ខេត្តកំពង់ចាម ៖ ចាប់តាំងពីទឹកទន្លេមេគង្គហក់ឡើងមកជន់លិចភូមិឋាននានាជាប់ដងទន្លេបណ្តា
លឲ្យស្លាប់ដោយលង់ទឹកកើនដល់១០នាក់ រងគ្រោះដោយពស់ចឹក ទិចឬខាំចំនួន២៧នាក់ ពលរដ្ឋជម្លៀសមកកាន់ទីទួលសុវត្ថិភាពចំនួន៧០៥គ្រួសារ ស្មើនឹង២.៣៦៨នាក់ ប៉ះពាល់ដំណាំស្រូវ ចំនួន៦.១៩៦ហិកតា។ នៅព្រឹកថ្ងៃទី១៣ សីហា ២០១៨ លំនៅឋានរបស់ប្រជាពលរដ្ឋ០១ខ្នង ដែលច្រាំងបាក់ជិតដល់ក្នុងភូមិកោះគល់ ឃុំកោះរកា ស្រុកកំពង់សៀម ត្រូវបានកម្លាំងចំរុះជួយរុះរើផងដែរ។ព្រះភិក្ខុ សេង រដ្ឋា ចៅអធិការវត្តនគរបាជ័យក្រៅ មានថេរដីកាឲ្យដឹងថា៖
ផ្ទះរបស់ពលរដ្ឋឈ្មោះ នៅ មាន និងប្រពន្ធឈ្មោះ កូយ ខុម សង់អំពីឈើប្រក់ស័ង្កសី ទំហំ៥គុណ៦ម៉ែត្រ នៅភូមិកោះគល់ រយៈពេកន្លងទៅនេះទឹកទន្លេមេគង្គ បានឡើងមកជន់លិច ស្របពេលដែកទឹកស្រកទៅវិញច្រាំងបានបាក់កល់នឹងដល់ផ្ទះ ហើយខ្លាចគ្រោះថ្នាក់កើតឡើង ជាយថាហេតុទៀតផង។ ចៅអធិការវត្តនគរបាជ័យក្រៅ មានថេរដីកាបន្តថា ដោយមានការណែនាំពីលោកអភិបាលខេត្តនោះលោក ប៊ិន ឡាដា អភិបាលស្រុកកំពង់សៀម កម្លាំងនគរបាលស្រុក អាវុធហត្ថស្រុក សឹករងស្រុកកម្លាំងស.ស.យ.ក.ស្រុក ជាច្រើននាក់បាននាំគ្នាមកជួយរុះរើផ្ទះនេះ ដើម្បីយកទៅធ្វើនៅកន្លែងផ្សេងឆ្ងាយពីច្រាំងទន្លេមេគង្គ ដើម្បីចៀសវាងការពារកុំឲ្យមានគ្រោះថ្នាក់។
ជាមួយនោះថែមទាំងបានជួយឧបត្ថម្ភអំណោយក្នុងនោះមាន អង្ករ៥០គីឡូក្រាម មី១កេស ទឹកត្រី១យួរ ទឹកស៊ីអ៊ីវ១យួរ និងបច្ច័យចំនួន៣០ម៉ឺនរៀលផងដែរ។ ហើយម្ចាស់ផ្ទះមានក្តីរំភើបសប្បាយរីករាយ ដោយបានកងកម្លាំងចម្រុះនាំគ្នាជួយរុះផ្ទះរបស់គាត់ទាន់ពេលវេលា ប្រសិនណាបើបណ្តោយតែបន្តិចទៀតអាចនឹងត្រូវបាក់ធ្លាក់ចូលទៅក្នុងទឹកទន្លេមេគង្គខាតបង់កាន់តែធ្ងន់ធ្ងរថែមទៀត។
លោកវេជ្ជបណ្ឌិត គីម សួរភិរុណ ប្រធានមន្ទីរសុខាភិបាលខេត្តវិញមានប្រសាសន៍ឲ្យដឹងដែរថា មន្ទីរសុខាភិបាលខេត្តបានរៀបចំនូវលក្ខណៈសម្បត្តិ ក្នុងនោះមានទាំងឱសថទាំងសម្ភារ បរិក្ខាពេទ្យ ទាំងផ្លូវគោក និងផ្លូវទឹកទៅតាមការណែនាំ របស់រដ្ឋមន្ត្រីក្រសួង សុខាភិបាលក៏ដូចជាលោកអភិបាលខេត្ត ហើយមណ្ឌលសុខភាពត្រូវមានមន្ត្រីនៅប្រចាំការ២៤ម៉ោង ដើម្បីងាយស្រួលជួយសង្គ្រោះដល់ពលរដ្ឋដែលរងគ្រោះដោយទឹកជំនន់ ងាយមករកសេវាពេទ្យឬសង្គ្រោះ ដោយជំងឺណាមួយ។
ក្នុងនោះពលរដ្ឋដែលរងគ្រោះដោយពស់ចឹក និងសត្វអរសិពិសខាំ មានចំនួន២៧នាក់ ត្រូវបានព្យាបាលជាវិលត្រឡប់ទៅផ្ទះវិញ។ នៅតាមទីទួលសុវត្ថិភាពមានមន្ត្រីសុខាភិបាល នៅប្រចាំការ និងបានណែនាំពលរដ្ឋឲ្យ«ផឹកស្អាត ហូតស្អាត រស់នៅស្អាត»ផងដែរ៕
ចែករំលែកព័តមាននេះ