ខេត្តក្រចេះ ៖ សពរបស់ពលរដ្ឋជាអ្នកចម្ការមួយគ្រួសារមានគ្នា៤នាក់ រួមមាន ប្តី ប្រពន្ឋ និងកូនប្រុសស្រី២នាក់ទៀត គេប្រទះឃើញត្រូវភ្លើងឆេះស្លាប់យ៉ាងអាណោចអាធ័ម ជាមួយនឹងផ្ទះចម្ការមួយខ្នង ស្ថិតនៅតំបន់ដាច់ស្រយាលពីភូមិ។
នាយផ្នែកនគរបាលព្រហ្មទណ្ឌស្រុកចិត្របុរី លោក ហេង ប៊ុនធឿន បានឲ្យដឹងថា ជនរងគ្រោះដែលស្លាប់ទាំង៤នាក់ខាងលើរួមមាន ១-ឈ្មោះ ឆុំ ឈន ភេទប្រុស អាយុ៣០ឆ្នាំ ត្រូវជាប្តី ២-ឈ្មោះ ជួន សុខនាង ភេទស្រី អាយុ៣៣ឆ្នាំ ត្រូវជាប្រពន្ឋ ៣-ឈ្មោះ ឈាន គឹមឈី ភេទប្រុស អាយុ១១ឆ្នាំ ត្រូវជាកូន និង៤-ឈ្មោះឈន វណ្ណី ភេទស្រី អាយុ៩ឆ្នាំ ត្រូវជាកូន ។
ការស្លាប់អស់មួយគ្រួសារនេះ ជំហ៊ានដំបូងពលរដ្ឋក៏ដូចជានគរបាលបានសន្និដ្ឋានថា ជាករណីឧប្បត្តិហេតុភ្លើងឆេះផ្ទះ ទើបបណ្តាលឲ្យស្លាប់ជនរងគ្រោះអស់មួយគ្រួសារក្នុងអណ្តាតភ្លើងបែបនេះ ។ តែក្រោយពីសមត្ថកិច្ចបានចុះទៅពិនិត្យកន្លែងកើតហេតុ និងសាកសួរព័ត៌មានពីពលរដ្ឋនោះ នគរបាលស្រុកចិត្របុរីបានសន្និដ្ឋានថា ករណីនេះជាអំពើឃាតកម្មវាយសម្លាប់ រួចដុតផ្ទះកម្ទេចសាកសព។
បើទោះជាបែបណា នគរបាលព្រហ្មទណ្ឌស្រុកចិត្របុរីនៅមិនទាន់កំណត់ឱ្យច្បាស់ថា ករណីឃាតកម្មសម្លាប់ផ្តាច់ពូជ រួចដុតកម្ទេចសាកសពនេះផ្តើមចេញពីរឿងអ្វីឱ្យប្រាកដនៅឡើយទេ តែនគរបាលថា ករណីនេះកម្លាំងជំនាញកំពុងតែស្រាវជ្រាវយ៉ាងដុតដៃដុតជើង។
ករណីឃាតកម្មខាងលើនេះត្រូវបានគេចាត់ទុកថា ជាអំពើសម្លាប់មនុស្សយ៉ាងឃោរឃៅ និងព្រៃផ្សៃបំផុតមួយដែលពុំធ្លាប់មានផងដែរ។
នគរបាលស្រុកចិត្របុរីបានឱ្យដឹងថា ករណីឃាតកម្មនេះបានកើតឡើងតាំងពីពាក់កណ្តាលយប់ថ្ងៃទី៩ សីហា មកម៉្លេះ ស្ថិតនៅផ្ទះចម្ការរបស់ជនរងគ្រោះមានទំហំ៤ម៉ែត្រគុណនឹង៦ម៉ែត្រ ស្ថិតនៅលើកោះប្រឹម ខាងក្រោយភូមិប្អៀរ ឃុំថ្មី ស្រុកចិត្របុរី ។ ដោយសារគ្រួសាររបស់ជនរងគ្រោះស្នាក់នៅធ្វើចម្ការនៅឆ្ងាយពីភូមិបែបនេះ ទើបករណីនេះបានបង្កឱ្យមានការភ្ញាក់ផ្អើលដល់នគរបាលនៅយប់ថ្ងៃទី១១ សីហា ។
នាយផ្នែកនគរបាលព្រហ្មទណ្ឌស្រុកចិត្របុរីលោក ហេង ប៊ុនធឿន បានឲ្យដឹងថា សពរបស់ក្រុមគ្រួសាររងគ្រោះចំនួន៤នាក់ត្រូវបានឆេះស្ទើរមើលមិនដឹងថាជាមនុស្សទៅហើយ ។
មិនមានសេចក្តីរាយការណ៍ណាមួយថា កន្លងមកជនរងគ្រោះធ្លាប់មានទំនាស់ជាមួយនណា ដែលឈានឱ្យមានករណីបែបនេះកើតឡើងមកលើគ្រួសាររបស់ជនរងគ្រោះនោះទេ ហើយជនដៃដល់ដែលប្រព្រឹត្តសកម្មភាពសម្លាប់មនុស្សយ៉ាព្រៃផ្សៃនេះ គឺគេមិនដឹងថាធ្វើដើម្បីអ្វីនោះដែរ។
នៅនឹងកន្លែងកើតហេតុ ក្រៅពីបានឃើញសពរបស់គ្រួសាររងគ្រោះទាំង៤នាក់ ដែលត្រូវស្លាប់ដោយសារភ្លើងឆេះរួញក្រញង់ជាប់គ្នានៅសល់ពាក់កណ្តាលនៃរាងកាយ និងលលាដ៏ក្បាលនោះ នគរបាលក៏បានរកឃើញសំបកគ្រាប់កាំភ្លើងចំនួន២គ្រាប់ទៀតផងដែរ។
នគរបាលបានឱ្យដឹងថា ករណីខាងលើនេះ កម្លាំងជំនាញកំពុងតែស្រាវជ្រាវដើម្បីរកពន្លឺនៃបទល្មើសឱ្យបានច្បាស់លាស់៕
ចែករំលែកព័តមាននេះ