ខេត្តសៀមរាប ៖ តាមសេចក្តីរាយការណ៍ព័ត៌មានបឋមបានឱ្យដឹងថា ឪពុកនិងកូនបានបើកកាណូតចេញទៅប្រកបមុខរបរនេសាទទាំងយប់ ពេលនោះស្រាប់តែមានកាណូត១គ្រឿងផ្សេងទៀតបើកមកពីមុខបានបុកពេញទំហឹង បណ្ដាលឱ្យឪពុកស្លាប់ភ្លាមៗនៅនឹងកន្លែង ចំណែកកូន និងភាគីកាណូតម្ខាងទៀតពុំមានរងរបួសអ្វីនោះទេ រីឯកាណូតវិញបានរងការខូចខាតទាំងសងខាង បង្កឱ្យមានការភ្ញាក់ផ្អើលពេញផ្ទៃទឹកបឹងទន្លេសាប ព្រមទាំងដឹងដល់សមត្ថកិច្ចនគរបាលចរាចរណ៍ជើងទឹក ចុះមកជួយអន្តរាគមន៍ ឃាត់មនុស្សនិងកាណូត ដែលបង្កយកមករក្សាទុកនៅគោលដៅផងដែរ។
ហេតុការណ៍គួរឱ្យរន្ធត់នេះបានកើតឡើងកាលពីកាលពីវេលាម៉ោង៧និង៥នាទីយប់ថ្ងៃទី១៣ ខែសីហា ឆ្នាំ២០១៨ នៅលើផ្ទៃទឹកក្នុងស្ទឹងសង្កែ ស្ថិតក្នុងភូមិទ្រាយ ឃុំពោធិទ្រាយ ស្រុកពួក ខេត្តសៀមរាប។
ជនរងគ្រោះជាឪពុកដែលស្លាប់ឈ្មោះ សុខ ខេន អាយុ៤១ឆ្នាំ មុខរបរនេសាទ រស់នៅភូមិទ្រាយ ឃុំពោធិទ្រាយ ស្រុកពួក ខេត្តសៀមរាប និងកូនឈ្មោះសុខ ចិត្រា ភេទប្រុស អាយុ១១ឆ្នាំ មិនមានរងរបួសនោះទេ ។ កាណូតរបស់ជនរងគ្រោះម៉ាក CCC ប្រភេទស្មាច់ ពណ៌ស្លាទុំ បណ្តោយប្រវែង៦,១០ម៉ែត្រ ម៉ាស៊ីនម៉ាកហ៊ីណូតា ១៨សេស ។ ចំណែកជនបង្កឈ្មោះ មាន ភុត ភេទប្រុស អាយុ១៨ឆ្នាំ មុខរបរនេសាទ រស់នៅភូមិឃុំជាមួយជនរងគ្រោះ បានបើកកាណូតមួយគ្រឿងម៉ាក CNC ប្រភេទស្មាច់ ពណ៌ស្លាទុំ បណ្តោយប្រវែង៥,៩០ម៉ែត្រ ម៉ាស៊ីនម៉ាកហ៊ីណូតា ១៨សេស មានដឹកបុរសម្នាក់ឈ្មោះ ប៉ែន ភិរុន ភេទប្រុស អាយុ២២ឆ្នាំ រស់នៅភូមិឃុំជាមួយគ្នា មិនមានរងរបួស ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ