ការសិក្សាមួយដែលធ្វើលើមនុស្សជាងកន្លះលាននាក់នៅទូទាំងទ្វីបអឺរ៉ុបបានរកឃើញថា ទទួលទានអាហារសំបូរដោយសាច់កែច្នៃច្រើនមានដូចជា សាច់ក្រក សាច់ជ្រូកបីជាន់ប្រឡាក់គ្រឿង(bacon) ភ្លៅជ្រូកប្រឡាក់គ្រឿង( Ham)គឺជាមូលហេតុធ្វើឱ្យអ្នកឆាប់ស្លាប់មុនអាយុដោយជំងឺផ្សេងៗក្នុងនោះមាន ជំងឺបេះដូងនិងមហារីកជាដើម ។
សរសេរនៅក្នុងព្រឹត្តិប័ត្រ BMC Medicine ក្រុមអ្នកស្រាវជ្រាវបានបញ្ជាក់ថា អំបិលនិងសារធាតុគីមីផ្សេងៗដែលគេប្រើដើម្បីរក្សាទុកសាច់ឱ្យបានយូរគឺជាដើមចមបំផ្លាញសុខភាព ។ ដូច្នេះ អ្នកដែលនិយមទទួលទានសាច់កែច្នៃស្ទើរគ្រប់ពេលបាយគឺស្មើដូចពួកគេកំពុងជក់បារីបន្តកន្ទុយ ឬក៏ជាមនុស្សធាត់លើសទម្ងន់អញ្ចឹងដែរ ។
សាស្ត្រាចារ្យ Sabine Rohrmann មកពីសាកលវិទ្យាល័យ University of Zurichបានថ្លែងថា៖«ការប្រើប្រាស់សាច់ច្រើនក្នុងរបបអាហារប្រចាំថ្ងៃ ជាពិសេសសាច់កែច្នៃគឺធ្វើឱ្យបែបបទជីវិតរស់នៅប្រចាំថ្ងៃរបស់យើងពុំប្រកបដោយសុខុមាលភាព ។ ជាការពិតហើយដែលថា បោះបង់ចោលការជក់បារីសំខាន់ជាងកាត់បន្ថយការទទួលទានសាច់ ប៉ុន្តែខ្លួនខ្ញុំផ្ទាល់យល់ថា បង្កើនការទទួលទានសាច់ជាពិសេសសាច់កែច្នៃគឺមានន័យស្មើការបង្កើនហានិភ័យដល់សុខភាពជាទូទៅ ។ វិធីល្អគឺកាត់បន្ថយទាំង២មុខ »។ ទោះជាយ៉ាងនេះក្តី លោកស្រីសាស្ត្រាចារ្យបានបញ្ជាក់ថា ប្រសិនជាគេទទួលទានសាច់កែច្នៃមិនលើសពី២០ក្រាមក្នុងមួយថ្ងៃ នោះអត្រាស្លាប់មុនអាយុអាចការពារបាន៣ភាគរយ ៕
ចែករំលែកព័តមាននេះ