ខេត្តកំពត ៖ អ្នកពាក់ព័ន្ធប្រើប្រាស់គ្រឿងញៀនចំនួន៩នាក់ត្រូវបានកម្លាំងកងរាជអាវុធហត្ថខេត្តកំពតចុះទៅបង្ក្រាបបានទាំងសម្បុក ខណៈពួកគេបានចែកចាយ និងប្រើប្រាស់គ្រឿងញៀននៅក្នុងភូមិសាស្ត្រ ឃុំឫស្សី ស្រុកខាងលិច ។ ប្រតិបតិ្តការបង្ក្រាបបទល្មើសគ្រឿងញៀនខាងលើបានប្រព្រឹត្តឡើងកាលពីវេលាម៉ោង១០និង៤៥នាទីព្រឹកថ្ងៃទី១៣ ខែសីហា ឆ្នាំ២០១៨ ស្ថិតចំណុចភូមិត្រពាំងនៀល ឃុំឫស្សីស្រុកខាងលិច ស្រុកកំពង់ត្រាច ខេត្តកំពត ។
លោកវរសេនីយ៍ទោ ហែម ចាន់ដារ៉ា មេបញ្ជាការរងកងរាជអាវុធហត្ថខេត្ត និងជាប្រធានមន្ទីរយុត្តធម៌កងរាជអាវុធហត្ថខេត្តកំពតបានឲ្យដឹងថា ការបង្ក្រាបបទល្មើសគ្រឿងញៀនខាងលើនេះដោយមានការសម្របសម្រួលនីតិវិធីពីលោក ម៉ុត ដារ៉ា ព្រះរាជអាជ្ញារងអមសាលាដំបូងខេត្តកំពតទើបករណីបង្ក្រាបនេះទទួលបានជោគជ័យ ។
ជាមួយនឹងការឃាត់ខ្លួនសមត្ថកិច្ចកងរាជអាវុធហត្ថខេត្តបានដកហូតវត្ថុតាងដូចជាគ្រឿងញៀនដែលនៅសេសសល់ពីការចែកចាយ និងប្រើប្រាស់ចំនួនពីរកញ្ចប់ទម្ងន់០,៤០ក្រាម, ទូរស័ព្ទដៃ១គ្រឿង, ម៉ូតូ១គ្រឿង និងឧបករណ៍ជក់មួយសម្រាប់ផងដែរ ។ បច្ចុប្បន្នជនសង្ស័យរួមនឹងវត្ថុតាងត្រូវបានសមត្ថកិច្ចកងរាជអាវុធហត្ថខេត្ត កំពុងកសាងសំណុំរឿងអនុវត្តតាមនីតិវិធី ៕
ចែករំលែកព័តមាននេះ