រាជធានីភ្នំពេញ ៖ ទីបំផុត លទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រនីតិកាលទី៦ បានចេញជាផ្លូវការហើយ គឺគណបក្សប្រជាជនកម្ពុជាទទួលបានអាសនៈទាំង១២៥នៅក្នុងរដ្ឋសភា ។ នេះបើតាមមន្ត្រីជាន់ខ្ពស់ គ.ជ.ប ប្រាប់ឲ្យដឹង…
រាជធានីភ្នំពេញ ៖ ទីបំផុត លទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រនីតិកាលទី៦ បានចេញជាផ្លូវការហើយ គឺគណបក្សប្រជាជនកម្ពុជាទទួលបានអាសនៈទាំង១២៥នៅក្នុងរដ្ឋសភា ។ នេះបើតាមមន្ត្រីជាន់ខ្ពស់ គ.ជ.ប ប្រាប់ឲ្យដឹង ទោះបីជាក្រៅផ្លូវការក្ដី ។
លោក សោម សូរីដា អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យកោះសន្តិភាពដឹងតាមទូរស័ព្ទនារសៀលថ្ងៃទី១៤ ខែសីហាថា តាមការសម្រេចរបស់ គ.ជ.ប នឹងប្រកាសលទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រនីតិកាលទី៦នៅម៉ោង៧យប់ ថ្ងៃទី១៥ ខែសីហា ។
លោកអគ្គលេខាធិការរង គ.ជ.ប បញ្ជាក់ថា ការប្រកាសលទ្ធផលផ្លូវការ គ.ជ.ប នឹងប្រកាសលទ្ធផលចំនួន៣ក្នុងពេលតែមួយជាមួយគ្នាតែម្តង ក្នុងនោះ ៖ ទី១-លទ្ធផលនៃការទទួលបានសំឡេងឆ្នោតរបស់គណបក្សនយោបាយនីមួយៗ ទី២-ចំនួនអាសនៈរបស់គណបក្សនីមួយៗទទួលបាន និងទី៣-ប្រកាសពីបេក្ខជនជាប់ឆ្នោតជ្រើសតាំងតំណាងរាស្ត្រ ។ជាមួយគ្នានេះ លោក សោម សូរីដា ក៏បានឲ្យដឹងថា សម្រាប់នីតិកាលទី៦នៃរដ្ឋសភា នេះ មានតែគណបក្សប្រជាជនកម្ពុជាមួយប៉ុណ្ណោះទទួលបានអាសនៈឬកៅអី ចំណែកគណ បក្សនយោបាយចំនួន១៩ទៀតមិនបានទទួលអាសនៈនៅក្នុងសភានោះទេ ។
លោកអគ្គលេខាធិការរង គ.ជ.ប គូសបញ្ជាក់ថា ៖ «តាមអ្វីដែល គ.ជ.ប សម្រេចពីព្រឹកមិញនេះ មានតែគណបក្សប្រជាជនកម្ពុជាទេទទួលបានអាសនៈ១២៥ នៅក្នុងរដ្ឋសភា» ។ចំពោះអាសនៈនៅក្នុងរដ្ឋសភានេះដែរ ត្រូវបានលោក សោម សូរីដា ថ្លែងថា ប្រសិនបើគណបក្សប្រជាជនកម្ពុជាចង់បែងចែកទៅគណ
បក្សនយោបាយផ្សេងមិនអាចធ្វើបានទេ ។ លោកគូសបញ្ជាក់ថា៖«ករណីនេះមិនអាចធ្វើបានទេ
ចំពោះការបែងចែកអាសនៈទៅឲ្យបក្សដទៃ តែអាចធ្វើទៅបាន ក្នុងករណីគណបក្សប្រជាជន កម្ពុជាខ្វះបេក្ខជនដែលទទួលយកអាសនៈនៅក្នុងរដ្ឋសភា តែចំណុចនេះមិនអាចខ្វះទេ» ។
លោក សោម សូរីដា បានលើកឡើងថា នៅក្នុងច្បាប់ស្តីពីការជ្រើសតាំងតំណាងរាស្ត្របានចែងថា គណបក្សនយោបាយណាមួយទទួលបានអាសនៈត្រូវតែទទួលយកអាសនៈ គាត់គ្មានសិទ្ធិរំលែកអាសនៈដែលកើតចេញពីឆន្ទៈរាស្ត្រឲ្យគណបក្សណាផ្សេងទេ ។ លុះត្រាតែមានករណីខ្លះនៅត្រង់ចំណុច«ឃ»ឬ«ង»នៃមាត្រា១៣៥នៃច្បាប់ស្តីពីការជ្រើសតាំងតំណាងរាស្ត្រ ឬស្ថិតនៅក្នុងមាត្រា៣៨ ឬមាត្រា៣៨ផ្ទួននៃច្បាប់ស្តីពីការជ្រើសតាំងតំណាងរាស្ត្រ ឬច្បាប់ស្តីពីការធ្វើវិសោធនកម្មនៃច្បាប់ស្តីពីជ្រើសតាំងតំណាងរាស្ត្រ ។
ទោះជាយ៉ាងណាក្តី លោកអគ្គលេខាធិការរងគ.ជ.ប បានឲ្យដឹងថាគណបក្សនយោបាយអាចចែកបានលុះត្រាតែខ្វះបេក្ខជនក្នុងការបំពេញបន្ថែមដើម្បីទទួលបានអាសនៈ ហើយគាត់មិនអាចបំពេញបន្ថែមទើបចែកឲ្យបក្សផ្សេងបាន ។លោកថ្លែងថា គ.ជ.ប អាចធ្វើការបែងចែកអាសនៈបាន លុះត្រាតែគណបក្សនយោបាយណាដែលមិនប្រកាសទទួលយកអាសនៈ ឬមិនចូលប្រជុំសភាដើម្បីប្រកាសសុពលភាព តាម
ការកោះអញ្ជើញរបស់ព្រះមហាក្សត្រនៅសម័យប្រជុំលើកដំបូង ឬចូលស្បថចូលកាន់តំណែង ។
លោក សោម សូរីដា ក៏បានបង្ហាញពីមូលហេតុដែល គ.ជ.ប ប្រកាសលទ្ធផលផ្លូវការនៅម៉ោង៧យប់ថ្ងៃទី១៥ ខែសីហាថា ដោយសារតែ គ.ជ.ប រង់ចាំការដោះស្រាយបណ្តឹងរបស់ក្រុមប្រឹក្សាធម្មនុញ្ញ ពាក់ព័ន្ធនឹងយុទ្ធនាការម្រាមដៃស្អាតរួចសិន ។ ប៉ុន្តែលោកបានអះអាងថាទោះបីជាក្រុមប្រឹក្សាធម្មនុញ្ញមិនទាន់ដោះស្រាយចប់ក៏ គ.ជ.ប ប្រកាសលទ្ធផលផ្លូវការនៅថ្ងៃទី១៥ ខែសីហាដែរ ។
សូមជម្រាបថា ការបោះឆ្នោតជ្រើសតាំងតំណាងរាស្ត្រនីតិកាលទី៦ មានគណបក្សនយោបាយចំនួន២០ចូលរួមប្រកួតប្រជែង ។ ការបោះឆ្នោតមានអ្នកសង្កេតការណ៍អន្ដរជាតិចំនួន២២០នាក់ តំណាងឲ្យអង្គការ ស្ថាប័ន និងតំណាងប្រទេសចំនួន៥២នៃទ្វីបទាំង៥នៅលើពិភពលោកចូលរួមសង្កេតការណ៍ ។គណៈកម្មាធិការជាតិរៀបចំការបោះឆ្នោត (គ.ជ.ប) ក៏បានអនុញ្ញាតឲ្យអ្នកសង្កេតការណ៍ជាតិនៃសមាគម អង្គការមិនមែនរដ្ឋាភិបាលជាង៨០.០០០នាក់ មកពី១០៧ស្ថាប័នចូលរួមសង្កេតការណ៍ដែរ ៕
ចែករំលែកព័តមាននេះ