ខេត្តសៀមរាប ៖ រមណីយដ្ឋានភ្នំគូលែន គឺជាតំបន់ទេសចរណ៍វប្បធម៌ប្រវត្តិសាស្ត្រ ដ៏ល្បីល្បាញ កំពុងទាក់ទាញ ការចាប់អារម្មណ៍ជាខ្លាំងពីសំណាក់ភ្ញៀវទេសចរណ៍ជាតិ និងអន្តរជាតិ ដែលបានទៅទស្សនាជារៀងរាល់ថ្ងៃ ក្នុងចំណោមតំបន់ទេសចរណ៍សំខាន់ៗផ្សេងទៀត ក្នុងខេត្តសៀមរាប។ ព្រោះតំបន់ភ្នំគូលែននេះ ត្រូវបានអ្នកទេសចរណ៍ ទៅសិក្សាស្វែងយល់ អំពីអរិយធម៌ វប្បធម៌ ទំនៀមទម្លាប់ ប្រពៃណី និងជីវភាពរស់នៅប្រចាំថ្ងៃរបស់ពលរដ្ឋខ្មែរយើងនៅទីនោះផងដែរ។
ពិសេស ភ្នំគូលែនគឺជាតំបន់ផ្តល់នូវ ប្រភពទឹកដែលមិនចេះរីងស្ងួត មិនថារដូវប្រាំង ឬរដូវវស្សា ដោយនាំយកទៅស្រោចស្រព ដំណាំផ្នែកខាងក្រោម តាមរយៈហូរធ្លាក់ឆ្ពោះទៅតាមដងស្ទឹងសៀមរាប សម្រាប់បម្រើសេចក្ដីត្រូវការដល់មនុស្ស សត្វ រុក្ខជាតិ និងលើការងារកសិកម្មទៀតផង។ សូមបញ្ជាក់ផងែរថា តំបន់ទេសចរណ៍ ប្រវត្តិសាស្ត្រមួយនេះ មានភាពល្អឥតខ្ចោះ ទាំងប្រភពទឹក ទាំងព្រៃឈើ ទាំងការសិក្សាស្រាវជ្រាវ របស់អ្នកទេសចរណ៍ ប៉ុន្តែក៏នៅមានការខ្វះខាតខ្លះៗលើសេវាកម្ម បម្រើឱ្យវិស័យទេសចរណ៍ នៅភ្នំគូលែននេះ ផងដែរ ដូចជា៖
ការយកលុយរថយន្ត ម៉ូតូ គ្មានការរៀបចំ ផ្លូវដូចឋានសួគ៌ ចំណតរថយន្ត ម៉ូតូ គ្មានរបៀប អនាម័យ បរិស្ថាន ការលក់ដូរមានការឡើងថ្លៃ។ល។ ក្នុងនោះតម្រូវឱ្យពួកគាត់សហការជាមួយអាជ្ញាធរមូលដ្ឋាន និងអង្គភាពស្ថាប័នពាក់ព័ន្ធ ដើម្បីរួមគ្នាថែទាំបរិស្ថាន និងរៀបចំសណ្តាប់ធ្នាប់ នៅទីនោះឱ្យកាន់តែមានសណ្តាប់ធ្នាប់ អនាម័យ បរិស្ថាន ល្អ និងតម្លៃសមរម្យ ផងដែរ។ តាមប្រភពពី មន្ត្រីជំនាញ នៃមន្ទីទេសចរណ៍ខេត្ត បានប្រាប់ឱ្យដឹងថា ជាការពិតណាស់ គឺនៅមានចំណុចជាច្រើន ដែលទាមទារឱ្យប្រតិបត្តិករសេវាកម្ម ទេសចរណ៍ និងអង្គភាពស្ថាប័នពាក់ព័ន្ធ ទាំងអស់ រួមគ្នាពិនិត្យនិងដោះស្រាយជាបន្ទាន់។
ជាពិសេសលើបញ្ហាតូបអង្គុយ ដែលគេមិនទាន់ឃើញមានការបិទកំណត់តម្លៃ និងមិនមានសញ្ញាណាបញ្ជាក់ថា តូបមួយណាត្រូវបានគេកក់ទុករួចហើយនោះទេ។ ចំណែកបញ្ហាបង្គន់អនាម័យនៅទីនេះវិញ ក៏មិនទាន់មានភាពសមរម្យនៅឡើយដែរ។ ចំពោះបញ្ហាសំរាម វិញ យើងបានរៀបចំបានល្អប្រសើរជាងមុនហើយ ដោយបានដាក់ធុងសំរាម ទៅតាមគោលដៅសំខាន់ៗមួយចំនួន។ មន្ត្រី រូបនោះបន្តថា ផ្នែកបរិស្ថានមានភាពស្រស់បស់ឡើងវិញហើយ ចំពោះការលក់ដូរម្ហូបអាហារនៅទីនោះ ថ្ងៃធម្មតា មិនឡើងថ្លៃហួសហេតុណាស់ណានោះទេ បើថ្ងៃបុណ្យទានវិញ គឺពួកគាត់លក់ថ្លៃខ្ពស់បន្តិចហើយ។
បើតាមប្រភពពីប្រជាពលរដ្ឋម្នាក់ដែលបានទៅទស្សនានៅលើខ្នងភ្នំគូលែន បានបញ្ជាក់ថា ដើម្បីឱ្យទេសចរណ៍របស់យើង ប្រព្រឹត្តទៅបានរលូន ពុំមានការរាំងស្ទះនោះ គួតែយើងចេះសហការគ្នា គ្រប់ស្ថាប័ន ព្រមទាំងធ្វើការអប់រំបន្ថែមទៀតដល់អាជីវករនៅលើភ្នំគូលែននោះ ឱ្យមានការព្រមព្រៀង និងកែលម្អនូវចំណុចខ្វះខាត បន្ថែមទៀត ដើម្បីចៀសវាងការថ្នាំងថ្នាក់ពីភ្ញៀវទេសចរណ៍ ដែលគេមានលុយមកចាយហើយ ឱ្យគេនិយាយដើមទៀត ចំពោះតម្លៃម្ហូបអាហារ និងកន្លែងអង្គុយ វាឡើងថ្លៃស្រេចតែចិត្ត ទៅលើទឹកមាត់របស់ពួកគាត់តែប៉ុណ្ណោះ៕
ចែករំលែកព័តមាននេះ