ទីក្រុងបែរឡាំង ៖ រដ្ឋមន្ត្រីសេដ្ឋកិច្ចប្រទេសអាល្លឺម៉ង់បានរិះគន់លោកប្រធានាធិបតីអាមេរិក ដូណាល់ ត្រាំ កាលពីថ្ងៃអាទិត្យ ទាក់ទងនឹងការដាក់ពន្ធលើការធ្វើពាណិជ្ជកម្ម និងការគ្រប់គ្រងអឺរ៉ុប ក្នុងការដោះស្រាយបញ្ហាជាមួយអ៊ីរ៉ង់ តាមរយៈការដាក់ទណ្ឌកម្មថ្មី។
ក្នុងបទសម្ភាសន៍មួយ លោក Peter Altmaier បានព្រមានពីផលប៉ះពាល់ដ៏ធ្ងន់ធ្ងរនៃសង្គ្រាមពាណិជ្ជកម្មរវាងសហរដ្ឋអាមេរិក និងប្រទេសចិន ។ លោកបានបង្ហាញក្តីបារម្ភពីការសម្រេចចិត្តរបស់លោកត្រាំ ក្នុងការដាក់ពន្ធលើប្រទេសតួកគីផងដែរ ។
លោក Altmaier បានថ្លែងថា ៖«សង្គ្រាមពាណិជ្ជកម្មនេះកំពុងតែអន់ថយ, ប៉ះពាល់ការលូតលាស់សេដ្ឋកិច្ច និងបង្កើតភាពមិនប្រាកដប្រជាថ្មីៗផងដែរ ។ អតីតកាលបង្ហាញថា អតិថិជនទទួលរងផលប៉ះពាល់ខ្លាំងជាងគេក្នុងសង្គ្រាមពាណិជ្ជកម្ម ព្រោះផលិតផលកាន់តែឡើងថ្លៃ » ។
គួរបញ្ជាក់ថា លោកប្រធានាធិបតីត្រាំ បានដាក់ពន្ធលើផលិតផលចិនប្រមាណ៣៤ប៊ីលានដុល្លារទៅហើយ និងលើផលិតផល១៦ប៊ីលានដុល្លារទៀត ដែលនឹងត្រូវអនុម័តនៅចុងខែនេះ។ លោកត្រាំ ក៏បានប្រកាសកាលពីថ្ងៃសុក្រថាលោកនឹងបង្កើនពន្ធលើដែកថែប និងអាលុយមីញ៉ូមនាំចូលពីប្រទេសតួកគីទ្វេដង ។
ទោះជាយ៉ាងណា លោក Altmaier គាំទ្រការអន់ថយនៃភាពតានតឹង បន្ទាប់ពីប្រធានគណៈកម្មការអឺរ៉ុប លោក Jean-Claude Juncker និងលោកត្រាំ បានព្រមព្រៀងថា នឹងបញ្ឈប់ការដាក់ពន្ធទៅវិញទៅមកជាបណ្តោះអាសន្ន ។
លោក Altmaier បានប្រាប់ថា ការព្រមព្រៀងនេះបានជួយដល់ការងាររាប់ពាន់កន្លែងនៅប្រទេសអាល្លឺម៉ង់និងអឺរ៉ុប ប៉ុន្តែវាគ្រាន់តែជាជំហានទី១ប៉ុណ្ណោះ ។ លោកថា ៖« យើងនៅតែត្រូវការការធ្វើពាណិជ្ជកម្មដែលដាក់ពន្ធទាប, ការការពារនិយមតិចជាងមុន និងមានទីផ្សារបើកទូលាយ » ។
ទាក់ទងនឹងការដាក់ទណ្ឌកម្មជាថ្មីលើប្រទេសអ៊ីរ៉ង់ លោក Altmaier បានបញ្ជាក់ពីសារសំខាន់នៃការរក្សាកិច្ចព្រមព្រៀងអាជីវកម្មអឺរ៉ុបនៅអ៊ីរ៉ង់បន្តទៀត ។ លោកថា ៖« យើងមិនអនុញ្ញាតឲ្យសហរដ្ឋអាមេរិកគ្រប់គ្រងទំនាក់ទំនងពាណិជ្ជកម្មរបស់យើងជាមួយប្រទេសផ្សេងទេ ។ ហេតុនេះ យើងគាំទ្រកិច្ចព្រមព្រៀងនុយក្លេអ៊ែរទីក្រុងវីយ៉ែន ដើម្បីការពារមិនឲ្យអ៊ីរ៉ង់ផលិតអាវុធបរមាណូ » ៕
ចែករំលែកព័តមាននេះ