ខេត្តកំពត ៖ តាមសេចក្តីរាយការណ៍បានឲ្យដឹងថា ជនសង្ស័យ៣នាក់ជាជនសកម្មឆក់ទូរស័ព្ទពីជនបរទេសនៅក្រុងព្រះសីហនុ ហើយបានព្យាយាមរត់គេចខ្លួនត្រូវសមត្ថកិច្ចសហការតាមក្របួចដល់ខេត្តកំពត កាលពីថ្ងៃទី១២ សីហានេះ ។
សេចក្តីរាយការណ៍បន្តថា ជនសង្ស័យ១-ឈ្មោះ កប ផានិត ភេទប្រុស អាយុ១៦ឆ្នាំ មុខរបរ កម្មករសំណង់ មានទីលំនៅភូមិល្អាង ឃុំល្អាង ស្រុកដងទង់ ខេត្តកំពត ។ ២-ឈ្មោះ កេង ណារ័ត្ន ភេទប្រុស អាយុ១៧ឆ្នាំ មុខរបរជាងពិដាន មានទីលំនៅភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប ។ និង៣-ឈ្មោះ ប៉ាញ ក្តៀង ភេទប្រុស អាយុ២៥ឆ្នាំ មុខរបរជាងថ្នាំ មានទីលំនៅភូមិ៣ សង្កាត់៣ ក្រុង-ខេត្តកំពត ។
ជនសង្ស័យទាំង៣នាក់ខាងលើកាលពីវេលាម៉ោង៦និង៣០នាទីល្ងាច ថ្ងៃទី១១ សីហានេះបានធ្វើសកម្មភាពឆក់ទូរស័ព្ទដៃជនបរទេស (ជនជាតិចិន) នៅចំណុចឆ្នេរអូរត្រេះ ភូមិ៦ សង្កាត់៤ ក្រុង-ខេត្តព្រះសីហនុ ។
ក្រោយធ្វើសកម្មភាពជនសង្ស័យបានជិះម៉ូតូ១គ្រឿងមិនស្គាល់ម៉ាកគេចខ្លួនបាត់ ។ បន្ទាប់មកសមត្ថកិច្ចនគរបាលខេត្តព្រះសីហនុបានធ្វើការស្រាវជ្រាវជាបន្ទាន់ទើបទទួលព័ត៌មានថា ពួកគេបានគេចខ្លួនទៅខេត្តកំពត ។ ក្រោយពេលទទួលបានព័ត៌មាននោះកម្លាំងសមត្ថកិច្ចជំនាញនគរបាលព្រហ្មទណ្ឌ ខេត្តព្រះសីហនុបានចុះទៅសហការជាមួយនគរបាលខេត្តកំពតទើបឈានដល់ការបង្ក្រាបជនសង្ស័យទាំងស្រុងបាន ។ ក្នុងនោះក៏បានដកហូតវត្ថុតាងរួមមានទូរស័ព្ទដៃ០៩គ្រឿង ម៉ូតូ០១គ្រឿង ម៉ាកអិចសិចទ័រ ពណ៌ក្រហម (ជាមធ្យោបាយធ្វើសកម្មភាព ) និងម៉ូតូ០១គ្រឿងម៉ាក ZOOMER- X មធ្យោបាយធ្វើសកម្មភាព ។
ជនសង្ស័យ និងវត្ថុតាងត្រូវបានសមត្ថកិច្ចនាំទៅកាន់ស្នងការដ្ឋាននគរបាលខេត្តព្រះសីហនុ ដើម្បីកសាងសំណុំរឿងតាមនីតិវិធី ៕
ចែករំលែកព័តមាននេះ