ខេត្តកំពត ៖ ជនសង្ស័យប្រុស-ស្រី២នាក់ដែលត្រូវសមត្ថកិច្ចខេត្តកំពត បានបើកការស៊ើបអង្កេតស្រាវជ្រាវរហូតដឹងថា ជាមុខសញ្ញាជួញដូរ និងប្រើប្រាស់ថ្នាំញៀនមកពីភ្នំពេញ ហើយមកសម្ងំលាក់ខ្លួនចែកចាយគ្រឿងញៀននៅភូមិសាស្ត្រមួយកន្លែង ស្ថិតក្នុងស្រុកទឹកឈូ។
លោកវរសេនីយ៍ទោ លក ញ៉ាវ នាយការិយាល័យព្រហ្មទណ្ឌកំរិតស្រាលស្នងការខេត្តបានឲ្យដឹងថា ក្រោយពីក្តាប់មុខសញ្ញាបានហើយ លោកក៏ទទួលបញ្ជាពីលោកឧត្តមសេនីយ៍ស្នងការខេត្ត និងមានការសម្រួលនីតិវិធីពីលោក ជ័យ រិទ្ធី ព្រះរាជអាជ្ញាអមសាលាដំបូងខេត្តផងនោះ នៅវេលាម៉ោង២រសៀលថ្ងៃទី១១ សីហា បានដឹកនាំកម្លាំងអន្តរាគមន៍ចុះបង្ក្រាបមុខសញ្ញាចែកចាយថ្នាំញៀនមួយកន្លែងនៅភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូ ខេត្តកំពត។
លោកបានបន្តទៀតថា ក្នុងការចុះបង្ក្រាបខាងលើ កម្លាំងសមត្ថកិច្ចយើងឃាត់ខ្លួនបានជនសង្ស័យប្រុសស្រី២នាក់ ហើយរឹបអូសវត្ថុតាងថ្នាំញៀនចំនួន១០កញ្ចប់តូច ម៉ូតូ១គ្រឿងម៉ាក Smashv ពណ៌ខ្មៅ ពាក់ស្លាកលេខភ្នំពេញ 1BA- 0454 និងទូរស័ព្ទដៃម៉ាកខេមហ្វូន០១គ្រឿង។
លោកបន្តទៀតថា ជនសង្ស័យទាំងពីរនាក់នេះ ១- ឈ្មោះ សន រដ្ឋា ភេទប្រុស អាយុ២៥ឆ្នាំ ស្នាក់នៅផ្ទះលេខ១០១F ផ្លូវលេខ២៧១ ភូមិ១ សង្កាត់បឹងសាឡាង ខណ្ឌទួលគោក រាជធានីភ្នំពេញ និង២- ឈ្មោះ ស៊ាន លីនដា ភេទស្រី អាយុ២៥ឆ្នាំ រស់នៅភូមិព្រៃស្បាត ឃុំត្រពាំងធំខាងជើង ស្រុកត្រាំកក់ ខេត្តតាកែវ។
ក្រោយពេលឃាត់ខ្លួន ជនសង្ស័យទាំងពីរនាក់ រួមនឹងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធី៕
ចែករំលែកព័តមាននេះ