រាជធានីភ្នំពេញ៖ជាងជួសជុលគ្រឿងចក្រម្នាក់បានយកប្រាក់ និងទទួលធ្វើរ៉ូឡូកិនដីមួយគ្រឿងអស់រយៈពេលជាច្រើនខែមកហើយនៅតែមិនឆេះ និងដោះគ្រឿងចក្រអស់ ហើយត្រូវម្ចាស់គ្រឿងចក្រប្តឹងទាប្រាក់វិញ និងសំណង៤ពាន់ដុល្លារ ស្រាប់តែហៅបក្សពួកមកកាង និងមានទំនាស់គ្នាបែកផ្សែង ។ ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង១២ថ្ងៃត្រង់ ថ្ងៃទី១៤ ខែសីហា ឆ្នាំ២០១៨ នៅយានដ្ឋានជួសជុលគ្រឿងចក្រគ្មានយីហោមួយកន្លែង នៅក្នុងភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ ។
ជាងគ្រឿងចក្រដែលត្រូវបានគេប្តឹងឈ្មោះ ភា ភេទប្រុស អាយុ៤៨ឆ្នាំ មុខរបរជាងជួសជុលគ្រឿងចក្រ មានទីលំនៅភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ ។ ចំណែកដើមបណ្តឹងឈ្មោះ លី សុធី ភេទប្រុស អាយុ៣៦ឆ្នាំ ជាប្រធានក្រុមហ៊ុនសំណង់ ឈុន យាង រស់នៅភូមិពោចិន្តា ឃុំស្វាយអន្ទរ ស្រុកស្វាយអន្ទរ ខេត្តព្រៃវែង ។
តាមដើមបណ្តឹងបានឲ្យដឹងថា កាលពីថ្ងៃទី១០ ខែមីនា ឆ្នាំ២០១៨ កន្លងមកគាត់បានអោយឈ្មោះ ភា ម្ចាស់យានដ្ឋានទៅជួសជុលរ៉ូឡូកិនដីមួយគ្រឿងដែលខូចចតនៅឯស្រុកស្វាយអន្ទរ ។ បន្ទាប់ពីមេជាងទៅមើល និងធានាជួសជួលបាន និងសុំលុយមុនដើម្បីទិញគ្រឿងបន្លាស់លើកទី១ចំនួន៤០០ដុល្លារ និងលើកទី២ចំនួន២៥០ដុល្លារទៀត សរុបទាំងអស់៦៥០ដុល្លារ តែរហូតមកដល់ថ្ងៃនេះជាងនោះធ្វើមិនកើត និងថែមទាំងដោះគ្រឿងចក្រទុកចោល និងគេចមិនទទួលខុសត្រូវទៀត ។
ម្ចាស់គ្រឿងចក្របានបន្តទៀតថា ដោយសារតែគ្មានការទទួលខុសត្រូវគាត់ក៏បានប្តឹងនគរបាលមូលដ្ឋានអោយជួយអន្តរាគមន៍ និងចុះទៅសាកសួរដល់យានដ្ឋានដើម្បីទាមទារប្រាក់នោះមកវិញ និងទាមទារប្រាក់សំណង់គ្រឿងចក្រចំនួន៤ពាន់ដុល្លារ ។
តាមព័ត៌មានអោយដឹងទៀតថា នៅពេលដែលនគរបាលទៅដល់ម្ចាស់គ្រឿងចក្រក៏បានហៅខ្នងមកកាង និងចោទសមត្ថកិច្ច និងម្ចាស់មកអ៊ុកឡុកផ្ទះទៅវិញ ហើយបង្កអោយទៅជាទំនាស់បែកផ្សែង ។ បន្ទាប់ពីមានបាតុភាពនគរបាលក៍បានដកថយវិញរងចាំហៅភាគីទាំង២ទៅសម្របសម្រួលគ្នានៅប៉ុស្តិ៍ បើមិនត្រូវរ៉ូវគ្នានគរបាលនឹងកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ