ខេត្តមណ្ឌលគិរី ៖ បុរសម្នាក់ក្នុងចំណោមបក្សពួកចំនួន៣នាក់ផ្សេងទៀតត្រូវបានមន្ត្រីដែនជម្រកការពារសត្វព្រៃកែវសីមាកសាងសំណុំរឿងបញ្ជូនទៅសាលាដំបូងខេត្ត ក្រោយធ្វើសកម្មភាពរារាំងសមត្ថកិច្ចចុះអនុវត្តន៏ច្បាប់កាលពីវេលាទៀបភ្លឺថ្ងៃទី១០ ខែសីហា ឆ្នាំ២០១៨ ។
លោក ឌិន ប៊ុនធឿន នាយកដែនជម្រកការពារសត្វព្រៃកែវសីមាឲ្យដឹងនៅរសៀលថ្ងៃទី១១ ខែសីហា ឆ្នាំ២០១៨ ថា«កំពុងកសាងសំណុំរឿងបញ្ជូនទៅសាលាដំបូងខេត្តឆ្លងតាមការសាកសួរយើងសម្រេចឃាត់ខ្លួនជនសង្ស័យឈ្មោះ លន់ លាក់ ភេទប្រុស អាយុ២៦ឆ្នាំ រស់នៅភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី ជាអ្នកប្រព្រឹត្តផ្ទាល់ក្នុងបទធ្វើឲ្យរាំងស្ទះដល់ការបំពេញភារកិច្ចរបស់មន្ត្រីរដ្ឋបាលការពារ និងអភិរក្សធម្មជាតិ ក្នុងមាត្រា៦៣ នៃច្បាប់ស្តីពីតំបន់ការពារធម្មជាតិ» ។
លោក កែវ សុភគ៌ ប្រធានមន្ទីរបរិស្ថានខេត្តបានឲ្យដឹងថា វេលាម៉ោង១២និង៤៧នាទីយប់ចូលថ្ងៃទី១០ ខែសីហា ឆ្នាំ២០១៨ ជំនាញដែនជម្រកសត្វព្រៃកែវសីមាបានចុះប្រតិបត្តិការនៅចំណុចទីតាំងកិនថ្ម បានជួបម៉ូតូដឹកឈើចំនួន០១គ្រឿងដឹកឈើកកោះឡាំងជ្រុងចំនួន៤ដុំ និងឈើនៅក្បែម៉ូតូចំនួនប្រាំមួយដុំទៀត និងបានឃាត់ចាប់ម៉ូតូម៉ាកវេវ ដែលដឹកជញ្ជូនស្បៀងទៅឲ្យក្រុមអារឈើស្រឡៅឡាំងជ្រុងនៅក្នុងព្រៃ ។
លោកប្រធានមន្ទីរបន្តថា ជំនាញក៏បានរឹបអូសវត្ថុតាងទាំងអស់មករក្សាទុកនៅស្នាក់ការកែវសីមាលុះដឹកមកដល់ចំណុចទឹកខួបស្ថិតនៅភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ក៏ត្រូវបានជនសង្ស័យមួយក្រុមបានយករថយន្តចំនួនពីរគ្រឿងម៉ាកកាមរីហើម ពណ៌ស្លែ និងពណ៌ខ្មៅ មកបិតរាំងផ្លូវឡានដឹកវត្ថុតាងមិនឲ្យទៅមុខ ។
ស្ថិតនៅក្នុងស្ថានភាពប្រឈមនេះ មន្ត្រីជំនាញបរិស្ថានបានបាញ់បំបែកកង់ឡានអស់ចំនួនប្រាំគ្រាប់ ទើបពួកគេគេចខ្លួនបាត់ស្រមោល ។ ចំណែកវត្ថុតាងត្រូវបានយកទៅរក្សាទុកនៅស្នាក់ការដែនជម្រកដើម្បីចាត់ការតាមច្បាប់ ៕
ចែករំលែកព័តមាននេះ