រាជធានីភ្នំពេញ ៖ លោកកូអ៊ីជីរ៉ូ ម៉ាត់ស៊ូរ៉ា បេសកជនពិសេសអង្គការយូណេស្កូ បានអញ្ជើញចូលក្រាបបង្គំគាល់ និងសវនាការជាមួយព្រះមហាក្សត្រកម្ពុជា ព្រះបរមនាថ នរោត្តម សីហមុនី នៅឯព្រះបរមរាជវាំង នាព្រឹកថ្ងៃទី១ មីនា ២០១១ នេះ ដើម្បីសំណេះសំណាលលើសភាពការណ៍ផ្សេងៗ និងការអភិវឌ្ឍរបស់ប្រទេសកម្ពុជា ព្រមទាំងបញ្ហាបេតិកភណ្ឌផងដែរ ។
សូមបញ្ជាក់ថា ចាប់ពីថ្ងៃទី២៧ ដល់ថ្ងៃទី១ មីនា២០១១ លោកកូអ៊ីជីរ៉ូ ម៉ាត់ស៊ូរ៉ា បេសកជនពិសេសរបស់អង្គការយូណេស្កូបានជួបជាមួយថ្នាក់ដឹកនាំសំខាន់ៗរបស់កម្ពុជា រួមមានលោកឧបនាយករដ្ឋមន្ត្រីសុខ អាន លោកឧបនាយករដ្ឋមន្ត្រីហោ ណាំហុង រដ្ឋមន្ត្រីការបរទេសកម្ពុជា សម្តេចអគ្គមហាសេនាបតីតេជោហ៊ុន សែន ហើយចុងក្រោយគឺទូតពិសេសរូបនេះត្រូវចូលបង្គំគាល់ព្រះមហាក្សត្រកម្ពុជា ព្រះបរមនាថ នរោត្តម សីហមុនី តែម្តង ហើយនៅរសៀលថ្ងៃដដែលនោះ នឹងធ្វើដំណើរត្រឡប់ទៅវិញ ។
ជាលទ្ធផល លោកកូអ៊ីជីរ៉ូ ម៉ាត់ស៊ូរ៉ា បានទទួលនូវរបាយការណ៍និងព័ត៌មានដ៏សុក្រឹត្យជាទីបំផុតពីភាគីកម្ពុជាស្តី ពីការខូចខាតនៃតួប្រាសាទព្រះវិហារ និងតំបន់ជុំវិញនោះ ដែលរងគ្រោះយ៉ាងដំណំដោយសារគ្រាប់កាំភ្លើងថៃ ដែលបានបាញ់ប្រហារកាលពីថ្ងៃទី៤ ដល់ថ្ងៃទី៧ កុម្ភៈ ឆ្នាំ២០១១ ។
ដំណើរទស្សនកិច្ចនេះ គឺជាការឆ្លើយតបទៅនឹងលិខិតរបស់លោកឧបនាយករដ្ឋមន្ត្រីសុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ដែលបានស្នើសុំទៅអង្គការយូណេស្កូ ដើម្បីឱ្យមានកិច្ចអន្តរាគមន៍ជាបន្ទាន់ ប្រយោជន៍ជួយសង្គ្រោះប្រាសាទព្រះវិហារដែលបានចុះក្នុងបញ្ជីជាសម្បត្តិបេតិកភណ្ឌពិភពលោករួចហើយកាលពីថ្ងៃទី៧ កក្កដា ២០០៨ ៕
ចែករំលែកព័តមាននេះ