រាជធានីភ្នំពេញ ៖ ក្នុងកិច្ចប្រជុំបញ្ជាការឯកភាពរដ្ឋបាលរាជធានីភ្នំពេញ នៅល្ងាចថ្ងៃទី១៤ ខែសីហានេះ លោក ឃួង ស្រេង អភិបាលរាជធានីភ្នំពេញ បានថ្លែងកោតសរសើរ…
រាជធានីភ្នំពេញ ៖ ក្នុងកិច្ចប្រជុំបញ្ជាការឯកភាពរដ្ឋបាលរាជធានីភ្នំពេញ នៅល្ងាចថ្ងៃទី១៤ ខែសីហានេះ លោក ឃួង ស្រេង អភិបាលរាជធានីភ្នំពេញ បានថ្លែងកោតសរសើរ ដល់កងកម្លាំងទាំងអស់ដែលបាន រក្សាការពារសន្តិសុខសណ្ដាប់ ធ្នាប់សុវត្ថិភាពក្នុងដំណើរការនៃយុទ្ធនាការឃោសនារកសំឡេងឆ្នោត ថ្ងៃបោះឆ្នោត និងក្រោយការបោះឆ្នោត ជូនប្រជាពលរដ្ឋក្នុងរាជធានីភ្នំពេញបានល្អប្រសើរ។ លោក ម៉េត មាសភ័ក្ដី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងក្រោយកិច្ចប្រជុំថា ក្នុងកិច្ចប្រជុំនោះ អភិបាលរាជធានីភ្នំពេញ បានបញ្ជាក់ថា សន្តិសុខ គឺជាសេចក្តីត្រូវការរួមរបស់ប្រជាពលរដ្ឋគ្រប់រូប ដែលមិនអាចខ្វះបាន អ្នកណាក៏ត្រូវការសន្តិសុខដែរ។
លោកបន្តថា ក្នុងអំឡុងយុទ្ធនាការ ឃោសនា រកសំឡេងឆ្នោត ជ្រើសរើសតំណាងរាស្ត្រនីតិកាលទី៦ ឆ្នាំ២០១៨ បានប្រព្រឹត្តទៅដោយរលូន ពុំមានបញ្ហាអ្វីកើតឡើងគួរឱ្យកត់សម្គាល់នោះទេ និងបានធ្វើឱ្យប្រជាពលរដ្ឋមានភាពកក់ក្តៅ ដោយសារតែរដ្ឋបាលរាជធានីរក្សាបានសន្តិសុខ សុវត្ថិភាពសណ្តាប់ធ្នាប់របៀបរៀបរយ សាធារណៈបានល្អ។ លោក ម៉េត មាសភ័ក្ដី បានបញ្ជាក់ថា លោក ឃួង ស្រេង អភិបាលរាជធានីភ្នំពេញ នៅបានបានជំរុញឱ្យអាជ្ញាធរខណ្ឌទាំង១២ នៅរាជធានីភ្នំពេញ បន្តពង្រឹងការងារសន្តិសុខសណ្តាប់ធ្នាប់ ២៤ម៉ោង លើ២៤ម៉ោងមិនមែនតែការបោះឆ្នោតនោះទេ ក្រោយបោះឆ្នោតក៏នៅបន្តរក្សាការងារនេះ ជូនប្រជាពលរដ្ឋឱ្យបានល្អជាប្រចាំ។
អភិបាលរាជធានីភ្នំពេញ បានបញ្ជាក់ថា ក្នុងអំឡុងនៃយុទ្ធនាការឃោសនាបោះឆ្នោត និងនៅថ្ងៃបោះឆ្នោត នៅរាជធានីភ្នំពេញទាំងមូលមិនមានអំពើហិង្សាណាកើតឡើងនោះទេ ហើយគណបក្សនយោបាយ ទាំង២០ដែលធ្វើសកម្មភាពនៅភ្នំពេញ គឺមានភាពចាស់ទុំផ្នែកនយោបាយ ដោយមិនបានប្រើពាក្យសម្ដីដែលធ្វើឱ្យប៉ះពាល់ទៅដល់គណបក្សនីមួយៗនោះឡើយ។ ប៉ុន្តែទោះបីជាសន្តិសុខសណ្តាប់ធ្នាប់មានភាពរលូនក៏ដោយ លោក ឃួង ស្រេង នៅតែណែនាំដល់អាជ្ញាធរគ្រប់ខណ្ឌទាំង១២ កម្លាំងនគរបាលស្នងដ្ឋាន កម្លាំងអាវុធហត្ថរាជធានីភ្នំពេញ ត្រូវតែបន្តពង្រឹករក្សាសន្តិសុខសណ្តាប់ធ្នាប់ឱ្យកាន់តែល្អប្រសើរថែមទៀត។
ក្នុងកិច្ចប្រជុំនោះ អភិបាលរាជធានីភ្នំពេញ បានណែនាំឱ្យអាជ្ញាធរត្រូវបន្តយកចិត្តទុកដាក់ រៀបចំសណ្ដាប់ធ្នាប់ផ្លូវទាំង១១ខ្សែ ឱ្យបានម៉ឹងមាត់បន្ថែមទៀត ជាពិសេសត្រូវដាក់កងកម្លាំង និងរថយន្តស្ទូចប្រចាំការ ដើម្បីស្ទូចរថយន្តណា ដែលមិនគោរពហើយ ចតអាណាធិបតេយ្យនៅតាមដងផ្លូវ ទាំង១១ខ្សែនេះដែលពាក់ព័ន្ធបញ្ហា ការងាររៀបចំសណ្ដាប់ធ្នាប់សាធារណៈក្នុងរាជធានីភ្នំពេញ៕
ចែករំលែកព័តមាននេះ