ខេត្តកណ្ដាល ៖ កម្លាំងនគរបាលផ្នែកប្រឆាំងគ្រឿងញៀនរួមជាមួយនគរបាលព្រហ្មទណ្ឌស្រុកអង្គស្នួល និងនគរបាលប៉ុស្តិ៍លំហាច បានចុះចាប់ខ្លួនជនសង្ស័យប្រើប្រាស់គ្រឿងញៀន២នាក់ កាលពីវេលាម៉ោង៥និង៣០នាទីល្ងាចថ្ងៃទី១១ ខែសីហា ឆ្នាំ២០១៨ នៅចំណុចផ្ទះជនសង្ស័យ ស្ថិតនៅក្នុងភូមិគោកពពេល…
ខេត្តកណ្ដាល ៖ កម្លាំងនគរបាលផ្នែកប្រឆាំងគ្រឿងញៀនរួមជាមួយនគរបាលព្រហ្មទណ្ឌស្រុកអង្គស្នួល និងនគរបាលប៉ុស្តិ៍លំហាច បានចុះចាប់ខ្លួនជនសង្ស័យប្រើប្រាស់គ្រឿងញៀន២នាក់ កាលពីវេលាម៉ោង៥និង៣០នាទីល្ងាចថ្ងៃទី១១ ខែសីហា ឆ្នាំ២០១៨ នៅចំណុចផ្ទះជនសង្ស័យ ស្ថិតនៅក្នុងភូមិគោកពពេល ឃុំលំហាច ស្រុកអង្គស្នួល ខេត្តកណ្តាល ។
ជនសង្ស័យទាំង២នាក់ខាងលើ ម្នាក់ឈ្មោះហៃ ប៊ុនហ៊ីម ភេទប្រុស អាយុ២០ឆ្នាំ និងម្នាក់ទៀតឈ្មោះ ឆិល ច័ន្ទដា ភេទប្រុស អាយុ១៦ឆ្នាំ ។ ជនសង្ស័យទាំងនាក់នេះមានទីលំនៅក្នុងភូមិកើតហេតុខាងលើ ហើយក្នុងពេលចុះឃាត់ខ្លួនជនសង្ស័យទាំងពីរនាក់នេះ នគរបាលដកហូតបានម្សៅក្រាមពណ៌សថ្លាសង្សយ័ថាសារធាតុញៀនប្រភេទម៉ាទឹកកកចំនួន៣កញ្ចប់តូច។
តាមប្រភពព័ត៌មានបានឱ្យដឹងថា នៅមុនពេលកើតហេតុ កម្លាំងនគរបាលប៉ុស្តិ៍រដ្ឋបាលលំហាចបានទទួលព័ត៌មានពីប្រជាពលរដ្ឋថាមានជនសង្ស័យ២នាក់មានលាក់ថ្នាំញៀនទុកជាប់ខ្លួនហើយពួកគេកំពុងស្ថិតនៅក្រោមផ្ទះមួយ ។ បន្ទាប់មកកម្លាំងនគរបាលប៉ុស្តិ៍បានសហការជាមួយកម្លាំងនគរបាលប្រឆាំងគ្រឿងញៀន និងកម្លាំងនគរបាលយុត្តិធម៌ស្រុកអង្គស្នួលបានចុះទៅកាន់ចំណុចកើតហេតុខាងលើ ហើយបានឃើញជនសង្ស័យទាំង២នាក់នោះកំពុងនៅក្រោមផ្ទះ ក៏បានឃាត់ខ្លួនឆែកឆេររកឃើញថ្នាំញៀនចំនួន៣កញ្ចប់តូចដាក់ក្នុងហោប៉ៅខោរបស់ឈ្មោះហៃ ប៊ុនហ៊ីម ។
ប្រភពដដែលបានបន្តទៀតថា នៅចំពោះមុខនគរបាល ជនសង្ស័យឈ្មោះ ហៃ ប៊ុនហ៊ីម និងឈ្មោះឆិល ច័ន្ទដា បានឆ្លើយសារភាពថា ខ្លួនបានទិញថ្នាំញៀនចំនួន៣កញ្ចប់តូចពីជនមិនស្គាល់ឈ្មោះនៅភូមិក្តីល្វា ឃុំត្រពាំងគង ស្រុកសំរោងទង ខេត្តកំពង់ស្ពឺ ក្នុងតម្លៃ១០ម៉ឺនរៀល ដើម្បីយកទៅប្រើប្រាស់ ហើយពួកខ្លួនធ្លាប់ប្រើប្រាស់ថ្នាំញៀននេះអស់រយៈពេលជាង៣ឆ្នាំកន្លងមកហើយ។
ក្រោយការសាកសួរ និងកសាងសំណុំរឿងរួចរាល់ នគរបាលបានបញ្ជូនជនសង្ស័យទាំង២នាក់ខាងលើរួមនឹងវត្ថុតាងទៅកាន់សាលាដំបូងខេត្តកណ្ដាលដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ