ខេត្តព្រៃវែង ៖ គិតមកដល់ត្រឹមថ្ងៃទី១៣ ខែសីហា ឆ្នាំ២០១៨ ទឹកជំនន់បានជន់លិច និងបង្កផលប៉ះពាល់មកលើខេត្តព្រៃវែងចំនួន១១ក្រុង-ស្រុក នេះបើតាមរបាយការណ៌របស់គណៈកម្មការគ្រោះមហន្តរាយខេត្តព្រៃវែងដែលបានតាមដានពីស្ថានភាពទឹកជំនន់នៅទូទាំងខេត្តជារៀងរាល់ថ្ងៃ ។ គណៈកម្មការនេះបានអោយដឹងថា…
ខេត្តព្រៃវែង ៖ គិតមកដល់ត្រឹមថ្ងៃទី១៣ ខែសីហា ឆ្នាំ២០១៨ ទឹកជំនន់បានជន់លិច និងបង្កផលប៉ះពាល់មកលើខេត្តព្រៃវែងចំនួន១១ក្រុង-ស្រុក នេះបើតាមរបាយការណ៌របស់គណៈកម្មការគ្រោះមហន្តរាយខេត្តព្រៃវែងដែលបានតាមដានពីស្ថានភាពទឹកជំនន់នៅទូទាំងខេត្តជារៀងរាល់ថ្ងៃ ។
គណៈកម្មការនេះបានអោយដឹងថា ស្រុកក្រុងដែលរងផលប៉ះពាល់ដោយទឹកជំនន់ទាំងអស់មាន១១ក្រុង-ស្រុក ស្មើនឹង៥៦ឃុំ និង២៥២ភូមិ ក្នុងនោះមានដូចជា ស្រុកពាមរក៍ ស្រុកព្រះស្តេច ស្រុកស៊ីធរកណ្តាល ស្រុកកំចាយមារ ស្រុកពារាំង ស្រុកពោធិ៍រៀង ស្រុកកំពង់ត្របែក ក្រុងព្រៃវែង ស្រុកបាភ្នំ ស្រុកស្វាយអន្ទរ និងស្រុកពាមជរ ។
ជាមួយគ្នានោះដែរ ទឹកជំនន់បានបង្កនូវផលប៉ះពាល់ជាច្រើនក្នុងនោះទឹកបានលិចចូលក្រោមផ្ទះប្រជាពលរដ្ឋចំនួន៣៨៨០ខ្នង លិចចូលដីស្រែប្រជាពលរដ្ឋចំនួន១៤១០៧ហិកតា ក្នុងនោះធ្វើអោយស្រូវរលួយខូចអស់ចំនួន១៩៤៤ហិកតា និងប៉ះពាល់ដំណាំផ្សេងៗចំនួនជាង៧៣ហិកតា សត្វគោក្របីរបស់អ្នកស្រុកត្រូវបានជម្លៀសទៅរកទីទួលសុវត្ថិភាពចំនួន១២២៧ក្បាល និងប្រជាពលរដ្ឋចំនួន៧៤គ្រួសារ នៅស្រុកស៊ីធរកណ្តាល និងស្រុកពាមជរ ដែលត្រូវទឹកជន់លិចធ្ងន់ធ្ងរ ក៏ត្រូវបានជម្លៀសទៅកាន់ទីទួលសុវត្ថិភាពផងដែរ ។
ដោយឡែកវិស័យហេដ្ឋារចនាសម្ព័ន្ធ ទឹកជំនន់បានបង្កផលប៉ះពាល់ផ្លូវថ្នល់សរុបប្រវែង១៨៤៨៨៨ម៉ែត្រ មណ្ឌលសុខភាព២កន្លែង វត្ត១កន្លែង សាលារៀន៣២កន្លែង បង្គន់អនាម័យចំនួន៧២៣បង្គន់ និងអណ្តូងទឹកចំនួន២៧៨អណ្តូង ។
ឆ្លើយតបចំពោះបញ្ហាគ្រោះទឹកជំនន់នេះដែរ អាជ្ញាធរខេត្ត និងស្រុកក្រុងទាំអស់ រួមជាមួយ និងកាកបាទក្រហមខេត្ត និងអនុសាខាស្រុកនីមួយៗបានចុះតាមដានជាប្រចាំ និងបាននាំយកអំណោយមនុស្សធម៌ជាជំនួយសង្គ្រោះបន្ទាន់ទៅចែកជូនដល់បងប្អូនជនរងគ្រោះនៅតាមបណ្តាស្រុកនីមួយៗជាបន្តបន្ទាប់ផងដែរ ៕
ចែករំលែកព័តមាននេះ