សហរដ្ឋអាមេរិក ៖ ពុំទាន់ទាំងមានអាយុគ្រប់បោះឆ្នោតផង ក្មេងប្រុសអាមេរិកម្នាក់អាយុទើប១៤ឆ្នាំ ឈ្មោះ ETHAN SONNEBORN បានឈរឈ្មោះជាបេក្ខជនបោះឆ្នោតសម្រាំងនៃគណបក្សប្រជាធិបតេយ្យ សម្រាប់តំណែងអភិបាលរដ្ឋវ័រម៉ុង ដែលប្រព្រឹត្តទៅកាលពីថ្ងៃទី១៤ ខែសីហា។
រដ្ឋតូចនោះរបស់សហរដ្ឋអាមេរិកពុំកំណត់អាយុ សម្រាប់កាន់តំណែងខ្ពស់មួយក្នុងរដ្ឋនេះឡើយ។ យុវសិស្សវិទ្យាល័យរូបនេះគ្រាន់តែបំពេញលក្ខខណ្ឌតែមួយគត់ គឺត្រូវជាអ្នករស់នៅក្នុងរដ្ឋនោះយ៉ាងតិច៤ឆ្នាំឡើងទៅ រួចរូបគេរស់នៅទីនោះតាំងពីគេកើតមកម្ល៉េះ។
ទោះបីជាសំណាងជាប់ឆ្នោតស្ទើរតែគ្មានក្ដី ប៉ុន្តែការដាក់បេក្ខភាពរបស់ ETHAN SONNEBORN ពុំមែនជាការលេងសើចឡើយ។ ក្មេងប្រុសរូបនេះមានគំនិតប្រកាន់ជំហរមួយ គឺឆ្វេងនិយមបំផុតដូចគំនិតរបស់ព្រឹទ្ធសមាជិករដ្ឋវ័រម៉ុងលោក BERNIE SANDERSG អតីតបេក្ខជនសម្រាំងនៃគណបក្សប្រជាធិបតេយ្យតទល់ជាមួយលោកស្រីហ៊ីលឡារីគ្លីនតុន សម្រាប់ការបោះឆ្នោតប្រធានាធិបតីឆ្នាំ២០១៦។ រូបគេក៏ចូលរួមដែរកាលពីដើមខែសីហា ក្នុងការសួរដេញដោលគ្នាតទល់ជាមួយគូប្រជែង៣រូបទៀត ដែលមានអាយុលើសគេពី៤ទៅ៥ដង៕
ចែករំលែកព័តមាននេះ