ទីក្រុងសេអ៊ូល ៖ កាលពីថ្ងៃសុក្រកន្លងមក សហរដ្ឋអាមេរិកបានបន្តគាំទ្រប្រទេសកូរ៉េខាងត្បូង បន្ទាប់ពីគេចាប់បានថា អាជីវកម្មរបស់កូរ៉េខាងត្បូងចំនួន៣ បាននាំចូលធ្យូងថ្ម និងរ៉ែដែកពីប្រទេសកូរ៉េខាងជើង ដោយខុសច្បាប់ ។
យោងតាមការិយាល័យពន្ធដារប្រទេសកូរ៉េបានឲ្យដឹងថា ក្រុមហ៊ុនទាំង៣បាននាំចូលផលិតផលចំនួន២ប្រភេទ ស្មើប្រមាណ៣៥.០៣៨តោន ចាប់ពីខែមេសា ដល់ខែតុលា ឆ្នាំ២០១៧ ។
ការនាំចូលទាំងនេះ គឺស្មើទឹកប្រាក់ប្រមាណ៥,៨៦លានដុល្លារ ដែលល្មើសនឹងច្បាប់ប្រទេសកូរ៉េ ហើយអាចល្មើសនឹងសេចក្តីសម្រេចរបស់ក្រុមប្រឹក្សាសន្តិសុខរបស់អង្គការសហប្រជាជាតិ ដែលបានចេញកាលពីខែសីហា មុនទៀតផង ។
សេចក្តីសម្រេចនេះ បានស្នើឲ្យមានការហាមឃាត់ការនាំចេញធ្យូងថ្ម រ៉ែដែក និងធនធានផ្សេងៗ ដែលអាចរកប្រាក់ចំណូលដល់រដ្ឋាភិបាល ដើម្បីអភិវឌ្ឍន៍អាវុធនុយក្លែអ៊ែរ និងកាំជ្រួចមីស៊ីល ។
អ្នកស្រី Katina Adams អ្នកនាំពាក្យរបស់ក្រសួងការបរទេសសហរដ្ឋអាមេរិក បាននិយាយថា ៖« សាធារណរដ្ឋកូរ៉េ គឺជាដៃគូដ៏ស្មោះត្រង់ និងអាចពឹងពាក់បាន ក្នុងការអនុម័តសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិក្នុងផ្នែកផ្លូវទឹក ។ សហរដ្ឋអាមេរិក និងសាធារណរដ្ឋកូរ៉េ បានសហការគ្នាយ៉ាងដិតដល់សម្រាប់បញ្ហាកូរ៉េខាងជើង និងបន្តរក្សាទំនាក់ទំនងជិតស្និទ្ធ ដើម្បីសម្របសម្រួលការឆ្លើយតបរួមរបស់ពួកយើងទៅកាន់កូរ៉េខាងជើង » ។
អ្នកស្រី Katina Adams បានបន្ថែមទៀតថា ៖« ពួកយើងដឹងថា រដ្ឋាភិបាលសាធារណរដ្ឋកូរ៉េបានចាប់ផ្តើមការស៊ើបអង្កេតហើយ » ៕
ចែករំលែកព័តមាននេះ