រាជធានីភ្នំពេញ ៖ ក្មេងប្រុសជំទង់មា្នក់ត្រូវប្រធានសមាគមជនឥតទីពឹង ឬហៅថាសមាគមមែកឈើចាប់ខ្លួនប្រគល់ទៅឱ្យប៉ូលិសប៉ុស្តិ៍កំបូលពីបទលួចលុយរបស់ជនជាតិបរទេសចំនួន៤.០០០ដុល្លារ ព្រមទាំងទូរស័ព្ទដៃ និងសំភារផ្សេងៗមួយចំនួនទៀត។
ការឃាត់ខ្លួនក្មេងប្រុសជំទង់នោះកាលពីវេលាម៉ោង៧ព្រឹក ថ្ងៃទី១៣ ខែមីនា ឆ្នាំ២០១១ នៅក្នុងសមាគមស្ថិតនៅក្នុងភូមិលិចវត្ត សង្កាត់កំបូល ខណ្ឌដង្កោ រាជធានីភ្នំពេញ។ ក្មេងប្រុសជំទង់រូបនោះឈ្មោះសំ តុលា អាយុ១៦ឆ្នាំ ជាក្មេងកំព្រាស្នាក់នៅក្នុងសមាគមជនឥតទីពឹង និងមានស្រុកកំណើតក្នុងភូមិកោះដាច់ សង្កាត់កោះដាច់ ខណ្ឌឫស្សីកែវ រាជធានីភ្នំពេញ។ ចំណែកឯជនរងគ្រោះឈ្មោះជែម ភេទប្រុស អាយុប្រហែលជាង៣០ឆ្នាំ ជាជនជាតិសិង្ហបុរីបាត់លុយចំនួន៤.០០០ដុល្លារ ទូរស័ព្ទដៃ៣គ្រឿង ព្រមទាំងសំភារជាច្រើនទៀត។
តាមប្រភពព័ត៌មានឱ្យដឹងថា បុរសជនជាតិសិង្ហបុរីនោះបានស្នាក់នៅក្នុងសមាគមដើម្បីត្រៀមធ្វើផ្ទះ ធ្វើអគារឱ្យសមាគមជនឥតទីពឹង ហើយតាមគំរោងគឺស្នាក់នៅទីនោះរយៈពេល១០ថ្ងៃទៀត។ ដោយឡែកនៅវេលាយប់ថ្ងៃទី១២ មីនា ខណៈបុរសសិង្ហបុរីដេកលង់លក់នៅក្នុងសមាគមហើយពុំដឹងថាបិទទ្វារខ្ទាស់គន្លឹះ ឬអត់ទេក៏ត្រូវក្មេងប្រុសជំទង់នោះចូលទៅលួចយកកាបូបលុយ និងសំភារអស់គ្មានសល់។ លុះព្រឹកឡើងដឹងបាត់ក៏មានការភ្ញាក់ផ្អើល ហើយពុំមាននរណាដឹងថា ក្មេងប្រុសជំទង់នោះគឺជាអ្នកលួចឡើយ ។
ប្រធានសមាគមបានប្រមូលក្មេងៗ និងអ្នកនៅក្នុងសមាគមទាំងអស់ទៅជួបជុំគ្នាសួរនាំ និងពិនិត្យមើលទឹកមុខ ។ ដោយសារក្មេងប្រុសជំទង់នោះធ្លាប់លួចទូរស័ព្ទនៅក្នុងសមាគមរូបគេមានទឹកមុខខុសពីគេឯង ទើបត្រូវប្រធានសមាគមឃាត់ខ្លួនប្រគល់ឱ្យប៉ូលិសតែម្តង។
មន្ត្រីប៉ូលិសឱ្យដឹងថា ក្រោយពេលឃាត់ខ្លួនក្មេងប្រុសនោះសារភាពពីកំហុសរបស់គេ។ គេឆ្លើយថា ក្នុងចំណោមលុយ៤.០០០ដុល្លារនោះគេចាយអស់ចំនួន១.០០០ដុល្លារហើយ ឯលុយ៣.០០០ដុល្លារទៀតរូបគេយកទៅលាក់ទុកក្នុងបង្គន់។ ពេលប៉ូលិសនាំគេទៅរកលុយនោះ គេប្រាប់ប៉ូលិសថា មិនមែនលាក់ក្នុងបង្គន់ទេ គឺលាក់នៅក្នុងគុម្ពឫស្សីជិតសមាគម។ ខណៈប៉ូលិសនាំគេទៅរកលុយនោះគេបែរជាប្រាប់ប៉ូលិសថា មិនមែននៅក្នុងគុម្ពឫស្សីទេ គឺរូបគេមិនហ៊ានចាយក៏ហែកលុយចោល រួចបោះចូលទៅក្នុងបង្គន់អស់ហើយ។ ប៉ូលិសមិនជឿការនិយាយបែបនោះទេ ហើយព្យាយាមសួរដេញដោលទើបគេប្រាប់ថា លុយនៅសល់ និងសំភារផ្សេងៗ រូបគេយកទៅផ្ញើបងប្អូននៅក្នុងភូមិសាឡូង សង្កាត់កំបូល។
ប្រភពដដែលបន្តថា ប៉ូលិសតាមទៅរកនៅទីនោះទៀត ប៉ុន្តែពេលទៅដល់ម្ចាស់ផ្ទះអត់ដឹងរឿងអ្វីទាំងអស់គឺក្មេងប្រុសរូបនោះនិយាយកុហក និងធ្វើចរិតដូចមនុស្សមិនគ្រប់ទឹក។ លើសពីនេះគេបានឆ្លើយដាក់យុវជន២នាក់ទៀតថា ជាអ្នករួមគំនិតជាមួយគេ។ ពេលប៉ូលិសនាំខ្លួនយុវជន២នាក់នោះមកសាកសួរ ពួកគេបដិសេធថា អត់បានដឹងឡើយ។ ពេលនេះប៉ូលិសកំពុងលួងលោមឱ្យក្មេងប្រុសនោះប្រគល់លុយឱ្យម្ចាស់ដើមវិញ ប៉ុន្តែពុំដឹងថា គេព្រមប្រគល់ ឬអត់ទេ ៕
ចែករំលែកព័តមាននេះ