ខេត្តបន្ទាយមានជ័យ ៖ ជនសង្ស័យម្នាក់ចូលលួចទូរស័ព្ទដៃម៉ាក iPhone 6 Plus មួយគ្រឿងក្នុងហាងលក់ទូរស័ព្ទយកទៅលក់ក្នុងតំលៃ១៥ម៉ឺនរៀល ត្រូវកម្លាំងសមត្ថកិច្ចតាមចាប់ខ្លួន និងដកហូតទូរស័ព្ទមួយគ្រឿងនោះមកវិញ កាលពីថ្ងៃទី១២ខែសីហា ឆ្នាំ២០១៨ នៅចំណុចភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត។
ជនសង្ស័យខាងលើឈ្មោះ រ៉ន ស្រស់ ភេទប្រុស អាយុ១៨ឆ្នាំ រស់នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត។ ចំណែកម្ចាស់ទូរស័ព្ទឈ្មោះ កី ភក្តី ភេទប្រុស អាយុ៣០ឆ្នាំ មុខរបបលក់ទូរស័ព្ទដៃ រស់នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ។
លោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែតបានឱ្យដឹងថា ក្រោយពេលទទួលបានពាក្យបណ្តឹងពីម្ចាស់ទូរស័ព្ទថា នៅយប់ចូលថ្ងៃទី១២ ខែសីហា ឆ្នាំ២០១៨ មានជនសង្ស័យម្នាក់ចូលមកលួចទូរស័ព្ទរបស់គាត់មួយគ្រឿងម៉ាក iPhone 6 Plus ដែលកំពុងសាកថ្មក្នុងហាង ក្រោយពេលបាត់ទូរស័ព្ទ គាត់បានឆែកកាមេរ៉ាសុវត្ថិភាពឃើញមុខជនសង្ស័យ រួចក៏ដាក់ពាក្យប្តឹងតែម្តង។
លោកបានបន្តថា ក្រោយពេលស្គាល់មុខជនសង្ស័យតាមរយៈកាមេរ៉ាសុវត្ថិភាពរួចមក កម្លាំងកងរាជអាវុធហត្ថក្រុងប៉ោយប៉ែតបានធ្វើការស្រាវជ្រាវ និងកំណត់មុខសញ្ញា ហើយក៏បានឃាត់ខ្លួនជនសង្ស័យបញ្ជូនមកទីបញ្ជាការកងរាជអាវុធហត្ថក្រុងប៉ោយប៉ែតដើម្បីសាកសួរ ជនសង្ស័យបានសារភាពថា ខ្លួនពិតជាបានចូលលួចទូស័ព្ទ១គ្រឿងខាងលើក្នុងហាងលក់ទូរស័ព្ទប្រាកដមែន ហើយបានយកទៅលក់ក្នុងតំលៃ១៥ម៉ឺនរៀល រួចក៏ត្រូវកម្លាំងសមត្ថកិច្ចចាប់ខ្លួនតែម្តង ចំណែកទូរស័ព្ទមួយគ្រឿងម៉ាក iPhone 6 Plus ដែលជនសង្ស័យយកទៅលក់នោះក៏ត្រូវបានយកមកវិញផងដែរ។
សមត្ថកិច្ចបានកសាងសំណុំរឿងបញ្ជូនជនសង្ស័យខាងលើទៅសាលាដំបូងខេត្តបន្ទាយមានជ័យដើម្បីចាត់ការតាមច្បាប់៕
ចែករំលែកព័តមាននេះ