ខេត្តបាត់ដំបង ៖ បុរស២នាក់ត្រូវបានកម្លាំងកងរាជអាវុធហត្ថឃាត់ ខណៈដែលកំពុងជូញដូរគ្រឿងញៀនកាលពីវេលាម៉ោង៩និង៣០នាទីយប់ ថ្ងៃទី១៣ ខែសីហា នៅត្រង់ចំណុចខាងក្រោយសាកលវិទ្យាល័យ ខេមរះ ស្ថិតក្នុងភូមិកម្មករ សង្កាត់ស្វាយប៉ោ…
ខេត្តបាត់ដំបង ៖ បុរស២នាក់ត្រូវបានកម្លាំងកងរាជអាវុធហត្ថឃាត់ ខណៈដែលកំពុងជូញដូរគ្រឿងញៀនកាលពីវេលាម៉ោង៩និង៣០នាទីយប់ ថ្ងៃទី១៣ ខែសីហា នៅត្រង់ចំណុចខាងក្រោយសាកលវិទ្យាល័យ ខេមរះ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ។
មន្ត្រីកងរាជអាវុធហត្ថបានឲ្យដឹងថា ជនសង្ស័យដែលត្រូវឃាត់ខ្លួនទាំង២នាក់នោះម្នាក់ឈ្មោះពេញ សម្បត្តិ អាយុ២៤ឆ្នាំ មានមុខរបរមិនពិតប្រាកដ រស់នៅភូមិសំរោងតាកុក ឃុំសំរោងក្នុង ស្រុកឯកភ្នំ ខេត្តបាត់ដំបង និងម្នាក់ទៀតឈ្មោះ អ៊ឹម ថាថាត ហៅ ង៉ា អាយុ១៨ឆ្នាំ មុខរបរធ្វើស្រែ រស់នៅភូមិផ្សារត្បែង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។ ជនសង្ស័យទាំង២នាក់នេះត្រូវបានកម្លាំងកងរាជអាវុធហត្ថក្រុងបាត់ដំបងឃាត់ខ្លួនពេលពួកគេកំពុងប្រព្រឹត្តបទល្មើសជាក់ស្ដែង ។
ជាមួយនឹងការឃាត់ខ្លួននេះបើតាមរបាយការណ៍បឋមរបស់កងរាជអាវុធហត្ថបានឲ្យដឹងថា កម្លាំងជំនាញបានដកហូតវត្ថុតាងមួយចំនួនដូចជា សារធាតុញៀនប្រភេទម្សៅក្រាមពណ៌សរឹងថ្លា (ម៉ាទឹកកក) ចំនួន០៦កញ្ចប់ដែលមានទម្ងន់២,២១ក្រាម ម៉ូតូ១គ្រឿងម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ (គ្មានស្លាកលេខ) ដែលគេសង្ស័យថា ជាមធ្យោបាយសម្រាប់បំរើការប្រព្រឹត្តបទល្មើស ទូរស័ព្ទ៣គ្រឿង និងសម្ភារវេចខ្ចប់គ្រឿងញៀនមួយចំនួនទៀត ។
យោងតាមការសួរនាំជាបឋមដំបូងជនសង្ស័យឈ្មោះ អឹម ថាថាត ហៅង៉ា និងឈ្មោះ ពេញ សម្បត្តិ បានឆ្លើយទទូលស្គាល់ថា ថ្នាំញៀនរួមទាំងវត្ថុតាងនានាដែលសមត្ថកិច្ចដកហូតនោះគឺពិតជារបស់ខ្លួនមែន ។ ប៉ុន្តែភ្លាមៗនោះជនទាំង២នាក់ហាក់មិនទាន់ទម្លាយជាផ្លូវការឲ្យសមត្ថកិច្ចដឹងអំពីប្រវត្តិប្រព្រឹត្តបទល្មើសគ្រឿងញៀនរបស់ពួកខ្លួន ហើយក៏មិនទាន់សារភាពអំពីប្រភពដែលពួកគេនាំយកថ្នាំញៀនមកជួញដូរបន្តនៅឡើយដែរ ។
ទោះជាយ៉ាងណា បើតាមមន្ត្រីកងរាជអាវុធហត្ថបានបញ្ជាក់ប្រាប់ថា ជនសង្ស័យទាំង២នាក់ជាមុខសញ្ញាដែលជាប់ពាក់ព័ន្ធនឹងបទល្មើសជួញដូរគ្រឿងញៀនដែលច្បាប់បានហាមឃាត់ ។ បន្ទាប់ពីឃាត់ខ្លួនជនទាំង២នាក់នេះបានសារភាពទទួលស្គាល់កំហុស និងវត្ថុតាងដែលសមត្ថកិច្ចបានដកហូតនោះហើយ ។
មន្ត្រីដដែលបានបញ្ជាក់ដែរថា ពេលនេះមន្ត្រីជំនាញកំពុងសួរនាំបន្តដើម្បីស្រាវជ្រាវរកបក្សពួកថែមទៀត និងកំពុងកសាងសំណុំរឿងដើម្បីបញ្ជូនទៅតុលាការចាត់ការតាមនីតិវិធី ៕
ចែករំលែកព័តមាននេះ