ខ្លាំងដៃម្ល៉េះ…ដកកាំភ្លើងភ្ជង់សមត្ថកិច្ច (មានវីដេអូ)
- ភ្នំពេញ
រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា នៅខណៈនេះកម្លាំងសមត្ថកិច្ចខណ្ឌឬស្សីកែវគឺបាននាំខ្លួនជនសង្ស័យ២នាក់ដែលបានដកកាំភ្លើងភ្ជង់រថយន្តស្ទូចរបស់សមត្ថកិច្ចដើម្បីឱ្យយករថយន្តបង្កគ្រោះថ្នាក់ចរាចរណ៍ទៅផ្ទះរបស់ខ្លួន រួមជាមួយការដកហូតរថយន្តបង្កដែលមានការសម្របសម្រួលពីព្រះរាជអាជ្ញាអមសាលាដំបូងរាជធានីភ្នំពេញលោក សៀង សុខ ។ ហេតុការណ៍បង្កឱ្យមានការភ្ញាក់ផ្អើលនេះបានកើតឡើងនៅវេលាម៉ោង៩ព្រឹកថ្ងៃទី១៥ ខែសីហា…
សេចក្តីរាយការណ៍បន្តថា នៅមុនពេលដែលសមត្ថកិច្ចចុះប្រតិបត្តិការណ៍ឃាត់ខ្លួនជនសង្ស័យទាំង២នាក់ខាងលើនេះ គឺជនសង្ស័យទាំង២បានដកកាំភ្លើងភ្ជង់រថយន្តស្ទូចរបស់សមត្ថកិច្ចដែលបានស្ទូចរថយន្តរបស់ខ្លួន ដែលបង្កគ្រោះថ្នាក់ចរាចរណ៍បុកបង្គោលភ្លើងដើម្បីឱ្យសមត្ថកិច្ចយករថយន្តរបស់ខ្លួននោះទៅកាន់ផ្ទះរបស់ជនសង្ស័យវិញ ។
សូមបញ្ជាក់ផងដែរថា កាលពីវេលាម៉ោង២និង១៥នាទីនៅចំណុចមុខក្លោងទ្វារចូលវិទ្យាល័យ ឬស្សីកែវ គឺមានរថយន្តមួយគ្រឿងម៉ាក Lexus 570 ពណ៌ស ពាក់ផ្លាកលេខ រដ្ឋ០៧ ២-៨៩៨៩ បើកបរដោយឈ្មោះ ទ្រី ដារិន (ជាជនដៃដល់) ភេទប្រុស អាយុ៣៨ឆ្នាំ បុខរបរអ្នកលក់សាច់ជ្រូក ដែលត្រូវបានគេស្គាល់ថា ជាកូនថៅកែកុងស៊ីកាប់ជ្រូកនៅគីឡូម៉ែត្រលេខ៦ ស្នាក់នៅភូមិខ១ សង្កាត់ច្រាំងចំរេះទី២ ខណ្ឌឬស្សីកែវ និងបក្សពួកម្នាក់ទៀតឈ្មោះ ស្រ៊ុន ពិសិដ្ឋ ភេទប្រុស អាយុ៣២ឆ្នាំ ។
ជនសង្ស័យខាងលើបានបើកបុកបង្គោលភ្លើង ហើយខណៈនោះសមត្ថកិច្ចក៏បានស្ទូចរថយន្តខាងលើនាំមកដល់វត្តទួលអស់លោក ក៏ស្រាប់តែមានរថយន្តមួយគ្រឿងទៀតម៉ាក Corolla ដែលជាបក្សពួកបានបើកមកកាក់រថយន្តស្ទូចរបស់សមត្ថកិច្ចហើយបានដកកាំភ្លើងភ្ជង់ដើម្បីឱ្យសមត្ថកិច្ចនាំរថយន្តបង្កខាងលើទៅផ្ទះរបស់ខ្លួនដែលស្ថិតនៅចំណុចខាងលើ ។
ភ្លាមៗនោះសមត្ថកិច្ចបានទាក់ទងទៅកាន់កងកម្លាំងសមត្ថកិច្ចខណ្ឌដើម្បីចុះមកជួយអន្តរាគមន៍ និងបានឃាត់ខ្លួនជនសង្ស័យទាំង២នាក់ និងបានរកឃើញកាំភ្លើងដែលជនសង្ស័យភ្ជង់សមត្ថកិច្ចនៅក្នុងបន្ទប់ទឹក រួមជាមួយនឹងរថយន្តបង្កយកទៅកាន់ការិយាល័យចរាចរណ៌ដើម្បីចាត់ការតាមនីតិវិធី ៕
ចែករំលែកព័តមាននេះ