ទីក្រុងសេអ៊ូល ៖ អង្គការកិច្ចសហប្រតិបត្តិការ និងការអភិវឌ្ឍសេដ្ឋកិច្ច (OECD) បានព្រមានថា សេដ្ឋកិច្ចរបស់ប្រទេសកូរ៉េខាងត្បូងកំពុងតែជួបប្រទះនឹងឧបសគ្គយ៉ាងធ្ងន់ ធ្ងរ ។ ការព្រួយបារម្ភកើតមានឡើង…
ទីក្រុងសេអ៊ូល ៖ អង្គការកិច្ចសហប្រតិបត្តិការ និងការអភិវឌ្ឍសេដ្ឋកិច្ច (OECD) បានព្រមានថា សេដ្ឋកិច្ចរបស់ប្រទេសកូរ៉េខាងត្បូងកំពុងតែជួបប្រទះនឹងឧបសគ្គយ៉ាងធ្ងន់
ធ្ងរ ។
ការព្រួយបារម្ភកើតមានឡើង ខណៈអង្គការនេះបានកាត់បន្ថយសន្ទស្សន៍ Composite Leading Indicator (CLI) របស់ពួកគេប្រមាណ០,៣ មកស្មើ៩៩,២ កាលពីខែមិថុនា កន្លងមក ។
សន្ទស្សន៍នេះបានបង្កើតឡើង ដើម្បីព្យាករលើបម្រែបម្រួលវដ្តអាជីវកម្មរបស់ប្រទេស ដែលទាក់ទងនឹងសកម្មភាពសេដ្ឋកិច្ច ក្នុងរយៈពេល៦ទៅ៩ខែខាងមុខ ។
ពិន្ទុក្រោម១០០ មានន័យថា សេដ្ឋកិច្ចកំពុងតែអន់ថយ ហើយកូរ៉េខាងត្បូងមើលឃើញពិន្ទុរបស់ខ្លួន ធ្លាក់ចុះអស់រយៈពេល១៥ខែជាប់ៗគ្នាមកហើយ ។
ទាក់ទងនឹងបញ្ហាទាំងនេះ រដ្ឋាភិបាលប្រទេសកូរ៉េខាងត្បូងនិយាយថា វានៅលឿននៅឡើយក្នុងការប្រាកដថា សូចនាករណាមួយអាចបង្ហាញថា សេដ្ឋកិច្ចពិតជាកំពុងតែអន់ថយនោះ ។ ពួកគេបន្ថែមថា បច្ចុប្បន្ននេះ មិនមែនជាពេលសម្រាប់ប្រកាសថា សេដ្ឋកិច្ចកំពុងតែធ្លាក់ចុះជាផ្លូវការឡើយ ។
មន្ត្រីរដ្ឋាភិបាលមួយរូបនិយាយថា ៖« ពិតណាស់ថា ប្រសិនបើសន្ទស្សន៍នាំមុខធ្លាក់ចុះអស់រយៈពេល៦ខែជាប់ៗគ្នា វាជាមុខសញ្ញាបង្ហាញពីការអន់ថយ ប៉ុន្តែកាលពីខែឧសភាឆ្នាំនេះ ពិន្ទុមិនផ្លាស់ប្តូរទេ ដែលធ្វើឲ្យកាន់តែពិបាកក្នុងការសរុបសេចក្តី » ។
លើសពីនេះ មន្ត្រីរដ្ឋាភិបាលរូបនេះបានចង្អុលបង្ហាញពីតម្រូវការតាមដានមើលលើកត្តាផ្សេងទៀត ដើម្បីឲ្យដឹងច្បាស់ពីទិសដៅសេដ្ឋកិច្ចប្រទេសកូរ៉េខាងត្បូងទាំងមូល ៕
ចែករំលែកព័តមាននេះ