ខេត្តក្រចេះ ៖ អាជ្ញាធរខេត្តក្រចេះនៅតែមិនទាន់អនុញ្ញាតិឲ្យរថយន្តធន់ធំចាប់ពីចំណុះ ១០តោនឡើងទៅបើកបរលើផ្លូវជាតិតាមមាត់ទន្លេដើម្បីបញ្ចៀសពីការខូចខាត បើទោះបីជា ស្ថានភពទឹកជំនន់ទន្លេមេគង្គត្រូវបានបន្តស្រកចុះ ខណៈការលិចលង់ក៏កាន់តែធូរស្រាល ។
នាយករងរដ្ឋបាលសាលាខេត្តក្រចេះលោក ចេង គឹមជប់ បានឲ្យដឹងថា កម្រិតទឹកជំនន់ ទន្លេមេគង្គបានជន់ឡើងដល់កម្រិតប្រកាសអាសន្នត្រឹមកំពស់២២ម៉ែត្រតែស្ថានភាពការជន់លិចមិនបានជះឥទ្ធិពលអាក្រក់ណាមួយដល់ពលរដ្ឋឲ្យរងគ្រោះនោះទេ ។
លោកថា ការជន់លិចពីទឹកទន្លេមេគង្គ គឺមិនជន់ឡើងរហ័សដូចជំនន់ផ្សេងនោះទេ ទើបធ្វើឲ្យពលរដ្ឋដែលរស់នៅតាមតំបន់ងាយរងគ្រោះដោយការលិចលង់ពួកគាត់មានការប្រុងប្រយ័ត្នត្រៀម លក្ខណៈទប់ទល់ជាមួយនឹងស្ថានភាពនេះ ។
បញ្ជាក់ឲ្យដឹងនៅថ្ងៃទី១៤ សីហា នេះនាយករងរដ្ឋបាលសាលាខេត្តលោក ចេង គឹមជប់ បានប្រៀបធៀបថា សម្រាប់ខេត្តក្រចេះឆ្នាំនេះស្ថានភាពនៃការលិចលង់គឺមានសន្ឋឹកខ្លាំងជាងឆ្នាំមុនៗ ។
ទោះជាបែបណាលោកនាយករងរដ្ឋបាលសាលាខេត្តរូបនេះមិនទាន់បានបង្ហាញរបាយការណ៍នៃផលប៉ះពាល់ខូចខាតដោយគ្រោះទឹកជំនន់នេះនៅឡើយទេ ដោយគ្រាន់តែលោកបានវាយតម្លៃថា ផលប៉ះពាល់ដូចជា វិស័យកសិកម្ម និងហេដ្ឋារចនារសម្ព័ន នឹងកើតមានដោយសារការលិចលង់ខ្លាំងនេះ ៕
ចែករំលែកព័តមាននេះ