រាជធានីភ្នំពេញ ៖ កំពូលកីឡាករបាល់ទាត់ជប៉ុន លោក Keisuke Honda បានក្លាយជាអ្នកចាត់ការទូទៅ និងជាគ្រូបង្ហាត់ឲ្យក្រុមកីឡាបាល់ទាត់ជម្រើសជាតិថ្មីរបស់កម្ពុជា ហើយអ្វីដែលគួរឲ្យស្ងើចសរសើរខ្លាំងបំផុតនោះ គឺកីឡាករបាល់ទាត់លំដាប់អន្តរជាតិរូបនេះមិនទទួលយកប្រាក់ខែពីកម្ពុជានោះទេ សម្រាប់ការជួយដល់កម្ពុជារយៈពេល២ឆ្នាំនេះ ។
ថ្លែងនៅឯពិធីបង្ហាញវត្តមានជាផ្លូវការរបស់កីឡាករបាល់ទាត់លំដាប់ថ្នាក់អន្តរជាតិនៅសណ្ឋាគារ Le Royal កាលពីព្រឹកថ្ងៃទី១២ ខែសីហា លោកនាយឧត្តមសេនីយ៍ សៅ សុខាប្រធានសហព័ន្ធកីឡាបាល់ទាត់កម្ពុជាមានប្រសាសន៍ឱ្យបានដឹងថា លោក Keisuke Honda បានចុះកិច្ចសន្យាជាមួយសហព័ន្ធកីឡាបាល់ទាត់កម្ពុជាមានរយៈពេល២ឆ្នាំ ដើម្បីធ្វើជាអ្នកដឹកនាំ និងជាគ្រូបង្ហាត់ថ្មីដល់ក្រុមកីឡាបាល់ទាត់ជម្រើសជាតិកម្ពុជាដោយការស្ម័គ្រចិត្តពុំគិតប្រាក់ខែឡើយ ។
ប៉ុន្តែសហព័ន្ធសន្យារ៉ាប់រងទៅលើការស្នាក់នៅ និងធ្វើដំណើរហូបចុករាល់ពេលដែលកំពូលកីឡាករបាល់ទាត់លោក Honda មកកាន់កម្ពុជាផងដែ ។ លោក Keisuke Honda ដែលទើបតែចុះកុងត្រាជាមួយ A-League club Melbourne Victory ប្រទេសអូស្ត្រាលីកាលពីសប្តាហ៍មុនមានប្រសាសន៍ថា ការសម្រេចចិត្តមកជួយបង្ហាត់ដល់ក្រុមជម្រើសជាតិកម្ពុជានាពេលនេះ គឺ«ដើម្បីចង់ជួយដល់ក្រុមជម្រើសជាតិកម្ពុជាឱ្យមានបច្ចេកទេសមួយច្បាស់លាស់សម្រាប់ការលេង និងឱ្យកាន់តែមានការរីកចម្រើន ជាពិសេសជួយធ្វើការផ្លាស់ប្ដូរទម្រង់លេងរបស់ក្រុមជម្រើសជាតិកម្ពុជាឱ្យកាន់តែល្អប្រសើរជាងមុន» ។
កីឡាករដែលមានវ័យ៣២ឆ្នាំរូបនេះ ជាខ្សែប្រយុទ្ធឆ្នើមរបស់ក្រុមបាល់ទាត់ជម្រើសជាតិជប៉ុន បានបញ្ជាក់ថា បើទោះបីជាលោកមមាញឹកយ៉ាងណាក៏ដោយក៏លោក និងឆ្លៀតពេលធ្វើកាលវិភាគដ៏ច្បាស់លាស់ក្នុងការដឹកនាំប្រជុំក្នុង១សប្ដាហ៍យ៉ាងតិចក៏២ដងតាមរយៈវីដេអូ Conference ជាមួយក្រុមការងារនៅកម្ពុជា ៕
ចែករំលែកព័តមាននេះ