ទីក្រុងសៀងហៃ ៖ គោលបំណងសំខាន់នៃសង្គ្រាមពាណិជ្ជកម្មរបស់លោកប្រធានាធិបតីអាមេរិក Donald Trump គឺដាក់សម្ពាធទៅលើក្រុងប៉េកាំង ឲ្យទិញរបស់អាមេរិក ។ ប៉ុន្តែសម្រាប់ការនាំចូលសាច់ពីអាមេរិកទៅប្រទេសចិន ដែលអាចផ្តល់ប្រាក់ដល់អាមេរិករាប់លានដុល្លារ…
ទីក្រុងសៀងហៃ ៖ គោលបំណងសំខាន់នៃសង្គ្រាមពាណិជ្ជកម្មរបស់លោកប្រធានាធិបតីអាមេរិក Donald Trump គឺដាក់សម្ពាធទៅលើក្រុងប៉េកាំង ឲ្យទិញរបស់អាមេរិក ។ ប៉ុន្តែសម្រាប់ការនាំចូលសាច់ពីអាមេរិកទៅប្រទេសចិន ដែលអាចផ្តល់ប្រាក់ដល់អាមេរិករាប់លានដុល្លារ គឺចិនបានគិតគូររកទិញសាច់ពីប្រភពផ្សេងវិញ ។
ការសងសឹករបស់ចិនទៅលើការដំឡើងពន្ធសាច់នាំចូលពីអាមេរិក គឺបានធ្វើឲ្យតម្លៃសាច់ជ្រូក និងសាច់គោរបស់អាមេរិកឡើងខ្ពស់កប់ពពក ដែលតម្រូវឲ្យអ្នកនាំចូលរបស់ចិនងាកទៅរកទិញពីអ្នកផ្គត់ផ្គង់ផ្សេងវិញ ។ គេរំពឹងថា ការធ្វើបែបនេះ នឹងកើតឡើងសម្រាប់វិស័យផ្សេងទៀតផងដែរ ។
លោកស្រី Zhang Lihui នាយកគ្រប់គ្រងក្រុមហ៊ុនសាច់អន្តរជាតិ PMI Foods បាននិយាយថា ៖« នៅពេលតម្លៃសាច់ពីអាមេរិក ឡើងថ្លៃខ្លាំងពេកបន្ទាប់ពីគិតពន្ធរួច យើងនឹងរកទិញពីប្រភពផ្សេងទៀតដូចជា ប្រទេសអូស្ត្រាលី។ យើងនឹងទិញបន្ថែមពីអាមេរិកខាងត្បូង និងទិញច្រើនលើសហ្នឹងបន្តិចពីកាណាដា។ ពេលនេះ ទីផ្សាររបស់ចិននឹងរកមើលអ្នកជំនួស» ។
លោកស្រីបន្តថា ការផ្លាស់ប្តូរគំរូពាណិជ្ជកម្មដែលបណ្តាលមកពីសង្គ្រាមពាណិជ្ជកម្មដំឡើងពន្ធ នឹងផ្តល់ប្រយោជន៍ដល់ប្រទេសផ្សេង ទៀត ហើយអ្នកខាតបង់ គឺអាមេរិកខ្លួនឯង ។
លទ្ធផលនៃសង្គ្រាមពាណិជ្ជកម្មដែលបានកើតឡើងលើគ្រប់វិស័យ គឺលំបាកទាយទុកមុន។ ប៉ុន្តែអ្នកវិភាគប្រាប់ថា ក្រុមហ៊ុនរកស៊ីនាំចេញនឹងបាត់បង់ដៃគូជំនួញមកពីចិនជាច្រើន ។
យោងតាមសហព័ន្ធនាំចេញសាច់សត្វសហរដ្ឋអាមេរិក គឺប្រហែល១០%នៃការនាំចេញសាច់គោ និងសាច់ជ្រូកទាំងអស់របស់សហរដ្ឋអាមេរិក ដែលពាក់ព័ន្ធនឹងប្រទេសចិនកាលពីខែមិថុនា ស្មើតម្លៃ១៤០លានដុល្លារ ។
លោក Julian Evans-Pritchard សេដ្ឋវិទូចិនផ្នែកសេដ្ឋកិច្ចមូលធននិយម បាននិយាយថា ប្រទេសចិនកំពុងតែរកការនាំចូលសំខាន់ៗ ពីប្រភពផ្សេងនៅក្នុងទីផ្សារពិភពលោក ដូចជា សាច់ សណ្តែកសៀង និងស្រូវសាឡី ។ លោកថា ៖«ការព្យាយាមធ្វើបាបម្ខាងទៀត ខណៈមិនធ្វើបាបខ្លួនឯង គឺជាគំនិតក្នុងការដាក់ពន្ធសង្គ្រាមពាណិជ្ជកម្ម ។ ខ្ញុំគិតថា សង្គ្រាមពាណិជ្ជកម្មនឹងធ្វើឲ្យមានការផ្លាស់ប្តូរប្រភព ដែលប្រទេសមួយធ្វើការនាំចូល » ៕
ចែករំលែកព័តមាននេះ