ខេត្តកែប ៖ ក្មេងស្រីដែលគួរឲ្យស្រលាញ់ម្នាក់ត្រូវចរន្តភ្លើងឆក់យកជីវិត បណ្តាលឲ្យស្លាប់គួរឲ្យសោកស្តាយបំផុត ខណៈក្មេងរងគ្រោះទៅកាន់ខ្សែភ្លើងដែលដាច់ធ្លាក់នៅក្រោមផ្ទះរបស់ខ្លួន ។ ករណីគួរឲ្យសង្វេគនេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី១១ ខែសីហា ឆ្នាំ២០១៨ ត្រង់ចំណុចភូមិកំពង់ត្រឡាច សង្កាត់ព្រៃធំ ក្រុងកែប ខេត្តកែប ។
យោងតាមប្រភពពីសមត្ថកិច្ចមូលដ្ឋានបានឲ្យដឹងថា ក្មេងស្រីរងគ្រោះមានឈ្មោះ សី ក្តី ភេទស្រី អាយុ១០ឆ្នាំ រស់នៅជាមួយឪពុកម្តាយ ស្ថិតក្នុងភូមិកំពង់ត្រឡាច សង្កាត់ព្រៃធំ ក្រុងកែប ។ ប្រភពព័ត៌មានបានឲ្យដឹងថា នៅមុនពេលកើតហេតុមានភ្លៀងខ្យល់យ៉ាងខ្លាំង បណ្តាលឲ្យខ្សែភ្លើងដែលតខ្វាត់ខ្វែងនៅផ្ទះនេះដាច់ធ្លាក់ដល់ដី ហើយក្មេងស្រីរងគ្រោះប្រហែលមិនដឹងថា ខ្សែភ្លើងដែលដាច់នោះ នៅមានផ្ទុកចរន្តភ្លើងបែបនេះទើបយកដៃទៅកាន់ បណ្តាលឲ្យឆក់ស្លាប់ភ្លាមៗមួយរំពេចតែម្តង ។
បច្ចុប្បន្នសពក្មេងស្រីរងគ្រោះត្រូវបានអាណាព្យាបាលកំពុងរៀបចំធ្វើបុណ្យតាមប្រពៃណីនៅឯលំនៅដ្ឋានក្រោមសម្រែកទួញសោកពីសំណាក់ឪពុកម្តាយបងប្អូនសាច់ញាតិគួរឲ្យសង្វេគជាទីបំផុត ។
គួររំលឹកថា ករណីមនុស្សស្លាប់ដោយសារចរន្តភ្លើងដូចខាងលើពិតជាបានកើតឡើងជាញឹកញាប់នៅគ្រប់ទិសទីមិនថា ទីប្រជុំជន ឬទីជនបទឡើយ ។ ឲ្យតែខ្វះការប្រុងប្រយ័ត្នតែមួយប៉ប្រិចភ្នែកអាចជួបគ្រោះថ្នាក់ដោយនឹកស្មានមិនដល់ ហើយតែងតែបង្កគ្រោះថ្នាក់ដល់ជីវិតមនុស្សគ្រប់វ័យផងដែរ ។
ដូច្នេះអាជ្ញាធរក៏ដូចជា សមត្ថកិច្ចគ្រប់តំបន់សំណូមពរដល់បងប្អូនប្រជាពលរដ្ឋ ពិសេសអាណាព្យាបាលទាំងអស់សូមឲ្យមានការប្រុងប្រយ័ត្នខ្ពស់ពោល គឺត្រូវតខ្សែចរន្តភ្លើងទៅតាមបច្ចេកទេសតាមការបង្ហាញរបស់ជំនាញអគ្គិសនី និងត្រូវពិនិត្យមើលខ្សែបណ្តាញភ្លើងនៅក្នុងលំនៅឋានឲ្យបានគ្រប់ជ្រុងជ្រោយកុំប្រើខ្សែចរន្តមានមុខតំណ ឬខ្សែភ្លើងចាស់ៗ ។ ធ្វើបែបនេះ ដើម្បីការពារសុវត្ថិភាពក្នុងផ្ទះ ព្រមទាំងហានិភ័យផ្សេងៗដែលកើតឡើងជាយថាហេតុផងដែរ ៕
ចែករំលែកព័តមាននេះ