ខេត្តព្រះសីហនុ ៖ កម្លាំងសមត្ថកិច្ចនគរបាលក្រុងព្រះសីហនុកាលពីយប់ថ្ងៃទី១០ សីហា បានធ្វើការឃាត់ខ្លួនជនជាតិចិន៣នាក់ពាក់ព័ន្ធករណីបើកបរបង្កគ្រោះចរាចរបណ្តាលឲ្យស្លាប់ និងរងរបួសអ្នកដទៃ ដែលបានកើតឡើងចំនួន៣ករណី ។ ករណីទី១-កម្លាំងសមត្ថកិច្ចការិយាល័យជំនាញនគរបាលចរាចរណ៍ផ្លូវគោកបានឃាត់ខ្លួន…
ខេត្តព្រះសីហនុ ៖ កម្លាំងសមត្ថកិច្ចនគរបាលក្រុងព្រះសីហនុកាលពីយប់ថ្ងៃទី១០ សីហា បានធ្វើការឃាត់ខ្លួនជនជាតិចិន៣នាក់ពាក់ព័ន្ធករណីបើកបរបង្កគ្រោះចរាចរបណ្តាលឲ្យស្លាប់ និងរងរបួសអ្នកដទៃ ដែលបានកើតឡើងចំនួន៣ករណី ។
ករណីទី១-កម្លាំងសមត្ថកិច្ចការិយាល័យជំនាញនគរបាលចរាចរណ៍ផ្លូវគោកបានឃាត់ខ្លួន និងបញ្ជូនអ្នកបើកបររថយន្ត ជនជាតិចិនម្នាក់ឈ្មោះ WANG HUAN ភេទប្រុស អាយុ៣៨ឆ្នាំ កាន់លិខិតឆ្លងដែនលេខ E89930490 មុខរបរបុគ្គលិកកាសីុណូ ស្នាក់នៅភូមិ១ សង្កាត់២ ក្រុងព្រះសីហនុ ទៅកាន់សាលាដំបូងខេត្តព្រះសីហនុ ដើម្បីចាត់ចែងតាមនីតិវិធីច្បាប់ ។
ដោយសារជនជាតិចិនរូបនោះបានជាប់ពាក់ព័ន្ធនឹងករណីគ្រោះថ្នាក់ចរាចរណ៍ កាលពីថ្ងៃទី០៨ ខែសីហា ឆ្នាំ២០១៨ ត្រង់ចំណុចកាស៊ីណូ ហ្គោលឌែន ស្ថិតនៅក្នុងភូមិ៤ សង្កាត់លេខ៤ ក្រុង-ខេត្តព្រះសីហនុ ដោយបើករថយន្តថយក្រោយបុកទ្វារកញ្ចក់ និងបុកអ្នកថ្មើរជើងឈ្មោះ ហ៊ុន សុផល ភេទប្រុស អាយុ៥១ឆ្នាំ បណ្ដាលឲ្យរងរបួសជើងធ្ងន់ធ្ងរ ។
ករណីទី២-កាលវេលាម៉ោង៧និង១០នាទីយប់ថ្ងៃទី៩ ខែសីហា ឆ្នាំ២០១៨ នៅលើផ្លូវជាតិលេខ៤ ចន្លោះគីឡូម៉ែត្រ១៤៨-១៤៩ ស្ថិតនៅក្នុងភូមិគីរីវ័ន ឃុំស្ទឹងឆាយ ស្រុកកំពង់សិលា ខេត្តព្រះសីហនុ មានករណីគ្រោះថ្នាក់ចរាចរណ៍មួយកើតឡើង បង្កដោយរថយន្ត១គ្រឿងម៉ាកHIGHLANDER ពណ៌ទឹកប្រាក់ ពាក់ផ្លាកលេខ ភ្នំពេញ 2P-2033 បើកបរដោយឈ្មោះ FANG GUANG FENG ភេទប្រុស អាយុ៤៣ឆ្នាំ ជាជនជាតិចិន កាន់លិខិតឆ្លងដែនលេខ EC3926985 មុខរបរលក់ដូរ ស្នាក់នៅខណ្ឌសែនសុខ រាជធានីភ្នំពេញ ។
ជនបង្កបានបើកបរក្នុងទិសដៅពីភ្នំពេញ ឆ្ពោះទៅក្រុងព្រះសីហនុ លុះដល់ចំណុចខាងលើក៏បានបុកនឹងម៉ូតូ១គ្រឿងម៉ាក HONDA C125 ពណ៌ខ្មៅ ពាក់ផ្លាកលេខ តាកែវ 1F-1868 បណ្តាលឲ្យស្លាប់ជនរងគ្រោះឈ្មោះ ទិត សុជា ភេទប្រុស អាយុ៣១ឆ្នាំ មុខរបរលក់តាប៉ែ មានទីលំនៅភូមិត្រពាំង ឃុំស្រែអំបិល ស្រុកស្រែអំបិល ខេត្តកោះកុង ។
ភ្លាមនោះអ្នកបើកបរម៉ូតូបានខ្ទាតទៅលើផ្លូវ ហើយក៏មានរថយន្ត១គ្រឿងទៀតម៉ាក TOYOTA ពណ៌ស ពាក់ផ្លាកលេខ ភ្នំពេញ 2AB-3073 អ្នកបើកបរមិនស្គាល់អត្តសញ្ញាណ បើកមកពីក្រោយបានកិនពីលើអ្នកជិះម៉ូតូបណ្តាលឲ្យស្លាប់តែម្តង ។ រីឯអ្នកបើកបររថយន្ត TOYOTA រត់គេចខ្លួនបាត់ស្រមោល ក្រោយពេលកើតហេតុ ។
ចំណែករថយន្តម៉ាក HIGHLANDER រត់គេច រហូតដល់ចំណុចមុខរោចក្រតំបន់សេដ្ឋកិច្ចពិសេស ស្ថិតនៅក្នុងភូមិបិតត្រាង ឃុំបិតត្រាង ស្រុកព្រៃនប់ ខេត្តព្រះសីហនុ ត្រូវបានកម្លាំងប៉ុស្តិ៍រដ្ឋបាលឃុំបិតត្រាង ស្ទាក់ចាប់បានទាំងរថយន្ត និងអ្នកបើកបរ ។
អ្នកបើកបររថយន្តឈ្មោះ FANG GUANG FENG ត្រូវបានកម្លាំងសមត្ថច្ចជំនាញនាំខ្លួនទៅកាន់ការិយាល័យនគរបាលចរាចរណ៍ផ្លូវគោក ដើម្បីកសាងសំណុំរឿងបញ្ជូនទៅសាលាដំបូងខេត្តតាមនីតិវិធី ។
ករណីទី៣-កាលពីវេលាម៉ោង១និង១០រំលងអធ្រាត្រឈានចូល ថ្ងៃទី១០ ខែសីហា ឆ្នាំ២០១៨ នៅលើផ្លូវឯករាជ្យ ត្រង់ចំណុចស្តុប៣៣៣ ស្ថិតក្នុងភូមិ៤ សង្កាត់លេខ៤ ក្រុង-ខេត្តព្រះសីហនុ មានករណីគ្រោះថ្នាក់ចរាចរណ៍មួយកើតឡើងបង្ក ដោយរថយន្ត១គ្រឿងម៉ាក LEXUS RX-300 ពណ៌ស ពាក់ផ្លាកលេខ ព្រះសីហនុ 2B-3687 បើកបរដោយឈ្មោះ CHENG GIMAN ភេទប្រុស អាយុ៣៥ឆ្នាំ ជនជាតិចិន កាន់លិខិតឆ្លងដែនលេខ E00498881 (គ្មានប័ណ្ណបើកបរ និង មិនសហការជាមួយសមត្ថកិច្ច ក្នុងការពិនិត្យជាតិអាកុល ) មុខរបរលក់ដូរ ស្នាក់នៅភូមិ២ សង្កាត់លេខ២ ក្រុង-ខេត្តព្រះសីហនុ មានទិសដៅពីលិចឆ្កោះទៅកើត ។
លុះមកដល់ចំណុចកើតហេតុ បានបុកពីក្រោយរថយន្ត១គ្រឿងម៉ាក PORSCHE ពណ៌ស ពាក់ផ្លាកលេខ ភ្នំពេញ 2AK-3336 អ្នកបើកបរដោយឈ្មោះ PERERA WPATABENDEGE S.N ភេទប្រុស អាយុ៣៥ឆ្នាំ ជនជាតិស្រីលង្កា សញ្ជាតិស្រីលង្កា កាន់លិខិតឆ្លងដែនលេខ N6652131 មុខរបរអគ្គនាយកក្រុមហ៊ុន ស្នាក់នៅភូមិ១ សង្កាត់វាលវង់ ខណ្ឌ៧មករា រាជធានីភ្នំពេញ ដែលបើកបរមានទិសដៅស្របគ្នា ។
ករណីគ្រោះថ្នាក់នេះមិនបណ្តាលឲ្យមានមនុស្សរងរបួសទេ គ្រាន់តែខូចខាតរថយន្តទាំង២គ្រឿងក្នុងកម្រិតធ្ងន់ ហើយត្រូវបានសមត្ថកិច្ចនាំយកទៅរក្សាទុកនៅការិយាល័យចរាចរណ៍ផ្លូវគោក ដើម្បីធ្វើការដោះស្រាយ ដោយសារអ្នកបើកបរបង្កហេតុជាជនជាតិចិនដូចមានឈ្មោះខាងលើ មិនព្រមសារភាព និង បានប្រាប់សមត្ថកិច្ចថា ខ្លួនគេមិនមែនជាអ្នកបើកបរទេ អ្នកបើកបរគឺជានារីខ្មែរម្នាក់ ដែលរូបគេស្គាល់នៅហាងផឹកសីុ (មិនស្គាល់ឈ្មោះ) ជាអ្នកជូនរូបគេទៅរកកន្លែងស្នាក់ ។
ក្រោយពីបានធ្វើការស្រាវជ្រាវ និងមានសាក្សីបញ្ជាក់ កម្លាំងជំនាញបានសន្និដ្ឋានថា អ្នកបើកបររថយន្តម៉ាក LEXUS RX-300 បង្កគ្រោះថ្នាក់ចរាចរណ៍ ជាជនជាតិចិនឈ្មោះ CHENG GIMAN នេះពិតប្រាកដមែន ដូច្នោះកម្លាំងសមត្ថកិច្ចជំនាញបាន និងកំពុងរៀបចំសំណុំរឿង បញ្ចូនទៅកាន់សាលាដំបូងខេត្តព្រះសីហនុ ដើម្បីចាត់ការតាមនីតិវិធី ។
អ្នកតាមដានសភាពការណ៍បានពិនិត្យឃើញថា ជនជាតិចិនមួយចំនួនរស់នៅលើទឹកដីក្រុងព្រះសីហនុរាល់ថ្ងៃកំពុងបង្កើតហានិភ័យបញ្ហាគ្រោះចរាចរណ៍ច្រើន ៕
ចែករំលែកព័តមាននេះ