ថៃធានាដល់វិនិយោគិន សម្រាប់ច្រករបៀង EEC
ទីក្រុងបាងកក ៖ រដ្ឋមន្ត្រីឧស្សាហកម្មរបស់ប្រទេសថៃ លោក Uttama Savanayana បានធានាដល់វិនិយោគិនជប៉ុនថា គម្រោងច្រករបៀងសេដ្ឋកិច្ចខាងកើត (EEC) របស់រដ្ឋាភិបាលថៃ…
ទីក្រុងបាងកក ៖ រដ្ឋមន្ត្រីឧស្សាហកម្មរបស់ប្រទេសថៃ លោក Uttama Savanayana បានធានាដល់វិនិយោគិនជប៉ុនថា គម្រោងច្រករបៀងសេដ្ឋកិច្ចខាងកើត (EEC) របស់រដ្ឋាភិបាលថៃ នឹងនៅតែបន្តទៀត បើទោះជាមានរដ្ឋាភិបាលថ្មីឡើងគ្រប់គ្រងនៅឆ្នាំក្រោយក្តី ។
លោកឲ្យដឹងទៀតថា វិនិយោគិនជប៉ុនមានចំណាប់អារម្មណ៍ក្នុងការវិនិយោគ និងបង្កើនការវិនិយោគរបស់ពួកគេនៅច្រករបៀង EEC នេះ ។ គួរបញ្ជាក់ថា ប្រទេសជប៉ុន គឺជាវិនិយោគិនបរទេសដ៏ធំនៅក្នុងប្រទេសថៃ អស់រយៈពេលជាង៤០ឆ្នាំមកហើយ ។
លោក Uttama Savanayana មានប្រសាសន៍ថា ៖« គម្រោង EEC បានផ្តល់អត្ថប្រយោជន៍សេដ្ឋកិច្ចដល់ប្រទេសថៃ និងអាស៊ាន ហើយរដ្ឋាភិបាលថៃជឿជាក់ថា គម្រោងនេះនឹងរក្សាទុក បន្ទាប់ពីរដ្ឋាភិបាលថ្មីឡើងគ្រប់គ្រង»។
លោកបន្តថា រដ្ឋាភិបាលបានត្រៀមខ្លួនរួចជាស្រេចក្នុងការស្ថាបនាកិច្ចព្រមព្រៀងពាណិជ្ជកម្មសេរីជាមួយប្រទេសជប៉ុន ក្រោមកិច្ចព្រមព្រៀងដៃគូពាណិជ្ជកម្មរវាងជប៉ុន និងថៃ (JTEPA) ។
លើសពីនេះ កាលពីថ្ងៃសុក្រកន្លងមក ក្រសួងឧស្សាហកម្មបានចូលរួមសិក្ខាសាលាមួយ ស្តីពីគម្រោង EEC សម្រាប់វិនិយោគិនជប៉ុន ដោយមានការចូលរួមពីអង្គការពាណិជ្ជកម្មបរទេសជប៉ុន (Jetro) និងសភាពាណិជ្ជកម្មជប៉ុនផងដែរ ។
លោក Uttama Savanayana បានបន្ថែមថា ទស្សនវិស័យវិនិយោគរបស់ប្រទេសថៃមានភាពវិជ្ជមាន ព្រោះរដ្ឋាភិបាលបានជំរុញគម្រោងហេដ្ឋារចនាសម្ព័ន្ធជាច្រើន ដើម្បីបង្កើនភាពប្រកួតប្រជែងផ្នែកសេដ្ឋកិច្ចរបស់ប្រទេសនេះ និងជំរុញជំនឿចិត្តវិនិយោគិនទៀតផង ។
យោងតាមគណៈកម្មាធិការវិនិយោគ (BoI) បានឲ្យដឹងថា ការវិនិយោគផ្ទាល់ពីបរទេសរបស់ជប៉ុនមកកាន់ប្រទេសថៃ នៅឆ្នាំ២០១៧ គឺស្មើប្រមាណ៣,៧ប៊ីលានដុល្លារ (១២៣ប៊ីលានបាត) ៕
ចែករំលែកព័តមាននេះ