រាជធានីភ្នំពេញ ៖ រថយន្តលុចស៊ីស៥៧០ បើកបរដោយបុរសម្នាក់សង្ស័យស្រវឹងស្រា បើកលឿនមិនបានប្រយ័ត្នក៏រេចង្កូតជ្រុលទៅបុកឃឿននឹងបង្គោលភ្លើងបាក់អស់មួយដើម ដែលហេតុការណ៍នេះបានកើតឡើងកាលពីវេលាម៉ោង៣និង១៥នាទីទាបភ្លឺ ថ្ងៃទី១៥ ខែសីហា ឆ្នាំ២០១៨ តាមបណ្តោយផ្លូវជាតិលេខ៥ នៅចំណុចវិទ្យាល័យឬស្សីកែវ ស្ថិតនៅក្នុងសង្កាត់ឬស្សីកែវ ខណ្ឌឬស្សីកែវ ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុគេបានឃើញបុរសម្នាក់បើករថយន្តបង្កមួយគ្រឿងម៉ាកលុចស៊ីស 570 ពណ៌ស ពាក់ស្លាកលេខរដ្ឋ07 2-8989 បើកបរតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង ខណៈពេលបើកមកដល់ចំណុចកើតហេតុខាងលើក៏ស្រាប់ តែរថយន្តបង្កបានរេចង្កូតទៅបុកបង្គោលភ្លើង បណ្តាលឲ្យបាក់ទ្រេតអស់មួយដើម ភ្លាមៗនោះដែលរថយន្តបង្កព្យាយាមបើករត់បានប្រមាណជា១០០ ម៉ែត្រ ត្រូវសមត្ថកិច្ចឃាត់ជាប់ ។
បើតាមសម្តីរបស់អ្នកបើករថយន្តបង្កបានឲ្យដឹងថា គាត់អត់បានបុកនោះទេ គឺមានរថយន្តក្រុងមួយគ្រឿងបើកបុកទើបរលំទៅប៉ះបុកចំរថយន្តគាត់ បណ្តាលឲ្យរងការខូចខាតបែបនេះ ។
ក្រោយពេលកើតហេតុរថយន្តបង្ករួមនឹងតៃកុងរថយន្តត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោករង់ចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ