ខេត្តព្រះសីហនុ ៖ បាតុភាពក្រុមជនជាតិចិន ដែលដើរចែកខិត្តប័ណ្ណផ្សព្វផ្សាយយីហោ និងម៉ាកស្រីស្រស់អាក្រាតកាយក្នុងចេតនាទាក់ទាញភ្ញៀវបុរសៗឱ្យទៅត្រេកត្រអាលរសជាតិផ្លូវភេទ ពិតជារឿងខុសច្បាប់ថ្មី មួយទៀត នៅខេត្តមាត់សមុទ្រខ្មែរ ស្របពេលដែលកំណើនជនជាតិចិនបានកើនឡើងពីមួយថ្ងៃទៅមួយថ្ងៃ ។ ការផ្សព្វផ្សាយខិតប័ណ្ណជាចំហនេះ បានធ្វើឱ្យប៉ះពាល់ដល់សង្គមខ្មែរយ៉ាងធ្ងន់ធ្ងរ ។ ទីបំផុត២ថ្ងៃក្រោយមក ក្រុមជនជាតិចិន៧នាក់ដែលដើរចែកខិត្តប័ណ្ណស្រីស្រស់សាច់សខ្ចីញ៉ិញត្រូវបានសមត្ថកិច្ចឃាត់ខ្លួន ។
លោកវរសេនីយ៍ទោ ភុល ភស្តា អធិការនគរបាលក្រុងព្រះសីហនុបានឱ្យដឹងថា ដោយអនុវត្តន៍តាមការណែនាំ និងបទបញ្ជាដ៏ម៉ឺងម៉ាត់របស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ដែលបានដាក់បទបញ្ជាឱ្យតាមស្រាវជ្រាវឃ្លាំមើលនិងបង្ក្រាបឱ្យបាន ជនជាតិចិនដែលប្រកបរបរខុសច្បាប់នៅកម្ពុជា ។ ដូចជាកន្លងមកមានការដើរផ្សព្វផ្សាយ ចែកខិត្តប័ណ្ណមានរូបភាពទាក់ទាញបង្កប់សេវាកម្មផ្លូវភេទបែបពេស្យាចារ ។
នៅយប់ថ្ងៃទី១២ ខែសីហា កន្លងទៅនេះ នគរបាលខេត្តបានសហការគ្នា ស្រាវជ្រាវឆ្មក់ចាប់បានជនជាតិចិន ដែលជាអ្នកដើរផ្សព្វផ្សាយចែកខិត្តប័ណ្ណបានចំនួន៧នាក់ និងដកហូតបានខិត្តប័ណ្ណជាច្រើនសន្លឹក ដែលមានរូបភាពខុសៗគ្នា មានគោលដៅតែមួយគឺរំលេចរូបស្រីស្អាតសាច់សខ្ចី ទាក់ទាញក្រុមបុរសយ៉ាងមានប្រសិទ្ធភាព ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តមានប្រសាសន៍ថា ពេលហៅអ្នកជំនាញមកធ្វើការបកប្រែភាសាចិនបានបង្ហាញពីខ្លឹមសារលើខិត្តប័ណ្ណទាំងនោះគឺមានន័យត្រឹមតែសេវាកម្មម៉ាស្សាប៉ុណ្ណោះ ប៉ុន្តែរូបភាព ពិតជាបានបង្កប់ទៅជាការផ្សព្វផ្សាយអាជីវកម្មផ្លូវភេទ ឬពេស្យាចារ ដែលជាអំពើខុសច្បាប់នៅប្រទេសកម្ពុជា ។
លោកឧត្តមសេនីយ៍ស្នងការបានបញ្ជាក់ថា បុរសជនជាតិចិនទាំង៧នាក់នោះ យើងបានធ្វើការអប់រំរួចឱ្យធ្វើកិច្ចសន្យាបញ្ឈប់សកម្មភាពផ្សព្វផ្សាយនេះទាំងស្រុង ពីព្រោះវាជាអំពើខុសច្បាប់នៅកម្ពុជា ។ មានការកត់សម្គាល់ថា បន្ទាប់ពីមានការផ្សព្វផ្សាយខិត្តប័ណ្ណស្រីស្រស់ដែលសរសេរជាភាសាចិន និងដាក់លេខទូរស័ព្ទទាក់ទងផងនោះបានធ្វើឱ្យមជ្ឈដ្ឋានជាតិ បង្ហាញនូវការមិនសប្បាយចិត្តដែលជនជាតិចិនថ្លើមធំ ហ៊ានធ្វើការផ្សព្វផ្សាយជាចំហបែបនេះ ។
ជាមួយនឹងការលេចចេញបាតុភាពនេះ អាជ្ញាធរខេត្តក៏កំពុងសិក្សាផ្លូវច្បាប់ ដើម្បីចាត់វិធានការ បើអ្នកដែលដើរចែកខិត្តប័ណ្ណនៅតាមបណ្តាទីតាំងកម្សាន្តនានា ខណៈអាជ្ញាធរទើបបានចាប់ខ្លួនជនជាតិចិនចំនួន៧នាក់ ដែលធ្វើសកម្មភាពចែកខិត្តប័ណ្ណកាលពីយប់ថ្ងៃ១២ សីហា ។ វិធានការរបស់អាជ្ញាធរបានធ្វើឡើង បន្ទាប់ពីមានការផ្សព្វផ្សាយជាសាធារណៈស្តីពីការចែកចាយខិត្តប័ណ្ណរកស៊ីផ្លូវភេទយ៉ាងកក្រើកកាលពីពេលថ្មីៗនេះ នៅខេត្តព្រះសីហនុ ។
ស្នងការនគរបាលខេត្តព្រះសីហនុ លោកឧត្ដមសេនីយ៍ទោ ជួន ណារិន្ទ បានអះអាងថា ករណីចែកខិត្តប័ណ្ណរកស៊ីផ្លូវភេទដោយជនជាតិចិននៅក្នុងខេត្តនេះ មិនមែនជារឿងថ្មីនោះទេ ព្រោះអាជ្ញាធរខេត្តព្រះសីហនុ ក៏ធ្លាប់ឃាត់ខ្លួនអ្នកដើរចែកខិត្តប័ណ្ណរបៀបនេះពីរដងរួចមកហើយកាលពីដើមឆ្នាំ២០១៨ ។ លោកស្នងការនគរបាលខេត្តដដែលបញ្ជាក់ថា កាលពី៦-៧ខែមុនអាជ្ញាធរក៏បានឃាត់ខ្លួន ជនជាតិចិនជាច្រើននាក់ ដែលធ្វើសកម្មភាពចែកខិត្តប័ណ្ណរកស៊ីផ្លូវភេទនេះយកទៅអប់រំ និងព្រមានកុំឱ្យប្រព្រឹត្តទង្វើនេះជាថ្មីទៀត ។
ចំពោះករណីដែលផ្ទុះឡើងថ្មី និងត្រូវបានគេបង្ហោះយ៉ាងព្រោងព្រាតតាមបណ្តាញសង្គមហ្វេសប៊ុក កាលពីសប្តាហ៍មុននេះត្រូវបានលោកឧត្ដមសេនីយ៍ទោ ជួន ណារិន្ទ គូសបញ្ជាក់ថា អាជ្ញាធរកំពុងសិក្សាផ្លូវច្បាប់ដើម្បីចាត់វិធានការលើបុគ្គលឬក្រុម ដែលនៅតែផ្គើនធ្វើសកម្មភាពចែកខិត្តប័ណ្ណរកស៊ីផ្លូវភេទ នៅតាមបឹងហ្គាឡូ ផ្ទះសំណាក់ សណ្ឋាគារ និងកន្លែងកម្សាន្តនានាជាដើម ព្រោះទង្វើបែបនេះធ្វើឱ្យប៉ះពាល់ដល់ប្រពៃណី វប្បធម៌និងកិត្តិយសខេត្តទេសចរណ៍ដ៏មានសក្តានុពលមួយនេះ ។
កាលពីយប់ថ្ងៃអាទិត្យ ទី១២ សីហា កម្លាំងសមត្ថកិច្ចបានឃាត់ខ្លួនជនជាតិចិន៧នាក់ដែលប៉ុនប៉ងសៀតខិត្តប័ណ្ណនៅតាមទ្វាររថយន្តនិងបន្ទប់ផ្ទះសំណាក់ជាដើម ។ ព្រមជាមួយគ្នានេះ លោកឧត្តមសេនីយ៍ទោ ជួន ណារិន្ទ ក៏បានអំពាវនាវដល់មន្ត្រីវប្បធម៌ និងទេសចរណ៍ខេត្ត អ្នកពាក់ព័ន្ធទាំងអស់ ដែលឃើញអ្នកចែកចាយខិត្តប័ណ្ណបែបនេះឱ្យជូនដំណឹងដល់សមត្ថកិច្ចភ្លាម ។
សូមបញ្ជាក់ថា ខិត្តប័ណ្ណដែលមានការទាក់ទាញភ្ញៀវបុរសៗក្នុងការរកសេវាផ្លូវភេទ ត្រូវបានគេចែកចាយជាសាធារណៈកាលពីសប្តាហ៍មុន ដែលក្នុងខិត្តប័ណ្ណតូចៗប៉ុននាមប័ណ្ណនោះមានដាក់រូបភាពស្ត្រីចិនអាក្រាតកាយសរសេរអក្សរចិននិងលេខទូរស័ព្ទទំនាក់ទំនងផងដែរ ។កំណើនជនបរទេសដែលភាគច្រើនជាជនជាតិចិនក្នុងខេត្តមានសក្តានុពលមួយនេះ កំពុងធ្វើឱ្យមានផលប៉ះពាល់ដល់សង្គមកម្ពុជា តាមរយៈការធ្វើសកម្មភាពខុសច្បាប់នានា ។ យ៉ាងណាក៏ដោយស្ថានទូតចិនប្រចាំកម្ពុជា ធ្លាប់បានបញ្ជាក់ពីជំហរបស់ខ្លួនរួចហើយថា ស្ថានទូតប្រឆាំងដាច់ខាតចំពោះជនជាតិចិនមួយចំនួនតូចនៅកម្ពុជា ដែលបានប្រពឹត្តិអំពើល្មើសច្បាប់ធ្វើឱ្យប៉ះពាល់មុខមាត់ប្រជាជនចិនទាំងមូល ។
ស្ថានទូតចិនប្រចាំនៅកម្ពុជាក៏បានស្នើឱ្យស្ថាប័នអនុវត្តន៍ច្បាប់នៅកម្ពុជា ចាត់វិធានការតឹងរឹងចំពោះប្រជាជនចិនដែលប្រព្រឹត្តិបទល្មើសទាំងនោះនិងអំពាវនាវឱ្យប្រជាជនចិនទាំងឡាយដែលមកកម្ពុជាត្រូវរក្សាភាពត្រឹមត្រូវ ស្អាតបាតនិងចៀសវាងពីល្បែងស៊ីសង ៕
ចែករំលែកព័តមាននេះ