ក្រុមអ្នកវិទ្យាសាស្ត្របានអះអាងថា មើមការ៉ុតគឺជាអាវុធថ្មីដែលអាចធ្វើសង្គ្រាមប្រឆាំងនឹងមហារីកក្រពេញប្រូស្តាត ។ ការសិក្សាមួយដែលដឹកនាំដោយសាស្ត្រាចារ្យ Norman Maitlandមកពីសាកលវិទ្យាល័យ University of York រកឃើញថា របបអាហារដែលសម្បូរដោយវីតាមីន A អាចជាគន្លឹះក្នុងការប្រយុទ្ធប្រឆាំងនឹងជំងឺខាងដើមដ្បិតវាបានធ្វើឱ្យជំងឺនោះអាចព្យាបាលបាន ។
ក្រុមអ្នកស្រាវជ្រាវបានរកឃើញថា អាស៊ីដ រេតេណូអុិច( Retenoic) ដែលជាសារធាតុគីមីបានមកពីវីតាមីន A អាចកាត់បន្ថយសមត្ថភាពវាយប្រហារឈ្លានពានរបស់មហារីកទៅលើជាលិកាការពារ ។
សាស្ត្រាចារ្យ Norman Maitlandបានថ្លែងថា៖«ប្រសិនជាជំងឺមហារីកត្រូវបានរារាំងមិនឱ្យចូលទៅបំផ្លាញប្រូស្តាត នោះឱកាសព្យាបាលដោយថ្នាំពេទ្យមានច្រើន ។ ចំណុចនេះគឺយើងចង់និយាយថា ការការពារប្រសើរជាងការព្យាបាល ។ វាអាចបញ្ឈប់ការរាលដាលរបស់ជំងឺមហារីក ។ នៅពេលរងការវាយប្រហារដោយអាស៊ីដរេតេណូអុិច កោសិកាមហារីកបានចុះអន់ថយសកម្មភាព»។
លោកសាស្ត្រាចារ្យបានបន្ថែមថា៖«អស់ជាច្រើនឆ្នាំមកហើយដែលគេដឹងថា បុរសមានកម្រិតវីតាមីន Aក្នុងឈាមទាបជាប់ពាក់ព័ន្ធនឹងជំងឺមហារីកប្រូស្តាត ។ តែគ្មានអ្នកណាដឹងពីយន្តការដែលពាក់ព័ន្ធនេះឡើយ ។ នេះជាការអភិវឌ្ឍថ្មីគួរឱ្យភ្ញាក់ផ្អើលដែលភ្ជាប់ធាតុមួយពីរបបអាហារប្រចាំថ្ងៃទៅនឹងកោសិកាមហារីកប្រូស្តាត» ៕
ចែករំលែកព័តមាននេះ