ខេត្តបន្ទាយមានជ័យ ៖ សពពលករខ្មែរម្នាក់បានស្លាប់ទាំងមានមន្ទិលសង្ស័យដោយឯកសាររបស់ថៃបញ្ជាក់ថា ជាការឆក់ចរន្តអគ្គិសនី ប៉ុន្តែឱពុកម្តាយ និងសាច់ញាតិសពសង្ស័យថា អាចជាអំពើរឃាតកម្ម ។
ជនរងគ្រោះឈ្មោះ វ៉ាន ជីហួរ ហៅភក្ត្រា ភេទប្រុស អាយុ២០ឆ្នាំ ជាកម្មកររោងចក្រផលិតម៉ាស៊ីនត្រជាក់របស់ក្រុមហ៊ុនមួយ ក្នុងខេត្តនន់ថាក់បូរី ប្រទេសថៃ និងមានទីលំនៅភូមិរាមសេនា ឃុំល្វា ស្រុកបវេល ខេត្តបាត់ដំបង ។ ជនរងគ្រោះបានស្លាប់នៅវេលាទាបភ្លឺម៉ោងជិត៣ព្រឹក ថ្ងៃទី៩ ខែសីហា ឆ្នាំ២០១៨ នៅពេលគេបញ្ជូនទៅធ្វើការនៅឯក្រុងបាងកក ។
តាមប្រភពពលករម្នាក់ដែលស្នាក់នៅជុំគ្នាដែលត្រូវជាបងជីដូនមួយសពឈ្មោះ កឹ កុយ ហៅគុយ ភេទប្រុស អាយុ២៧ឆ្នាំ មានទីលំនៅក្នុងភូមិ-ឃុំជាមួយជនរងគ្រោះប្រាប់ថា ជនរងគ្រោះសព្វមួយដងធ្វើការនៅក្នុងរោងចក្រខាងលើ លុះយប់ថ្ងៃទី៨ ខែសីហា ខាងក្រុមហ៊ុនគេដឹកទៅធ្វើការនៅក្រុងបាងកក ។
គាត់បន្តថា លុះព្រឹកថ្ងៃទី៩ ខែសីហា មានគេទាក់ទងប្រាប់ថា ជនរងគ្រោះបានស្លាប់ហើយគឺដោយសារឆក់ចរន្តអគ្គីសនីពេលទៅធ្វើការតម៉ាស៊ីនត្រជាក់ឲ្យគេនៅឯក្រុងបាងកក ។ ថ្វីត្បិតការស្លាប់របស់ជនរងគ្រោះមានលិខិតបញ្ជាក់ពីខាងពេទ្យថា ដោយសារឆក់ចរន្តអគ្គិសនី ប៉ុន្តែលើរាងកាយសពបានបន្សល់នៅមន្ទិលជាច្រើន ដូចជាលើថ្ពាល់ខាងឆ្វេងមានស្នាមមុតវែងជ្រៅរហូតដល់ធ្មេញ, ឆ្អឹងជំនីខាងឆ្វេងមានស្នាមជាំសង្ស័យជាស្នាមវាយ និងប្រឡោះមេជើងទាំងសងខាងដាច់ហើយហូរឈាមជាច្រើន ។
ពលកររូបដែលត្រូវជាបងជីដូនមួយនេះបន្តថា ជាធម្មតាច្បាប់ការងារក្នុងក្រុមហ៊ុនតែងតែតម្រូវឲ្យកម្មករគ្រប់គ្នាស្លៀកពាក់ឯកសណ្ឋានក្រុមហ៊ុនពិសេសស្បែកជើងប៉ាតា ។ ផ្ទុយទៅវិញជនរងគ្រោះស្លាប់ជាមួយស្បែកជើងភ្ទាត់ធម្មតា និងខោអាវធម្មតាដូចគ្នា ។
ដោយឡែកបុរសជាឱពុកសពឈ្មោះ រឿង សារ៉ាត់ អាយុ៥០ឆ្នាំ ក៏បានអះអាងតាមទូរស័ព្ទថាការស្លាប់របស់កូនគាត់មិនអាចជាករណីឆក់ចរន្តអគ្គិសនីនោះទេ ។ គាត់អាចស្លាប់ដោយសារគេវាយធ្វើបាបព្រោះមានគេបង្ហោះតាមបណ្តាញសង្គមហ្វេសប៊ុកប្រាប់ថា ជនរងគ្រោះត្រូវគេវាយធ្វើបាបទើបស្លាប់ និងថា មិនមែនជាការឆក់ចរន្តអគ្គីសនីឡើយ ។
ទាំងឱពុកសពទាំងបុរសខាងលើលើកឡើងថា អ្វីដែលជាមន្ទិលមែនទែននោះគឺក្រោយពីជនរងគ្រោះស្លាប់ពួកគាត់ទាមទារសួររកមេការមួយណាដែលយកជនរងគ្រោះទៅធ្វើការហើយទៅគ្នាប៉ុន្មាននាក់ ជាមួយនណាខ្លះ និងសុំបង្ហាញកាមេរ៉ាសុវត្ថិភាពកន្លែងកើតហេតុបែរជាគ្មានការឆ្លើយតបពីម្ចាស់ក្រុមហ៊ុន ឬតំណាងក្រុមហ៊ុនដែលជនរងគ្រោះធ្វើការជាមួយឡើយ ។
ពួកគាត់លើកឡើងថា បើករណីនេះកើតឡើងនៅស្រុកខ្មែរ និងប្តឹងតវ៉ាទាមទាររកយុត្តិធម៌ ប៉ុន្តែនៅស្រុកគេពួកគាត់មិនដឹងទៅពឹងអ្នកណាឡើយ ។ ពួកគាត់ និងសាច់ញាតិបានទទូចឲ្យក្រសួងពាក់ព័ន្ធកម្ពុជាមេត្តាជួយធ្វើការស្រាវជ្រៀវករណីនេះផង ព្រោះពួកគាត់មិនជឿថា ជាការឆក់ចរន្ត ព្រោះលើរាងកាយសពបន្សល់នៅស្នាមរបួសជាច្រើន និងមានឈាមហូរយ៉ាងច្រើនថែមទៀត សូម្បីតែអាវដែលជនរងគ្រោះពាក់ជាប់នឹងខ្លួនក៏ប្រឡាក់សុទ្ធតែឈាមផងដែរ ។
សពរងគ្រោះត្រូវបានភាគីថៃបញ្ជូនមកកម្ពុជាតាមច្រកទ្វារតំបន់បឹងត្រកួនក្នុងស្រុកថ្មពួក ខេត្តបន្ទាយមានជ័យ កាលពីយប់ថ្ងៃទី១០ ខែសីហា ឆ្នាំ២០១៨ ដើម្បីយកទៅលំនៅដ្ឋានធ្វើបុណ្យតាមប្រពៃណី ៕
ចែករំលែកព័តមាននេះ