ខេត្តព្រះសីហនុ ៖ សេចក្តីរាយការណ៍បឋមឱ្យដឹងថា ខ្មោចត្រីផ្សោតសមុទ្រមួយក្បាល ទម្ងន់ប្រមាណជាង១០០គីឡូក្រាម ត្រូវបានគេប្រទះឃើញអណ្តែតមកទើរនៅឆ្នេរមួយកន្លែង ស្ថិតក្នុងសង្កាត់កោះរ៉ុងសន្លឹម បង្កការភ្ញាក់ផ្អើលកាលពីព្រឹកថ្ងៃទី១៥ សីហា នេះ។
បើតាមពលរដ្ឋដែលប្រទះឃើញឱ្យដឹងថា ខ្មោចត្រីផ្សោតសមុទ្រមួយក្បាលនេះ ទំនងជាងាប់ច្រើនថ្ងៃមកហើយ ទំរាំអណ្តែតមកដល់ឆ្នេរកោះរ៉ុងសន្លឹមនេះ ។ បើតាមមន្ត្រីដែលពិនិត្យលើខ្មោចត្រីផ្សោតសមុទ្រនេះ បានធ្វើការសន្និដ្ឋានបឋមថា អាចងាប់ដោយសារវាបានសុីចំណី ជាកាកសំណល់ខ្ចប់ក្នុងស្បោងប្លាស្ទិក ដែលអ្នកដំណើរតាមនាវាបោះចោល ហើយស៊ីច្រើនលើសកំណត់ទៀត ទើបបណ្តាលឱ្យងាប់បែបនេះ ។ ប្រភពបន្តថា បើតាមការពិនិត្យក្នុងមាត់ត្រីផ្សោតសមុទ្រនេះ រកឃើញសុទ្ធតែកញ្ចប់ចំណីជាកាកសំណល់ច្រកស្បោងប្លាស្លិក ។
ក្រោយពិនិត្យរួច ខ្មោចត្រីផ្សោតនេះរួច ត្រូវបានមន្ត្រីជំនាញបានជីកដីកប់ ដើម្បីកុំឱ្យធំក្លិនស្អុយទៅដល់ភ្ញៀវទេសចរ ដែលមកលេងកម្សាន្តតំបន់ឆ្នេរខាងលើ ។
បើសិនជាដូចតាមការពិនិត្យរបស់មន្ត្រីមែន សូមបងប្អូនអ្នកធ្វើដំណើរតាមផ្លូវសមុទ្រ ត្រូវរួមគ្នាលុបបំបាត់កាកសំណល់ផ្សេងៗ ដែលបោះចោលក្នុងសមុទ្រ ដើម្បីការពារបរិស្ថាន និងការពារជីវិតសត្វសមុទ្រផងដែរ។
ចែករំលែកព័តមាននេះ