រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពលួចម៉ូតូដែលម្ចាស់ចតនៅមុខផ្ទះលក់ដូរមួយកន្លែងបានសម្រេច ហើយព្យាយាមជិះគេចខ្លួន ប៉ុន្តែពេលជិះចេញទៅបានចម្ងាយប្រមាណ៥០ម៉ែត្រប៉ុណ្ណោះ ត្រូវម្ចាស់ម៉ូតូឃើញទាន់បានស្រែកឆោឡោបង្កឱ្យមានការភ្ញាក់ផ្អើលដល់ប្រជាពលរដ្ឋព័ទ្ធចាប់ខ្លួនបានតែម្តង ។ ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី១៤ ខែសីហា ឆ្នាំ២០១៨ នៅចំណុចមុខផ្ទះលក់ដូរមួយកន្លែង ដែលមានទីតាំងស្ថិតនៅក្នុងភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
នគរបាលបានឲ្យដឹងថា ជនសង្ស័យខាងលើដែលត្រូវចាប់ខ្លួនឈ្មោះ អ៊ិន មករា ភេទប្រុស អាយុ២០ឆ្នាំ ស្នាក់នៅក្នុងភូមិថ្មគោល សង្កាត់ចោមចៅ១ ខណ្ឌពោធិ៍សែនជ័យ ។ ជនសង្ស័យម្នាក់នេះបានធ្វើសកម្មភាពលួចម៉ូតូ១គ្រឿងម៉ាកហុងដាស្គូពី ពណ៌ស ពាក់ស្លាកលេខ ភ្នំពេញ ១FB-៥០៥៩ ជាកម្មសិទ្ធិរបស់ឈ្មោះ ដាង វុត្ថា ភេទប្រុស អាយុ៣១ឆ្នាំ មុខរបរលក់ដូរ ស្នាក់នៅក្នុងភូមិកើតហេតុខាងលើ។
តាមប្រភព័ត៌មានបានឲ្យដឹងថា នៅមុនពេលកើតហេតុ ម្ចាស់បានចតម៉ូតូនៅមុខផ្ទះលក់ដូរខាងលើដែលស្ថិតនៅខាងលិចវត្តគោកចំបក់ ពេលនោះជនសង្ស័យបានធ្វើសកម្មភាពលួចកាច់សោ.កបានសម្រេចរួចព្យាយាមជិះគេចខ្លួន ប៉ុន្តែពេលជិះចេញទៅបានចម្ងាយប្រមាណ៥០ម៉ែត្រតែប៉ុណ្ណោះ ត្រូវបានម្ចាស់ឃើញទាន់ស្រែឆោឡោថាចោរៗ បង្កឲ្យមានការភ្ញាក់ផ្អើលពេញភូមិ ពេលនោះប្រជាពលរដ្ឋនាំគ្នាជួយដេញតាមចាប់បានភ្លាមៗផងដែរ។ បន្ទាប់មកប្រជាពលរដ្ឋបានវាយទាត់ធាក់ជនសង្ស័យម្នាក់មួយដៃម្នាក់មួយជើងរួច ទើបប្រគល់ជនសង្ស័យឱ្យនគរបាលប៉ុស្តិ៍ចោមចៅ១នាំទៅសាកសួរ និងកសាងសំណុំរឿងដើម្បីចាត់ការតាមច្បាប់៕
ចែករំលែកព័តមាននេះ