ខេត្តកណ្តាល ៖ ប្រជាពលរដ្ឋរស់នៅក្នុងភូមិសំរោងក្អែ ឃុំសំរោងធំ ស្រុកកៀនស្វាយ ខេត្តកណ្តាល បានសម្តែងនូវការព្រួយបារម្ភយ៉ាងខ្លាំងពីបញ្ហាគ្រោះលិចលង់ដែលប៉ះពាល់ដល់ផលដំណាំ ផ្ទះសម្បែង និងហេដ្ឋារចនាសម្ព័ន្ធផ្សេងៗក្នុងមូលដ្ឋាន ។…
ខេត្តកណ្តាល ៖ ប្រជាពលរដ្ឋរស់នៅក្នុងភូមិសំរោងក្អែ ឃុំសំរោងធំ ស្រុកកៀនស្វាយ ខេត្តកណ្តាល បានសម្តែងនូវការព្រួយបារម្ភយ៉ាងខ្លាំងពីបញ្ហាគ្រោះលិចលង់ដែលប៉ះពាល់ដល់ផលដំណាំ ផ្ទះសម្បែង និងហេដ្ឋារចនាសម្ព័ន្ធផ្សេងៗក្នុងមូលដ្ឋាន ។ ខណៈជំនន់ទឹកភ្លៀង និងទឹកទន្លេមេគង្គហក់ឡើងលឿនកំពុងគំរាមកំហែង និងមានកន្លែងខ្លះមេភូមិបានដឹកនាំពលរដ្ឋច្រកដីដាក់បាវទប់ស្កាត់ និងកន្លែងខ្លះទៀតក៏បានរងការខូចខាតបណ្តើរៗហើយ។
ការព្រួយបារម្ភរបស់អ្នកស្រុកនេះដោយសារកម្រិតទឹកនៅតែហក់ឡើងជាបន្តបន្ទាប់ រីឯប្រព័ន្ធផ្លូវរំដោះទឹកមួយកន្លែង ស្ថិតក្នុងភូមិ-ឃុំខាងលើត្រង់ចំណុចស្ពានជប៉ុនទី1 «បើគិតទិសដៅតាមបណ្តោយផ្លូវជាតិលេខ1 ពីភ្នំពេញទៅអ្នកលឿង» ត្រូវឈ្មោះស៊ិន ចាន់ណារី «ហៅឡាក់» បានលើកទំនប់បិទកាត់ទទឹងជិតតែម្តង។
ប្រជាពលរដ្ឋបានលើកឡើងថា ចំណុចនេះកាលពីឆ្នាំ2000 «ជំនាន់ទឹកធំ» សម្តេចតេជោ ហ៊ុន សែន បានប្រើវិធីសាស្ត្រកាយផ្តាច់ផ្លួវជាតិ ដើម្បីរំដោះទឹកសង្គ្រោះផលដំណាំ ផ្ទះសម្បែង និងហេដ្ឋារចនាសម្ព័ន្ធក្នុងមូលដ្ឋាន។ បន្ទាប់មកសម្តេចបានធ្វើការអភិវឌ្ឍន៍ស្ពានដ៏វែងមានគុណភាពរឹងមាំ ស្រស់ស្អាត ដើម្បីបើកផ្លូវទឹកបញ្ជៀសនូវការលិចលង់ប៉ះពាល់ដល់ផលដំណាំ ផ្ទះសម្បែង និងហេដ្ឋារចនាសម្ព័ន្ធផ្សេងៗដូចមុនទៀត។
ប៉ុន្តែឥឡូវត្រូវឈ្មោះស៊ិន ចាន់ណារីនោះបានអះអាងថា ដីចំពីមុខស្ពានជាដីកម្មសិទ្ធិរបស់គាត់ ហើយបានលើកទំនប់ដ៏ធំកាត់ទទឹងបិទជិតចម្ងាយប្រហែល10ម៉ែត្រពីខាងមុខស្ពាន ស្របពេលឆ្នាំនេះទឹកឡើងធំគ្មានប្រព័ន្ធហូរ ទើបធ្វើឲ្យទឹកចាល់មកលិចលង់ផលដំណាំពលរដ្ឋក្នុងភូមិ និងហូរកាត់មកលើផ្លូវលំដ៏មានសារសំខាន់សម្រាប់ពលរដ្ឋដឹកជញ្ជូនកសិផលគ្រប់ខួប គ្រប់វស្សា បណ្តាលឲ្យទឹកហូរច្រុះបាក់ផ្លូវមួយកន្លែង។
ហើយផលដំណាំផ្ទះសម្បែង និងហេដ្ឋារចនាសម្ព័ន្ធដូចជា ផ្លូវលំត្រង់ចំណុចព្រែកតាហូដែលក្រុមការងារគណៈពង្រឹងគណបក្សប្រជាជនកម្ពុជា ជូនជាចំណងដៃដល់ប្រជាជនក៏កំពុងត្រូវបានគ្រោះទឹកជំនន់គំរាមកំហែងដែរ ។ តែដោយសារបានលោក សរ សំបូរ មេភូមិសំរោងក្អែ សហការជាមួយពលរដ្ឋរ៉ៃអង្គាស់ថវិកាគ្នាទិញដីច្រកដាក់បាវទប់ស្កាត់បណ្តោះអាសន្ន។
ពលរដ្ឋខ្លះនិយាយថា ដីនេះគឺឈ្មោះស៊ិន ចាន់ណារី «ហៅឡាក់» បានទិញតាំងពីមុនស្ពានមិនទាន់អភិវឌ្ឍន៍មែន ប៉ុន្តែត្រូវបានរាជរដ្ឋាភិបាលដោះស្រាយសំណងផលប៉ះពាល់បើកផ្លូវទឹកឲ្យគ្រប់គ្នារួចរាល់អស់ហើយ។
ចែករំលែកព័តមាននេះ