តម្រូវការអចលនទ្រព្យបរទេសរបស់ជនជាតិចិននឹងល្អប្រសើរ

ថ្ងៃទី ១៣ ខែ សីហា ឆ្នាំ ២០១៨

ម៉ោង ០៧:១០

ទីក្រុងប៉េកាំង ៖ អ្នករិះគន់មួយចំនួនគិតថា ការវិនិយោគអន់ថយលើអចលនទ្រព្យបរទេសរបស់ជនជាតិចិន គឺទាក់ទងនឹងជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន ។ ប៉ុន្តែការវិនិយោគអន់ថយលើអចលនទ្រព្យក្នុងលោកខាងលិចនេះ ជាប់ទាក់ទងនឹងកត្តាជាច្រើនរួមមាន ភាពស្វាហាប់ផ្នែកឧស្សាហកម្ម កត្តាសេដ្ឋកិច្ច និងបញ្ហាក្នុងស្រុក ជាដើម ។

យោងតាមសមាគមភ្នាក់ងារអចលនទ្រព្យជាតិរបស់សហរដ្ឋអាមេរិកបានឲ្យដឹងថា ការទិញ-លក់លំនៅឋានដោយជនបរទេសទាំងអស់នៅសហរដ្ឋអាមេរិក ក្នុងនោះមានអតិថិជនចិន១៤% ហើយអតិថិជនចិនស្មើ២០%នៃការទិញ-លក់អចលនទ្រព្យសម្រាប់ការធ្វើពាណិជ្ជកម្មកាលពីឆ្នាំ២០១៧ ។

ជនជាតិចិនបានវិនិយោគប្រាក់រាប់ប៊ីលានដុល្លារលើអចលនទ្រព្យសម្រាប់ការធ្វើពាណិជ្ជកម្មនៅសហរដ្ឋអាមេរិក ដែលអាចនឹងស្មើ៥៤ប៊ីលានដុល្លារតាំងពីឆ្នាំ២០០០
មក ។

គោលជំហរដែលប្រកាន់ថា ការវិនិយោគទៅក្រៅប្រទេសរបស់ជនជាតិចិនមិនមានចីរភាព បានចាប់ផ្តើមបង្ហាញឡើងនៅឆ្នាំ២០១៦ ដោយអាជ្ញាធរចិនបានបង្កើនការទប់ស្កាត់លើសមត្ថភាពរបស់ក្រុមហ៊ុនក្នុងស្រុក និងបុគ្គល ក្នុងការផ្ទេរប្រាក់ចេញពីប្រទេស ។ ប៉ុន្តែកត្តាមួយទាក់ទងនឹងវិធានការថ្មីក្នុងទីផ្សារអចលនទ្រព្យមួយចំនួន គឺមានគោលដៅការពារពលរដ្ឋដែលគ្មានសមត្ថភាពទិញផ្ទះ ព្រោះតែអតិថិជនបរទេស ។

ទីក្រុងជាច្រើនដូចជា Toronto, Vancouver, Sydney និងហុងកុង មើលឃើញជនជាតិចិនទិញអចលនទ្រព្យកើនឡើងយ៉ាងខ្លាំង ។ ពួកគេបានបង្កើនពន្ធ និងមានវិធានការទប់ស្កាត់ផ្សេងៗសម្រាប់អតិថិជនបរទេស ។

ទោះជាយ៉ាងណា តម្រូវការអចលនទ្រព្យសម្រាប់វិនិយោគិនចិនក្នុងទីក្រុងធំៗលើពិភពលោក ជាពិសេស សហរដ្ឋអាមេរិកអាចនឹងល្អប្រសើរឡើង ។ រីឯការលក់អលនទ្រព្យនៅក្រុងហុងកុងទៅកាន់អតិថិជនចិនក្នុងឆ្នាំនេះមានភាពរឹងមាំ ។

រដ្ឋាភិបាលចិនបានបង្ហាញគោលបំណងលើកតម្កើងរូបិយវត្ថុ និងការផ្តូរប្រាក់ដោយមិនអស់ថ្លៃ ជាដើម ។ មិនយូរប៉ុន្មាន អាជ្ញាធរចិននឹងត្រូវកាត់បន្ថយការគ្រប់គ្រងលើធនធានផងដែរ។ អត្រាការប្រាក់បានធ្លាក់ចុះបង្ហាញថា ប្រទេសចិនកំពុងតែជំរុញឲ្យមានការវិនិយោគ ៕