ប្រទេសកាហ្សាក់ស្ថាន ៖ ក្រោយការចរចាគ្នាតឹងតែងរយៈពេលដល់ជាង២០ឆ្នាំ ទីបំផុតប្រទេសរុស្ស៊ី អ៊ីរ៉ង់ កាហ្សាក់ស្ថាន អាស៊ែបៃហ្សង់ និងតួកម៉េនីស្ថាន បានចុះហត្ថលេខាកាលពីថ្ងៃទី១២ សីហា លើកិច្ចព្រមព្រៀងជាប្រវត្តិសាស្ត្រមួយដែលកំណត់លក្ខន្តិកៈរបស់សមុទ្រកាស្ពីយែន។
ជួបប្រជុំគ្នានៅទីក្រុងអាក់តាអ៊ូ កាហ្សាក់ស្ថានប្រទេសទាំង៥នោះ ស្ថិតនៅជាប់សមុទ្រកាស្ពីយែន បានព្រមព្រៀងគ្នាលើលក្ខន្តិកៈសមុទ្រនេះ ខណៈពុំទាន់មានច្បាប់ណាមួយនៅឡើយ ក្រោយការរំលាយសហភាពសូវៀត ដោយមុនការរំលាយនេះលើកលែងតែអ៊ីរ៉ង់មួយចេញ ប្រទេស៤ទៀតស្ថិតក្នុងសហភាពសូវៀតជាមួយគ្នា។
ប្រធានាធិបតីកាហ្សាក់ស្ថានលោក NOURSOULTAN NAZARBAIEV បានសម្ដែងការអបអរ ហើយលោកមានប្រសាសន៍ថា យើងអាចនិយាយបានថា កុងសង់ស៊ុសមួយស្ដីពីលក្ខន្តិកៈសមុទ្រកាស្ពីយែន ពិតជាពិបាកសម្រេចបានណាស់ ហើយត្រូវប្រើពេលវេលាចរចាយូរ ដែលមានរយៈពេលដល់ទៅ២០ឆ្នាំ ហើយចាំបាច់ត្រូវមានការខិតខំប្រឹងប្រឹងរួមរបស់បណ្ដាភាគីដែលទាក់ទិន។
ចំណែកប្រធានាធិបតីរុស្ស៊ីលោកវ្ល៉ាឌីមៀរពូទីន លើកឡើងពីសារសំខាន់នៃកិច្ចព្រមព្រៀងនោះ ហើយស្នើឲ្យមានកិច្ចសហប្រតិបត្តិការយោធាកាន់តែធំ រវាងបណ្ដាប្រទេសជាប់សមុទ្រកាស្ពីយែន ដើម្បីធានាសន្តិភាពក្នុងតំបន់។
យោងតាមប្រធានាធិបតីកាហ្សាក់ស្ថានថា បណ្ដាចំណុចសំខាន់នៃកិច្ចព្រមព្រៀងនោះទាក់ទិនដល់ការអនុញ្ញាតកសាងបំពង់បង្ហូរប្រេង ឬញុឧស្ម័នកាត់បាតសមុទ្រ កូតានេសាទកំណត់ដោយប្រទេសនីមួយៗ និងការហាមឃាត់រាល់វត្តមានយោធារបស់ប្រទេសទី៣ណាមួយក្នុងសមុទ្រកាស្ពីយែន។
ចំណែកប្រធានាធិបតីអ៊ីរ៉ង់លោកហាសាន់ រ៉ូហានីវិញ បានសម្ដែងការអបអរសាទរភ្លាមៗថា សមុទ្រកាស្ពីយែនជារបស់បណ្ដាប្រទេសជាប់សមុទ្រនេះ។
កិច្ចព្រមព្រៀងនោះត្រូវបានចុះហត្ថលេខានាថ្ងៃទី១២ សីហា បន្ទាប់ពីកិច្ចប្រជុំរបស់រដ្ឋមន្ត្រីការបរទេសនៃប្រទេសទាំង៥ កាលពីថ្ងៃទី១១ សីហា។ វាអាចជួយសម្រាលភាពតានតឹងដែលមានចាប់តាំងពីយូរមកហើយក្នុងតំបន់។ ក្នុងសមុទ្រនេះសម្បូរដោយប្រេងកាត និងឧស្ម័នដោយគេប៉ាន់ប្រមាណថា មានប្រេងកាតដល់ទៅជិត៥០ពាន់លានធុង និងឧស្ម័នដល់ទៅជិត៣០០.០០០ពាន់លានម៉ែត្រគូប។
យោងតាមលោកពូទីនថា កិច្ចព្រមព្រៀងនេះចាត់ទុកផ្នែកយ៉ាងធំនៃសមុទ្រកាស្ពីយែន ជាតំបន់រួមតែបែងចែកគ្នារវាងប្រទេសទាំង៥ បណ្ដាធនធានសមុទ្រនិងធនធានបាតសមុទ្រ៕
ចែករំលែកព័តមាននេះ