លោកលឹម គានហោ ពិនិត្យស្ថានភាពទឹក និងការងារបង្កើតផលរបស់ប្រជាកសិករបន្ថែម
- ពោធិ៍សាត់
ខេត្តពោធិ៍សាត់ ៖ លោក លឹម គានហោរដ្ឋមន្ត្រីក្រសួងធនធានទឹក និងឧតុនិយម និងក្រុមការងារ កាលពីរសៀលថ្ងៃទី១៤ ខែសីហា ឆ្នាំ២០១៨…
ខេត្តពោធិ៍សាត់ ៖ លោក លឹម គានហោរដ្ឋមន្ត្រីក្រសួងធនធានទឹក និងឧតុនិយម និងក្រុមការងារ កាលពីរសៀលថ្ងៃទី១៤ ខែសីហា ឆ្នាំ២០១៨…
ខេត្តពោធិ៍សាត់ ៖ លោក លឹម គានហោរដ្ឋមន្ត្រីក្រសួងធនធានទឹក និងឧតុនិយម និងក្រុមការងារ កាលពីរសៀលថ្ងៃទី១៤ ខែសីហា ឆ្នាំ២០១៨ បានចុះពិនិត្យស្ថានភាពទឹក និងការងារបង្កបង្កើនផលរបស់បងប្អូនប្រជាកសិករព្រមទាំងការដ្ឋានសាងសង់ប្រព័ន្ធធារាសាស្ត្រមួយចំនួននៅក្នុងខេត្តពោធិ៍សាត់ ។
ក្នុងពេលចុះពិនិត្យការសាងសង់គម្រោងអភិវឌ្ឍន៍ស្ទឹងពោធិ៍សាត់ទំនប់លេខ៣ ទំនប់លេខ៥ ជំហានទី២ និងប្រព័ន្ធធារាសាស្ត្រដំណាក់អំពិល-វត្តលួង លោករដ្ឋមន្ត្រីបានទទួលយកនូវសំណូមពររបស់បងប្អូនប្រជាពលរដ្ឋដែលមានបញ្ហាប្រឈមមួយចំនួន គឺការខ្វះខាតទឹកសម្រាប់ស្រោចស្រពនៅក្នុងក្រុងពោធិ៍សាត់ ។ ការខ្វះខាតទឹកនេះមូលហេតុ គឺដោយសារគម្រោងកំពុងតែដំណើរការសាងសង់ ដូចនេះទើបមានការរអាក់រអួលក្នុងការបញ្ជូនទឹកទៅកាន់ស្រែរបស់បងប្អូនប្រជាពលរដ្ឋ ។
ដើម្បីដោះស្រាយបញ្ហានេះលោករដ្ឋមន្ត្រីបានឧបត្ថម្ភនូវម៉ាស៊ីនបូមទឹកខ្នាតតូចចំនួន០៦គ្រឿង សម្រាប់បូមទឹកពីប្រឡាយមេបញ្ចូលទៅប្រឡាយរង ដើម្បីស្រោចស្រពស្រែរបស់ប្រជាពលរដ្ឋ ។ គម្រោងអភិវឌ្ឍន៍ស្ទឹងពោធិ៍សាត់ ទំនប់លេខ៣ និងលេខ៥ ជំហានទី២ មានលទ្ធភាពផ្គត់ផ្គង់ទឹកស្រោចស្រពសម្រាប់បង្កើនផលិតផលកសិកម្មបានទំហំប្រមាណ១៩.៧០០ហិកតា នៅរដូវវស្សា និង១០.៥០០ ហិកតានៅរដូវប្រាំង ហើយក៏រួមចំណែកផងដែរ ក្នុងការផ្គត់ផ្គង់ទឹកស្អាត និងកាត់បន្ថយទឹកជំនន់តាមតំបន់មួយចំនួននៅផ្នែកខាងក្រោម ។
ជារួមការអភិវឌ្ឍស្ទឹងពោធិ៍សាត់ ទំនប់លេខ៣ និងលេខ៥ ជំហានទី២នេះ នឹងធ្វើឲ្យរាជរដ្ឋាភិបាលសម្រេចបាននូវប្រព័ន្ធធារាសាស្ត្រពេញលេញមួយ ដែលអាចឲ្យប្រជាពលរដ្ឋនៅស្រុកភ្នំក្រវាញ និងស្រុកបាកាន អាចដោះស្រាយបញ្ហាទឹកបានមួយកម្រិតធំ ដែលពីមុនយើងពឹងផ្អែកភាគច្រើនទៅលើប្រភពទឹកភ្លៀងនៅរដូវវស្សា ។
បន្ទាប់មកលោករដ្ឋមន្ត្រី និងក្រុមការងារបានបន្តដំណើរចុះពិនិត្យការដ្ឋានសាងសង់ប្រព័ន្ធធារាសាស្ត្រដំណាក់ឈើក្រំ ដែលប្រព័ន្ធធារាសាស្ត្រដំណាក់ឈើក្រំនេះត្រូវបានបែងចែកជា០៣កញ្ចប់ រួមមាន ៖ កញ្ចប់ទី១- សាងសង់សំណង់មេ កាត់ស្ទឹងពោធិ៍សាត់ចំនួន០១កន្លែង ត្រង់ចំណុចភូមិដំណាក់ឈើក្រំ ឃុំសំរោង ស្រុកភ្នំក្រវាញ ។ កញ្ចប់ទី ២ – ជីកប្រឡាយមេ០១ខ្សែ ប្រវែង១៦.០០០ម៉ែត្រ និងសាងសង់សំណង់សិល្បការសរុប២៨កន្លែង ។ កញ្ចប់ទី៣- ជីកប្រឡាយរង០៤ខ្សែប្រវែង៦៨.៩៨១ម៉ែត្រ និងសាងសង់សំណង់សិល្បការសរុប២១៥ កន្លែង ។
នៅក្នុងការសាងសង់ជំហានដំបូងក្រសួងបានចាប់អនុវត្តនូវកញ្ចប់ទី២ គឺការជីកប្រឡាយមេ០១ខ្សែ ប្រវែង១៦គីឡូម៉ែត្រលាតសន្ធឹងលើឃុំផ្ទះរុង ឃុំសំរោង ឃុំបាក់ចិញ្ចៀន ស្រុកភ្នំក្រវាញ និងឃុំតាលោ ឃុំខ្នារទទឹង ស្រុកបាកាន ។ ប្រឡាយមេ០១ខ្សែនេះនឹងមានបំពាក់នូវសំណង់សិល្បការតូច- ធំ សរុបចំនួន២៨កន្លែង ។
នៅក្នុងការពិនិត្យនោះដែរ លោករដ្ឋមន្ត្រីក៏បានណែនាំដល់ក្រុមហ៊ុនចិនដែលកំពុងសាងសង់គម្រោងអភិវឌ្ឍន៍ស្ទឹងពោធិ៍សាត់ ជំហានទី២ ក៏ដូចជាក្រុមហ៊ុនជប៉ុនដែលកំពុងសាងសង់ប្រព័ន្ធធារាសាស្ត្រដំណាក់អំពិល-វត្តលួង និងក្រុមហ៊ុនដែលកំពុងសាងសង់ប្រព័ន្ធធារាសាស្ត្រដំណាក់ឈើក្រំ ត្រូវសាងសង់ឲ្យបានត្រឹមត្រូវតាមបទដ្ឋានបច្ចេកទេស ដើម្បីធានាគុណភាព និងសោភ័ណភាពបានយូរអង្វែង ៕
ចែករំលែកព័តមាននេះ