ខេត្តមណ្ឌលគិរី ៖ ឈើខុសច្បាប់ចំនួន៥៧កំណាត់ ត្រូវបាននគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តមណ្ឌលគិរីសហការជាមួយមន្ត្រីឧទ្យានុរក្សដែនជម្រកសត្វព្រៃណាំលៀ ស្រាវជ្រាវរកឃើញបង្ក្រាបបានកាលពីព្រឹកថ្ងៃទី១៤ ខែសីហា ឆ្នាំ២០១៨ នេះនៅចំណុចអូរពោត ភូមិពូទឺត ឃុំប៊ូស្រា…
ខេត្តមណ្ឌលគិរី ៖ ឈើខុសច្បាប់ចំនួន៥៧កំណាត់ ត្រូវបាននគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តមណ្ឌលគិរីសហការជាមួយមន្ត្រីឧទ្យានុរក្សដែនជម្រកសត្វព្រៃណាំលៀ ស្រាវជ្រាវរកឃើញបង្ក្រាបបានកាលពីព្រឹកថ្ងៃទី១៤ ខែសីហា ឆ្នាំ២០១៨ នេះនៅចំណុចអូរពោត ភូមិពូទឺត ឃុំប៊ូស្រា ស្រុកពេជ្រាដា ។
លោក វុធ សារុំ នាយកដែនជម្រកសត្វព្រៃណាំលៀបានឲ្យដឹងថា កម្លាំងជំនាញបានប្រទះឃើញគំនរឈើប្រភេទឈើស្រឡៅចំនួន៥៧កំណាត់ដែលក្រុមជនល្មើសយកលាក់ទុកនៅចំណុចភូមិសាស្ត្រខាលើតែឈើនេះមិនទាន់បានធ្វើការវាស់វែងនៅឡើយទេ ។
លោកនាយកដែនជម្រកបន្តថា បច្ចុប្បន្នកំពុងរកមធ្យោបាយដឹកជញ្ជូនយកទៅរក្សាទុកនៅស្នាក់ការអូរពោតដើម្បីកសាងសំណុំរឿងបន្តនីតិវិធីទៅតាមផ្លូវច្បាប់ ។
លោក កែវ សុភគ៌ ប្រធានមន្ទីរបរិស្ថានខេត្តបានឲ្យដឹងថា ដោយរដូវនេះមានភ្លៀងធ្លាក់ស្ទើររាល់ថ្ងៃមន្ត្រីជំនាញពិបាកក្នុងការយាមល្បាតទើបមានជនឆ្លៀតឱកាសតែងឆ្មក់លួចដឹកឈើម្តងម្កាល ។ យ៉ាងណាកម្លាំងជំនាញបានចាប់បង្ក្រាបករណីបទល្មើសព្រៃឈើជារើយៗទោះជាជួបស្ថានភាពពិបាកខ្លាំងនារដូវវស្សានេះក៏ដោយ ៕
ចែករំលែកព័តមាននេះ