ខេត្តកំពង់ចាម ៖ សាលមហោស្រពព្រះសីហមុនី ដែលបានវិនិយោគដោយក្រុមហ៊ុនឯកជន មានទីតាំងស្ថិតនៅភូមិ១៥ សង្កាត់កំពង់ចាម ក្រុងកំពង់ចាម ត្រូវបានអគ្គិភ័យឆេះបង្កឱ្យមានការភ្ញាក់ផ្អើលនៅវេលាម៉ោង0៦ និង៣០នាទីព្រឹកថ្ងៃទី១២ សីហា…
ខេត្តកំពង់ចាម ៖ សាលមហោស្រពព្រះសីហមុនី ដែលបានវិនិយោគដោយក្រុមហ៊ុនឯកជន មានទីតាំងស្ថិតនៅភូមិ១៥ សង្កាត់កំពង់ចាម ក្រុងកំពង់ចាម ត្រូវបានអគ្គិភ័យឆេះបង្កឱ្យមានការភ្ញាក់ផ្អើលនៅវេលាម៉ោង0៦ និង៣០នាទីព្រឹកថ្ងៃទី១២ សីហា ត្រូវបានរថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត បានចេញធ្វើអន្តរាគមន៍បាញ់ទឹក ពន្លត់ដោយប្រើប្រាស់ទឹកអស់ចំនួន៥រថយន្ត ទើបរលត់ជាស្ថាពរ ។
មន្ត្រីនគរបាលបានប្រាប់ឱ្យដឹងថា ការភ្ញាក់ផ្អើលខណៈគេឃើញផ្សែងខ្មួលខ្មាញ់ហុយចេញពីក្នុងសាលមហោស្រពមកខាងក្រៅ និងបន្ទាប់មកត្រូវបានអ្នកគ្រប់គ្រងលោក យ៉េន សារិទ្ធ ភេទប្រុស អាយុ៥៧ឆ្នាំ នៅភូមិព្រែកដើមចាន់ សង្កាត់សំបួរមាស ក្រុងកំពង់ចាម បានទូរស័ព្ទហៅរថយន្តពន្លត់អគ្គិភ័យរបស់ស្នង ការដ្ឋាននគរបាលខេត្ត ចេញមកជួយអន្តរាគមន៍បាញ់ទឹកពន្លត់ ។
ពេលដែលភ្លើងកំពុងតែឆេះនោះ ស្របពេលដែលកម្លាំងនគរបាលពន្លត់អគ្គិភ័យនៅប្រចាំការ២៤ម៉ោងលើ២៤ម៉ោង ដោយទទួលបញ្ជាពីលោកឧត្តមសេនីយ៍ទោ ឯម កុសល ស្នងការនគរបាលខេត្ត ឱ្យរថយន្តពន្លត់អគ្គិភ័យចេញមកជួយអន្តរាគមន៍បាញ់ទឹក ដោយបានទប់ស្កាត់មិនឱ្យភ្លើងឆេះឆ្លងរាលដាលមកផ្នែកខាងក្រៅនោះទេ ។ ក្នុងប្រតិបត្តិការនេះ ប្រើប្រាស់ទឹកអស់ចំនួន៥រថយន្ត បំពង់ពន្លត់អគ្គិភ័យបាញ់អស់ចំនួន៧បំពង់ ។ អគ្គិភ័យនេះបានបណ្តាលឱ្យខូចកៅអីអស់ចំនួន៨៥ ក្នុងចំណោម៨៥០(កៅអីពូក) ឆេះពិតានកាម៉ាញ៉ីខាងលើ១០០ភាគរយ កាម៉ាញ៉ីតាមជញ្ជាំងឆេះអស់១០០ភាគរយ ។ ចំពោះមូលហេតុត្រូវបានវាយតម្លៃថា ដោយសារទុស្សេចរន្តភ្លើង ទើបបណ្តាលឱ្យមានអគ្គិភ័យកើតឡើង ។
នៅក្នុងហេតុការណ៍ខាងលើ បណ្តាលឱ្យអ្នកជួលតូបលក់ដូរ នៅជុំវិញរោងមហោស្រពមានការភ្ញាក់ផ្អើលនិងភិតភ័យផងដែរ ។ លោក ស៊ឹង ភារម្យ អនុប្រធានមន្ទីរវប្បធម៌ និងវិចិត្រសិល្បៈខេត្តប្រាប់ឱ្យដឹងដែរថា ក្រោយកើតហេតុរូបលោកនិងមន្ត្រីមួយចំនួនទៀត ព្រមទាំងកងកម្លាំងនគរបាល និងអ្នកមើលការខុសត្រូវសាលមហោស្រពបានវាយតម្លៃថា ការខូចខាតនេះមានចន្លោះពី៦០ទៅ៧០ភាគរយ ។
សាលមហោស្រពនេះបាននិវិយោគឱ្យក្រុមហ៊ុនឯកជនមានរយៈពេល៥០ឆ្នាំ ចាប់តាំងពីឆ្នាំ២០០២ រហូតមកដល់សព្វថ្ងៃនេះ ។ រូបលោកនឹងរាយការណ៍ទៅរដ្ឋមន្ត្រីក្រសួងវប្បធម៌និងវិចិត្រសិល្បៈ ហើយក៏នឹងត្រៀមជួសជុលឡើងវិញក្នុងពេលខាងមុខ ។
ចែករំលែកព័តមាននេះ