រាជធានីភ្នំពេញ ៖ នៅក្នុងហេតុការណ៍ដាច់ ដោយឡែកមួយទៀតលើករណីស្ត្រីជនជាតិចិនបុកចោរឆក់ទូរស័ព្ទនោះ នគរបាលប៉ុស្តិ៍ទំនប់ទឹកខណៈកំពុងល្បាតតាមផ្លូវលេខ៥១ បានប្រទះនឹងហេតុការណ៍ព្រមទាំងសម្រែកថា «ចោរៗ» ផ្សេងទៀត ក៏បានដេញតាមជនសង្ស័យ រហូតមកដល់ប្លុកបឹងកក់វិហារអ៊ិស្លាម ទើបឃាត់ខ្លួនបាន២នាក់ នាំយកទៅសាកសួរ ។ ប៉ុន្តែទម្រាំនាំពួកគេចេញផុត គឺស្ទើរតែអស់ជីវិត ដោយសារមានអ្នកភ្ញាក់ផ្អើលចោមរោមវាយទាត់ធាក់រហូតទ្រមខ្លួន ។
ហេតុការណ៍នេះ កើតឡើងកាលពីវេលាម៉ោង១១ និង៣០នាទីយប់ថ្ងៃទី១២ សីហា ស្ថិតនៅតាមផ្លូវបេតុងចំណុចប្លុកបឹងកក់ ស្ថិតក្នុងសង្កាត់ស្រះចក ខណ្ឌដូនពេញ ។ ប្រភពព័ត៌មានពីអ្នកឃើញហេតុការណ៍ឱ្យដឹងថា មន្ត្រីនគរបាលប៉ុស្តិ៍ទំនប់ទឹកម្នាក់ ខណៈកំពុងល្បាតតាមផ្លូវលេខ៥១ ស្រាប់តែប្រទះឃើញជន២នាក់ជិះម៉ូតូមួយគ្រឿងម៉ាកស្មាស ពណ៌ក្រហមលាយខ្មៅ ពាក់ផ្លាកលេខ ភ្នំពេញ ១CK-៤៣៨១ បើកតាមផ្លូវលេខ៥១ពីខាងត្បូងទៅខាងជើង ហើយមានគេតាមស្រែកពីក្រោយថាចោរៗ ។
ពេលនោះ មន្ត្រីនគរបាលរូបនេះក៏ជួយដេញតាម រហូតទៅដល់ម្តុំវិហារអ៊ិស្លាមបឹងកក់ ទើបឃាត់ខ្លួនបាន តែជនសង្ស័យក៏ត្រូវអ្នកចោមរោមមើល បានព្រួតវាយម្នាក់មួយដៃម្នាក់មួយជើង រហូតរងរបួសយ៉ាង
ដំណំ ។
ទោះបីជាត្រូវចោទថាជា ចោរក្តី តែយុវជនទាំង២នាក់បានឆ្លើយប្រកែកថា ពួកគេមិនមែនជាចោរឆក់ទេ គឺទើបតែចេញមកពីផ្លូវស្ពានអាកាស៥មករា ក៏មានជនសង្ស័យ៤នាក់ ជិះម៉ូតូហុងដាឌ្រីម២គ្រឿងដេញវាយ រួចហើយស្រែកថា «ចោរៗ» ទើបពួកគេបើកម៉ូតូរត់គេចខ្លួនក៏ជួបរឿងបែបនេះតែម្តង ។ ក្រោយពេលកើតហេតុ សមត្ថកិច្ចបានឃាត់ខ្លួនជនសង្ស័យទាំង២នាក់យកទៅប៉ុស្តិ៍នគរបាលបឹងកេងកងទី១ ដើម្បីសាកសួរទៅតាមនីតិវិធី តើជាជនរងគ្រោះមែនឬជាចោរ ។
ព័ត៌មានចុងក្រោយ នៅព្រឹកថ្ងៃទី១៣ សីហា ២នាក់នេះមិនពិតជាចោរទេ ព្រោះគ្មានអ្នកដាក់ពាក្យបណ្តឹង ៕
ចែករំលែកព័តមាននេះ