសុចរិត ទោះតិចក្តីក៏យកមកចែករំលែកឱ្យគ្នាបរិភោគតាមសមគួរគឺមិនហួងហែងទុកបរិភោគតែម្នាក់ឯងឡើយ ។
៥-ប្រព្រឹត្តតែអំពើសុចរិតត្រឹមត្រូវ គោរពច្បាប់ គោរពវិន័យស្មើគ្នាតាមនាទី គោរពសិទ្ធិសេរីភាពគ្នាទៅវិញទៅមក មានសីលធម៌ប្រចាំជីវិតជានិច្ច ។
៦-មានសុទិដ្ឋិដូចគ្នាដែលជាទិសដៅដ៏សំខាន់ មានឆន្ទៈនិងឧត្តមគតិឆ្ពោះទៅរកការរំលត់ទុក្ខ បានសុខយូរអង្វែង ជួយដោះស្រាយបញ្ហាគ្នា ជួយធ្វើកិច្ចការគ្នាគ្រប់កាលៈទេសៈ ។
គុណធម៌ទាំង៦ប្រការនេះនាំឱ្យបុគ្គលរស់នៅបានសុខជានឹងគ្នាយូរអង្វែងគឺសុខអ្វីស្មើនឹងការឯកភាពគ្នា មានឆន្ទៈរួមគ្នាពិតជាមិនមានឡើយ ។
ចែករំលែកព័តមាននេះ