រាជធានីភ្នំពេញ ៖ ជនសង្ស័យម្នាក់ពាក់ព័ន្ធទៅនឹងអំពើភ្ជង់ប្លន់ត្រូវបានកម្លាំងនគរបាលប៉ុស្តិ៍រដ្ឋបាលចាក់អង្រែក្រោមធ្វើការឃាត់ខ្លួនបាន ក្រោយធ្វើសកម្មភាពប្រើកូនកាំបិតភ្ជង់ប្លន់យកម៉ូតូ និងទ្រព្យសម្បត្តិមួយចំនួនពីនារីម្នាក់បានសម្រេច ដោយសុវត្ថិភាព កាលពីថ្ងៃទី២៩ ខែកក្កដា ឆ្នាំ២០១៨ កន្លងទៅ…
រាជធានីភ្នំពេញ ៖ ជនសង្ស័យម្នាក់ពាក់ព័ន្ធទៅនឹងអំពើភ្ជង់ប្លន់ត្រូវបានកម្លាំងនគរបាលប៉ុស្តិ៍រដ្ឋបាលចាក់អង្រែក្រោមធ្វើការឃាត់ខ្លួនបាន ក្រោយធ្វើសកម្មភាពប្រើកូនកាំបិតភ្ជង់ប្លន់យកម៉ូតូ និងទ្រព្យសម្បត្តិមួយចំនួនពីនារីម្នាក់បានសម្រេច ដោយសុវត្ថិភាព កាលពីថ្ងៃទី២៩ ខែកក្កដា ឆ្នាំ២០១៨ កន្លងទៅ ហើយត្រូវបានឃាត់ខ្លួនបាននៅរសៀលថ្ងៃទី១២ សីហា ឆ្នាំ២០១៨ នេះវិញ ។
ជនសង្ស័យមានឈ្មោះ ស៊ុ ភាន ហៅរ៉ា ហៅញ៉ា ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅផ្ទះលេខ២១ ផ្លូវលំ ក្រុមទី២១ ភូមិទួលរកា សង្កាត់ចាក់អង្រែក្រោម ខណ្ឌមានជ័យ ( មានផ្ទុកសារធាតុញៀន ) ។ ចំណែកជនរងគ្រោះមានឈ្មោះ ចាន់ ពិសី អាយុ២៧ឆ្នាំ មុខរបរជាងអ៊ុតសក់ នៅផ្សារតាខ្មៅថ្មី និងនារីជាម្ចាស់ម៉ូតូមានឈ្មោះ ឌី ស្រីនាង អាយុ២៧ឆ្នាំ មុខរបរកម្មការនីរោងចក្រ ស្នាក់នៅផ្ទះជួល ភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
ប្រភពព័ត៌មានឲ្យដឹងថា នៅវេលាម៉ោងយប់កើតហេតុថ្ងៃទី២៩ ខែកក្កដា នារីរងគ្រោះជាម្ចាស់ម៉ូតូបានហៅជនសង្ស័យខាងលើដែលត្រូវជាមិត្តភក្តិនឹងគ្នាទៅញាំអីលេង ស្ថិតតាមបណ្តោយផ្លូវជាតិលេខ២ ជាមួយមិត្តភក្តិមួយចំនួនផ្សេងទៀត ។ កំឡុងម៉ោងប្រមាណ១០យប់ថ្ងៃខែដដែល ជនសង្ស័យបានប្រាប់នារីជាម្ចាស់ម៉ូតូថា រូបគេដល់ម៉ោងត្រូវទៅផ្ទះវិញហើយ ។ ដោយពេលនោះនារីជាម្ចាស់ម៉ូតូបានពឹងមិត្តភក្តិស្រីម្នាក់ឈ្មោះ ឌី ស្រីនាង ឲ្យជួយជូនបុរសជាជនសង្ស័យទៅផ្ទះផង ដោយឲ្យម៉ូតូស្កុបពីរបស់នាង ពណ៌ក្រហម ពាក់ស្លាកលេខភ្នំពេញ 1FW-7441 ជិះជូនទៅ ។ លុះពេលជិះធ្វើដំណើរជូនដល់ចំណុចផ្លូវលំក្បែរស្រះត្រីដែលជាចំណុចផ្លូវស្ងាត់ជ្រងំនោះជនសង្ស័យបានប្រើកូនកាំបិតធ្វើសកម្មភាពភ្ជង់ប្លន់យកម៉ូតូ និងទ្រព្យសម្បត្តិមួយចំនួនពីនារីដែលជូនទៅផ្ទះបានសម្រេចដោយសុវត្ថិភាព ហើយជិះរត់គេចខ្លួនបាត់ស្រមោលសូន្យឈឹងតែម្តង ។ នៅយប់ថ្ងៃខែដដែលនារីរងគ្រោះទាំង២នាក់បានមកដាក់ពាក្យបណ្តឹងប្តឹងសមត្ថកិច្ចមូលដ្ឋាន និងបានប្រាប់ពីភិនភាគរបស់ជនសង្ស័យដល់សមត្ថកិច្ច ដើម្បីងាយស្រួលស្វែករកចាប់ខ្លួនយកមកផ្តន្ទាទោស ។
សូមបញ្ជាក់ថា ក្រោយពីភ្ជង់ប្លន់បានសម្រេចហើយនោះនៅវេលាម៉ោង៤ទាបភ្លឺឈានថ្ងៃទី៣០ ខែកក្កដា ជនសង្ស័យបានជិះម៉ូតូនារីរងគ្រោះយកទៅទុកចោលនៅមុខបន្ទប់ផ្ទះជួលរបស់នាងវិញ ហើយរត់គេចខ្លួនបាត់ស្រមោលតាំងពីពេលនោះតែម្តង ។ នាយប៉ុស្តិ៍រដ្ឋបាលនគរបាលចាក់អង្រែក្រោម លោកវុឌ្ឍ ផូសារ៉ាវ័ន្ត ឲ្យដឹងថា នៅរសៀលថ្ងៃទី១២ ខែសីហា ឆ្នាំ២០១៨ លោកបានដឹកនាំកម្លាំងមន្ត្រីក្រោមឱវាទចុះល្បាតនៅចំណុចតំបន់ស្មុគស្មាញនៅក្នុងមូលដ្ឋាន ដើម្បីការពារសន្តិសុខសុវត្ថិភាពជូនពលរដ្ឋ ។ លុះកំឡុងពេលល្បាតក៏ប្រទះឃើញជនសង្ស័យ៣នាក់ មើលទៅគួរឲ្យសង្ស័យកម្លាំងនគរបាលបានជិះម៉ូតូទៅក្បែរ ដើម្បីសួរនាំ ស្រាប់តែពេលឃើញនគរបាលភ្លាមពួកគេបានព្យាយាមរត់គេច តែកម្លាំងនគរបាលព្យាយាមដេញចាប់បានម្នាក់ ដើម្បីយកទៅសួរនាំ ។
បន្ទាប់ពីសាកសួរនាំយ៉ាងល្អិតល្អន់រួចមក ទើបបែកធ្លាយរឿងធ្លាប់ប្រើកូនកាំបិតភ្ជង់ប្លន់យកម៉ូតូ និងទ្រព្យសម្បត្តិកាលពីថ្ងៃទី២៩ កក្កដា កន្លងទៅតែម្តង ។ ក្រោយដឹងថា ជនសង្ស័យមានជាប់ពាក់ព័ន្ធទៅនឹងអំពើប្លន់ហើយនោះនគរបាលបានទាក់ទងទៅជនរងគ្រោះឲ្យមកមើលភិនភាគ ហើយនារីរងគ្រោះបានបញ្ជាក់ថា ពិតជារូបគេប្រាកដមែន ដែលបានធ្វើសកម្មភាពប្លន់ពួកនាង កាលពីយប់ថ្ងៃទី២៩ កន្លងទៅ ។ យ៉ាងណាមិញបច្ចុប្បន្នជនសង្ស័យត្រូវឃុំខ្លួនបណ្តោះអាសន្ននៅប៉ុស្តិ៍រដ្ឋបាលនគរបាលមូលដ្ឋានរង់ចាំកសាងសំណុំរឿងបញ្ចូនទៅតុលាការ ចាត់ការតាមនីតិវិធីច្បាប់ ។
ដោយឡែកទ្រព្យសម្បត្តិរបស់នារីរងគ្រោះដែលមានទូរស័ព្ទ២គ្រឿងរួមជាមួយកាបូបលុយ ត្រូវសមត្ថកិច្ចដកហូតពីជនសង្ស័យប្រគល់ជូនវិញផងដែរ ៕
ចែករំលែកព័តមាននេះ