រាជធានីភ្នំពេញ ៖ ខណៈកំណើនភ្ញៀវទេសចរបរទេសមកកាន់កម្ពុជាបានកើនឡើងជាបន្តបន្ទាប់ ការផ្គត់ផ្គង់សេវាកម្មក្នុងវិស័យនេះ ក៏កើនឡើងច្រើនដែរ រហូតដល់ការផ្គត់ផ្គង់ខ្លះឈានដល់ដំណាក់កាលលើសតម្រូវការ ។ ជាក់ស្ដែង ផ្នែកសណ្ឋាគារ និងបដិសណ្ឋារកិច្ចសម្រាប់ផ្ដល់ជូនភ្ញៀវទេសចរក្នុងពេលបច្ចុប្បន្ននេះ…
រាជធានីភ្នំពេញ ៖ ខណៈកំណើនភ្ញៀវទេសចរបរទេសមកកាន់កម្ពុជាបានកើនឡើងជាបន្តបន្ទាប់ ការផ្គត់ផ្គង់សេវាកម្មក្នុងវិស័យនេះ ក៏កើនឡើងច្រើនដែរ រហូតដល់ការផ្គត់ផ្គង់ខ្លះឈានដល់ដំណាក់កាលលើសតម្រូវការ ។
ជាក់ស្ដែង ផ្នែកសណ្ឋាគារ និងបដិសណ្ឋារកិច្ចសម្រាប់ផ្ដល់ជូនភ្ញៀវទេសចរក្នុងពេលបច្ចុប្បន្ននេះ ហាក់មានការប្រកួតប្រជែងខ្ពស់ រហូតដល់ម្ចាស់សណ្ឋាគារ និងផ្ទះសំណាក់មួយចំនួន ត្រូវជួលទីតាំងសម្រាប់បើកអាជីវកម្មផ្សេងទៅវិញ ដូចជា កាស៊ីណូ ជាដើម ។
បើតាមលោក ឌិន សុមេធារិទ្ធិ ប្រធានសមាគមសណ្ឋាគារកម្ពុជា បានមានប្រសាសន៍ថា មានមតិមួយចំនួនបានលើកឡើងពីកង្វះសណ្ឋាគារ និងផ្ទះសំណាក់សម្រាប់ស្នាក់នៅតាមបណ្ដាខេត្តតំបន់ទេសចរណ៍ ស្របពេលភ្ញៀវជនជាតិចិនមកកម្ពុជាកាន់តែច្រើន ប៉ុន្តែលោកមិនជឿថា មានរឿងដល់ថ្នាក់នេះ ។ លោកនិយាយថា ៖« នៅខេត្តព្រះសីហនុ តែងតែមានគេនិយាយថា ខ្វះកន្លែងស្នាក់នៅ ពេលទៅកម្សាន្តនៅតំបន់មាត់សមុទ្រមួយនេះ ប៉ុន្តែបើតាមភ្នាក់ងារយើងពីខេត្តនេះបានរាយការណ៍មកថា វាមិនដល់ថ្នាក់ហ្នឹងនោះទេ » ។
លោកបន្តថា ម្ចាស់សណ្ឋាគារមួយចំនួន ដោយសារតែភ្ញៀវទៅលេងខេត្តព្រះសីហនុមានរដូវកាលម្ដងម្កាល ទើបធ្វើឲ្យចំណូលរបស់ពួកគាត់មិនទៀងទាត់ ។ អីចឹង នៅពេលមានអ្នកគេជួលសណ្ឋាគារ ឬផ្ទះសំណាក់នោះ សម្រាប់ធ្វើជាកាស៊ីណូ ឬជាក្លិបកម្សាន្ត ម្ចាស់សណ្ឋាគារ និងផ្ទះសំណាក់ ក៏បានជួលឲ្យគេដោយទទួលបានចំណូលខ្ពស់ និងមិនពិបាកក្នុងការគ្រប់គ្រងដែរ ពោលគឺដល់ខែ ដឹងតែយកលុយពីអ្នកជួលបន្ត ។
ប្រធានសមាគមរូបនេះ បាននិយាយថាកាលពីប៉ុន្មានឆ្នាំមុន ម្ចាស់អាជីវកម្មសណ្ឋាគារ និងផ្ទះសំណាក់សប្បាយនឹងទទួលបានប្រាក់ចំណេញ ព្រោះកាលនោះ មិនសូវមានសណ្ឋាគារ និងផ្ទះសំណាក់ច្រើនទេ តែបច្ចុប្បន្ននេះវិញ កើនច្រើន បើទោះបីជាភ្ញៀវមកច្រើនក៏ពិតមែន។ លោកថា ៖« ជាក់ស្ដែង នៅសៀមរាប ដែលជាតំបន់ទាក់ទាញទេសចរច្រើនជាងគេ តែសណ្ឋាគាររបស់ខ្ញុំមិនសូវមានភ្ញៀវប៉ុន្មាននោះទេ ព្រោះសណ្ឋាគារនៅសៀមរាប មិនមែនមានតែខ្ញុំមួយទេ គឺមានសណ្ឋាគារកើតក្រោយៗច្រើន និងទំនើបជាងសណ្ឋាគារដែលសាងសង់មុនៗ អីចឹងហើយទើបសណ្ឋាគារមុនៗហាក់បាត់បង់ភ្ញៀវគួរសម » ។
លោកបន្ថែមទៀតថា បច្ចុប្បន្ន ក្នុងខេត្តសៀមរាប មានការលំបាកបន្តិចហើយសម្រាប់សណ្ឋាគារខ្នាតតូច ឬហៅថា Boutique ជាពិសេស ពីខែមេសាដល់ខែកញ្ញា ពីព្រោះក្នុងខេត្តសៀមរាប បច្ចុប្បន្ន ការផ្គត់ផ្គង់សណ្ឋាគារ និងផ្ទះសំណាក់មានច្រើនជាងតម្រូវការហើយ ។
បើតាមការបញ្ជាក់ពីអ្នកគ្រប់គ្រងសណ្ឋាគារមួយនៅសៀមរាប បានឲ្យដឹងថា ជាការពិតណាស់ បច្ចុប្បន្ននេះ ស្របពេលកំណើនសណ្ឋាគារកាន់តែច្រើន បានធ្វើឲ្យសណ្ឋាគារដែលសាងសង់ពីមុនៗមកនោះហាក់ធ្លាក់ភ្ញៀវបន្តិច លុះត្រាតែសណ្ឋាគារទើបសង់នោះអស់បន្ទប់សម្រាប់ទទួលភ្ញៀវ ទើបមានភ្ញៀវហៀរមកដល់សណ្ឋាគារចាស់ៗ ។ ទោះជាយ៉ាងណាក៏ដោយ ស្របពេលដែលភ្ញៀវបរទេសនៅតែបន្តមកលេងកម្ពុជា សណ្ឋាគារនៅតែទទួលបានភ្ញៀវជារឿយៗ តែបើសិនជារដូវភ្ញៀវទេសចរធ្លាក់ចុះ បរិមាណភ្ញៀវដែលមកស្នាក់នៅសណ្ឋាគារនានាក៏ធ្លាក់ដែរ ។
លោក លូ ម៉េង ប្រធានសហព័ន្ធទេសចរណ៍កម្ពុជា បានឲ្យដឹងផងដែរថា បច្ចុប្បន្ននេះ បើតាមតួលេខពីក្រសួងស្ថាប័នពាក់ព័ន្ធនានាក្នុងប្រទេសកម្ពុជា ដូចជា ក្រសួងពាណិជ្ជកម្ម និងក្រសួងទេសចរណ៍ ជាដើមនោះ សណ្ឋាគារទូទាំងប្រទេសមានប្រមាណ៥០០សណ្ឋាគារ និងផ្ទះសំណាក់ប្រមាណ១.០០០ផ្ទះសំណាក់ផងដែរ ដើម្បីត្រៀមទុកទទួលភ្ញៀវជាតិ និងអន្តរជាតិក្នុងការសម្រាកលំហែ ។
លោកបន្តថា ដោយសារតែកំណើនវិស័យទេសចរណ៍ជាបន្តបន្ទាប់នេះដែរ បានធ្វើឲ្យកម្ពុជានៅខ្វះខាតធនធានជំនាញក្នុងវិស័យទេសចរណ៍នេះច្រើន ។ ជាក់ស្ដែង បច្ចុប្បន្ន ក្នុងវិស័យនេះត្រូវការធនធានប្រមាណ១ម៉ឺននាក់ថែមទៀត ដើម្បីគ្រប់គ្រងនិងបម្រើនៅតាមសណ្ឋាគារ និងភោជនីយដ្ឋាន ជាដើម ។
លោកបញ្ជាក់ថា ដោយសារតែសេវាកម្មក្នុងវិស័យទេសចរណ៍បានវិនិយោគជាបន្តបន្ទាប់ បច្ចុប្បន្ននេះ ភ្ញៀវដែលមកកម្សាន្តនៅកម្ពុជាមានជម្រើសច្រើនសម្រាប់ឲ្យជ្រើសរើស ។ ជាក់ស្ដែង នៅភ្នំពេញមានភោជនីយដ្ឋាន និងសណ្ឋាគារច្រើនសម្រាប់ភ្ញៀវ តាំងពីកម្រិតមធ្យមដល់កម្រិតខ្ពស់ ៕
ចែករំលែកព័តមាននេះ