រាជធានីភ្នំពេញ ៖ ឯកអគ្គរដ្ឋទូតសារធារណៈរដ្ឋឥណ្ឌូនេស៊ីប្រចាំកម្ពុជា បានវាយតម្លៃខ្ពស់ ចំពោះការរៀបចំការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ នៅកម្ពុជា បង្ហាញឲ្យឃើញពីសកម្មភាព នៃការរៀបចំប្រព្រឹត្តិទៅប្រកបដោយសន្តិសុខ សុវត្ថិភាពបានយ៉ាងល្អ…
រាជធានីភ្នំពេញ ៖ ឯកអគ្គរដ្ឋទូតសារធារណៈរដ្ឋឥណ្ឌូនេស៊ីប្រចាំកម្ពុជា បានវាយតម្លៃខ្ពស់ ចំពោះការរៀបចំការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ នៅកម្ពុជា បង្ហាញឲ្យឃើញពីសកម្មភាព នៃការរៀបចំប្រព្រឹត្តិទៅប្រកបដោយសន្តិសុខ សុវត្ថិភាពបានយ៉ាងល្អ ជូនប្រជាពលរដ្ឋម្ចាស់ឆ្នោត។ ក្នុងជំនួបពិភាក្សាការងារ និងសម្តែងការគួរសមជាមួយ ថ្នាក់ដឹកនាំសាលារាជធានីកាលពីព្រឹកថ្ងៃទី១៣ សីហា លោក ស៊ូឌីម៉ាន់ ហាសេន ឯកអគ្គរដ្ឋទូតសារធារណៈរដ្ឋឥណ្ឌូនេស៊ីប្រចាំកម្ពុជា បានសម្តែងកោតសរសើរ វាយតម្លៃខ្ពស់ ចំពោះការរៀបចំការបោះឆ្នោតនៅកម្ពុជា ពិតជាបង្ហាញឲ្យឃើញយ៉ាងច្បាស់ ពីសកម្មភាពប្រព្រឹត្ត ទៅប្រកបដោយសន្តិសុខ សុវត្ថិភាពបានយ៉ាងល្អជូនម្ចាស់ឆ្នោត។
លោកបញ្ជាក់ពីស្ថានភាពបោះឆ្នោត នេះ ពិតជាប្រព្រឹត្តទៅប្រកបដោយរលូន ត្រឹមត្រូវ សេរី និងយុត្តិធម៌ ជូនប្រជាពលរដ្ឋ ស្របពេលដែល លោកបានមកបំពេញបេសកម្មការទូតនៅកម្ពុជា។ លោកបន្តថា ឥណ្ឌូនេស៊ីនឹងបន្តទំនាក់ទំនង កិច្ចសហប្រតិបត្តិការ ការរទូតពិសេសបន្តជំរុញឲ្យមានការមកបណ្តាក់ទុនវិនិយោគ និងធ្វើទេសចរណ៍ ឲ្យកាន់តែច្រើនថែមទៀត រវាងប្រទេសទាំងពីរកម្ពុជា-ឥណ្ឌូនេស៊ី។ ជាការឆ្លើយតប លោក ឃួង ស្រេង អភិបាលរាជធានីភ្នំពេញ បានសារទរចំពោះការគាំទ្រ និងកោតសរសើរ ចំពោះឯកអគ្គរដ្ឋទូត សារធារណៈរដ្ឋឥណ្ឌូនេស៊ីប្រចាំកម្ពុជា និងបានជម្រាបជូនឯកអគ្គរដ្ឋទូត ពីការរីកចម្រើន របស់រាជធានីភ្នំពេញ ជាមួយនឹងការកើនឡើងនៃកំណើនសេដ្ឋកិច្ចយ៉ាងឆាប់រហ័ស តាមរយៈការ មកបណ្តាក់ទុនវិនិយោគ និងការកសាងហេដ្ឋារចនាសម្ព័ន្ធនានាពីមួយឆ្នាំទៅមួយឆ្នាំ។
ក្រៅពីនេះ ក៏មានកំណើនប្រជាជន មករស់នៅក្នុងរាជធានីភ្នំពេញ បានកើនឡើង បច្ចុប្បន្នមានប្រមាណជិត ៣លាននាក់ កំពុងរស់នៅ និងប្រកបមុខរបររកស៊ី។ លោកអភិបាលបញ្ជាក់ថា ទាក់ទង និងការរីកចម្រើននេះ ក៏នៅមានបញ្ហាប្រឈមមួយចំនួនផងដែរ ដែលបាន និងកំពុងជួបប្រទះដូចជា បញ្ហាកកស្ទះចរាចរណ៍ បញ្ហាសំរាម និងបញ្ហាបរិស្ថាន ដែលតម្រូវឲ្យមានការដោះស្រាយ។ លោក បានលើកឡើងពីភាពជោគជ័យ ពីការបោះឆ្នោតកន្លងទៅនេះ ជម្រាបជូនឯកអគ្គរដ្ឋទូត ដោយមិនបានបង្កភាពភ័យខ្លាច ដល់ប្រជាពលរដ្ឋ ចំពោះការរស់នៅ ក៏ដូចជាការប្រកបអាជីវកម្មផ្សេងៗ នោះឡើយ ដែលវាខុសពីបោះឆ្នោតជ្រើសតាំងតំណាងរាស្ត្រ នីតិកាលទី៥ ឆ្នាំ២០១៣។
នេះគឺបានកើតចេញពីការខិតខំប្រឹងប្រែង របស់ប្រមុខរាជរដ្ឋាភិបាលកម្ពុជាដែលមានសម្តេច អគ្គមហាសេនាបតីតេជោ ហ៊ុន សែន ជានាយរដ្ឋមន្ត្រី បានខិតខំ ដើម្បី បំរើប្រជាជន និងប្រទេសជាតិយ៉ាងពិតប្រាកដ។ សូមបញ្ជាក់ថា នៅថ្ងៃទី១៧ ដល់ថ្ងៃទី២០ កញ្ញា ឆ្នាំ២០១៨ ខាងមុខនេះ ឥណ្ឌូនេស៊ី និងកម្ពុជានឹងសហការគ្នារៀបចំពិព័រណ៍ពាណិជ្ជកម្ម ទេសចរណ៍នៅមជ្ឈ មណ្ឌល់ពិព័រណ៍ និងសន្និបាទកោះពេជ្រ ដោយមានជាង១០០ក្រុមហ៊ុន មកដាក់តាំងបង្ហាញនូវផលិតផលរបស់ខ្លួន៕
ចែករំលែកព័តមាននេះ