ខេត្តបាត់ដំបង ៖ ជនសង្ស័យចំនួន២នាក់ដែលជាប់ពាក់ព័ន្ធនឹងករណីកាច់សោ.កលួចយក ម៉ូតូនៅស្រុកសំពៅលូន ខេត្តបាត់ដំបង កាលពីខែមិថុនាកន្លងទៅថ្មីៗនេះត្រូវកម្លាំងជំនាញ នៃស្នងការដ្ឋានខេត្តធ្វើការស្រាវជ្រាវ និងតាមចាប់ខ្លួនបានដល់ស្រុកស្វាយលើ ខេត្តសៀមរាប កាលពី១២ សីហានេះ ដែលមានកិច្ចសហការពីកម្លាំងជំនាញនៃស្នងការខេត្តនេះផង ។
លោកឈឿង គឹមសុង នារងការិយាល័យព្រហ្មទណ្ឌកំរិតស្រាល និងជាប្រធានក្រុម កម្លាំងបង្ការបង្ក្រាបនៃស្នងការខេត្តបានឲ្យដឹងថា ជនសង្ស័យទាំង២នាក់ដែលកម្លាំង របស់លោកតាមឃាត់ខ្លួនបាននេះម្នាក់ឈ្មោះ ឆាយ រាជ អាយុ២៤ឆ្នាំ នៅភូមិអូរគ្រួស ឃុំសិរីមានជ័យ ស្រុកសំពៅលូន ខេត្តបាត់ដំបង និងម្នាក់ទៀតឈ្មោះ ចិន វ៉ាត អាយុ៤១ឆ្នាំ នៅភូមិចំរេះ ឃុំស្វាយលើ ស្រុកស្វាយលើ ខេត្តសៀមរាប ។
លោកបានប្រាប់ថា ជនទាំង២នាក់បានសង្ស័យថា មានជាប់ពាក់ព័ន្ធនឹងករណីបំពុលឆ្កែ លួចយកម៉ូតូមួយគ្រឿងនៅក្នុងភូមិអូរគ្រួស ឃុំសិរីមានជ័យ ស្រុកសំពៅលូននៅពេលយប់ ក្នុងអំឡុងខែមិថុនាកន្លងទៅថ្មីៗនេះ ។
ក្រោយពីលួចបានពួកគេបានជិះគេចទៅសម្ងំលាក់ខ្លួននៅក្នុងស្រុកស្វាយលើ ខេត្តសៀមរាប លុះមន្ត្រីជំនាញក្ដាប់បាននៅមុខសញ្ញានេះទើបលោកស្នងការខេត្តបញ្ជាឲ្យកម្លាំងជំនាញ សុំកិច្ចសហការជាមួយកម្លាំងជំនាញស្រុកស្វាយលើ ដើម្បីឃាត់ខ្លួនជនសង្ស័យទាំង២នាក់ តែម្ដង រួមទាំងដកហូតបាននូវវត្ថុតាងមួយចំនួនផងដែរ ។
បន្ទាប់ពីត្រូវឃាត់ខ្លួនជនសង្ស័យទាំង២នាក់បានសារភាពថា ពួកខ្លួនពិតជាបានប្រព្រឹត្តនូវ អំពើទុច្ចរិតនេះមែន ។ ពួកគេបានឆ្លើយថា ខ្លួនមិនបានចាំថ្ងៃធ្វើសកម្មភាពទេ តែបានប្រព្រឹត្ត នៅវេលារំលងអធ្រាត្រក្នុងអំឡុងខែមិថុនា ។ ពេលធ្វើសកម្មភាពពួកខ្លួនបានយកសាច់គោ ប្រឡាក់ជាមួយថ្នាំពុលបោះឲ្យឆ្កែស៊ី លុះប៉ុន្មាននាទីក្រោយដឹងថា ឆ្កែងាប់ និងខណៈម្ចាស់ ផ្ទះកំពុងដេកលក់ពួកខ្លួនលបចូលធ្វើសកម្មភាពកាច់សោ.កលួចយកម៉ូតូដែលទុកនៅក្បែរ សំយាបផ្ទះតែម្ដង ។
ជនទុច្ចរិតទាំង២នាក់នេះបានបញ្ជាក់ប្រាប់សមត្ថកិច្ចថា ក្រោយពីលួចម៉ូតូបានពួកខ្លួនក៏បាន ជិះគេចទៅសម្ងំលាក់ខ្លួននៅស្រុកស្វាយលើខេត្តសៀមរាបរហូតដល់ថ្ងៃសមត្ថកិច្ចចាប់ ខ្លួនបាន ។ ជាមួយនឹងការចាប់ខ្លួនជនដៃដល់ខាងលើនេះ បើតាមរបាយការណ៍របស់កម្លាំង ស្នងការខេត្តបានឲ្យដឹងថា កម្លាំងជំនាញបានដកហូតបាននូវវត្ថុតាងមួយចំនួនមាន ដែកឆ្នៃសម្រាប់កាច់សោម៉ូតូ០១ទូណឺវីសចំនួន០៣ ដង្កាប់ចំនួន០១ កូនសោសម្រាប់ដោះម៉ូតូ ចំនួន០៥ និងម៉ូតូ១គ្រឿងម៉ាកហុងដាឌ្រីម ពណ៌ខ្មៅ សេរីឆ្នាំ២០១៨ ពាក់ស្លាកលេខបាត់ដំបង 1AD-1372 ។ ពេលនេះកម្លាំងការិយាល័យជំនាញកំពុងសួរនាំ ដើម្បីកសាងសំណុំរឿង បញ្ជូនពួកគេទៅកាន់តុលាការ ដើម្បីចាត់ការតាមនីតិវិធី ។
សូមបញ្ជាក់ដែរថា បើតាមប្រភពពីសមត្ថកិច្ចនៅក្នុងខេត្តបាត់ដំបង បច្ចុប្បន្ន អំពើចោរកម្ម គ្រប់ប្រភេទហាក់កំពុងផ្ទុះឡើងយ៉ាងខ្លាំងមិនថា នៅក្នុងក្រុង ឬនៅតាមបណ្ដាស្រុកនានា នោះឡើយ ដែលសកម្មភាពហាក់ដូចជា សញ្ញាអាសន្នមួយគួរឲ្យព្រួយបារម្ភបំផុតអំពីបញ្ហាអសន្តិសុខនៅក្នុងមូលដ្ឋាន ។ បើតាមការកត់សម្គាល់បទល្មើសដែលកំពុងកើតមានយ៉ាង កក្រើកសព្វថ្ងៃនេះ គឺបទល្មើស «ចោរកាច់សោ.កលួចម៉ូតូ ចោរឆក់ និងពួកចោរគាស់ទម្លុះ ទំលាយលំនៅឋាន» ខណៈបទល្មើសគ្រឿងញៀនហាក់កំពុងប្រណាំងប្រជែងយ៉ាងខ្លាំង ក្លាគ្រប់ទីកន្លែងផងដែរ បើទោះជាសមត្ថកិច្ចធ្លាប់បង្ក្រាបបានខ្លះៗក្តី ។
ប៉ុន្មានខែចុងក្រោយនេះគេសង្កេតឃើញសកម្មភាពរបស់ក្រុមចោរកាច់សោរលួចម៉ូតូ ហាក់ធ្វើសកម្មភាពខ្លាំងនៅតាមបណ្ដាស្រុកមួយចំនួនមិនថា នៅតាមទីជនបទ ឬនៅកណ្ដាលទីប្រជុំជនឡើយ ។ រីឯការទប់ស្កាត់ ឬការបង្ក្រាបវិញកម្លាំងជំនាញ នៅតាមបណ្ដាស្រុកដែលមានបទល្មើសទាំងនោះហាក់នៅ«ទ្រឹង» គ្មានសកម្មភាព អ្វីទាំងអស់ក្នុងការតាមដានស្រាវជ្រាវរកមុខសញ្ញាជនដៃដល់ដែលគេមើលឃើញថា គឺត្រូវពឹងផ្អែកជំនួយទាំងស្រុងពីកម្លាំងជំនាញរបស់ស្នងការខេត្ត ។
បើតាមប្រភពពីមន្ត្រីស្នងការខេត្តបានទម្លាយឲ្យដឹងថា នៅក្នុងកិច្ចប្រជុំប្រចាំខែកន្លង ទៅថ្មីៗនេះ លោកអធិការតាមបណ្ដាស្រុកមួយចំនួនបានរងការស្ដីបន្ទោសឡើងស្ពឹកមុខ ពីសំណាក់លោកស្នងការខេត្តអំពី«ភាពអសកម្ម គ្មានលទ្ធភាពទប់ស្កាត់ ការបង្ក្រាបបទល្មើស ឬតាមស្រាវជ្រាវរកមុខសញ្ញាជនសង្ស័យ» ។ ប្រភពដដែលបានទម្លាយឲ្យដឹងទៀតថា លោកអធិការដែលឈ្ងោកមុខងើបមិនរួចខ្លាំងជាងគេ គឺលោកអធិការស្រុកមោងឬស្សី និងលោកអធិការស្រុកបាណន់តែម្ដងដែលស្ទើរតែគ្មានរបាយការណ៍ស៊ើបអង្កេតទាល់តែសោះ ពេលឡើងប្រជុំប្រចាំខែម្ដងៗ ។ ជាពិសេសលោកអធិការស្រុកបាណន់ ដែលស្រុកនេះហាក់កំពុងលេចធ្លោជាងគេនូវបទល្មើស«កាច់សោ.កលួចម៉ូតូ» តែមិនដែលបង្ក្រាបបានម្ដងណាឡើយ រីឯវិធានការទប់ស្កាត់ក៏«សេរ៉ូ»ដែរ ៕
ចែករំលែកព័តមាននេះ