រាជធានីភ្នំពេញ ៖ កាលពីព្រឹកថ្ងៃទី១៤ សីហា គណៈកម្មការផ្សារអូឫស្សី បានសហការជាមួយមន្ត្រីកាំកុងត្រូលផែស្ងួតចុងទីភ្នំពេញ បានចុះសហការពិនិត្យគុណភាពចំណីអាហារឱ្យកាន់តែមានជំនឿទុកចិត្តពីប្រជាពលរដ្ឋ ។
លោក ឡេង គឹមស្រុង ប្រធានគណៈកម្មការផ្សារអូរឫស្សីបានឱ្យដឹងថា ដើម្បីឱ្យមានជំនឿទុកចិត្តចំពោះប្រជាពលរដ្ឋប្រើប្រាស់នូវចំណីអាហារ គណៈកម្មការផ្សារអូរឫស្សី បានសហការជាមួយមន្ត្រីពាណិជ្ជកម្មរាជធានីភ្នំពេញ មន្ត្រីកាំកុងត្រូលផែស្ងួតចុងទីភ្នំពេញ ធ្វើការណែនាំដល់អាជីវករឱ្យយល់ដឹងអំពីសុវត្ថិភាពចំណីអាហារ និង បានធ្វើតេស្តបឋមរកសារធាតុគីមីហាមឃាត់ទៅលើទំនិញ ដូចជា ផ្អក ប្រហុក ម៉ាំ ផ្អកពងត្រី ប្រហុកសាច់ សាច់ក្រក និង បន្លែគ្រប់មុខទៀត ។
ជាលទ្ឋផលពុំឃើញមានសារធាតុគីមីហាមឃាត់នោះទេ ក្រោយពីការត្រួតពិនិត្យ មន្ត្រីជំនាញបានយកគំរូបន្លែជាច្រើនមុខ ប្រហុក ផ្អក និងគ្រឿងហូបចុកមួយចំនួនបញ្ជូនទៅមន្ទីរពិសោធន៍នៃ អគ្គនាយកដ្ឋានកាំកុងត្រូល ដើម្បីរកសារធាតុគីមីហាមឃាត់ផ្សេងៗទៀតផងដែរ ៕
ចែករំលែកព័តមាននេះ