សហរដ្ឋអាមេរិក ៖ រដ្ឋការអាមេរិកកាលពីថ្ងៃទី៩ សីហា បានប្រកាសពីការបង្កើត កងកម្លាំងអវកាស ជាសាខាទី៦ នៃកងទ័ពតាមបំណងប្រធានាធិបតីលោកដូណាល់ ត្រាំ ដែលក៏ចង់ឲ្យសហរដ្ឋអាមេរិកគ្របដណ្ដប់ទីអវកាសស៊ីដាច់គេ។
អនុប្រធានាធិបតីអាមេរិកលោក MIKE PENCE ក្នុងសង្កថាមួយនៅមុខពួកយោធានាមន្ទីរប៉ង់តាហ្គោនថ្លែងថា ពេលវេលាមកដល់ហើយដើម្បីសរសេរទំព័រប្រវត្តិសាស្ត្រថ្មី្ននៃកងទ័ពរបស់យើង ក្នុងការរៀបចំខ្លួនសម្រាប់ទីលានប្រយុទ្ធនាពេលខាងមុខ។ ពេលវេលាមកដល់ហើយសម្រាប់បង្កើតកងកម្លាំងអវកាសរបស់សហរដ្ឋអាមេរិក។
ចំណែកលោកត្រាំវិញបានសរសេរតាម TWITTER ថា កងកម្លាំងអវកាសត្រូវបង្កើតឲ្យបាន។ ការរៀបចំនានាកំពុងតែធ្វើលើកងកម្លាំងអវកាសនេះដែលជាសាខាទី៦របស់កងទ័ព អមកងទ័ពជើងគោក កងទ័ពជើងអាកាស កងម៉ារីន កងទាហានម៉ារីននិងកងឆ្មាំឆ្នេរសមុទ្រ។
លោកត្រាំធ្លាប់ថ្លែងថា ដើម្បីការពារអាមេរិក វត្តមានធម្មតានៅទីអវកាសពុំគ្រប់គ្រាន់ឡើយ យើងត្រូវគ្រប់គ្រងទីអវកាស។ កងយោធាលើពិភពលោកពឹងផ្អែកកាន់តែខ្លាំងលើបណ្ដាឧបករណ៍នៅទីអវកាសសម្រាប់ប្រតិបត្តិការរបស់ពួកគេ ហើយការពារសន្តិសុខរបស់បណ្ដាផ្កាយរណប ដែលកាន់តែមានសារសំខាន់ខ្លាំងឡើង។
លោក PENCE បន្តថា ទីអវកាសមានការផ្លាស់ប្ដូរចាប់តាំងពីមួយជំនាន់មនុស្សមកហើយ ។ បច្ចុប្បន្នប្រជាជាតិឯទៀតៗស្វះស្វែងរាំងខ្ទប់បណ្ដាប្រព័ន្ធរបស់យើងមានមូលដ្ឋានក្នុងទីអវកាស ហើយប្រឆាំងខ្លាំងជាងពេលណាៗទាំងអស់ដល់ឧត្ដមភាពរបស់អាមេរិក។
លោកបានលើកពីការបាញ់មីស៊ីលមួយរបស់ចិនកាលពីឆ្នាំ២០០៧ ដែលពេលសាកល្បងអាចកម្ទេចផ្កាយរណបមួយក្នុងចំណោមផ្កាយរណបរបស់គេ។ នោះបង្ហាញពីការបង្កហេតុកាន់តែខ្លាំងរបស់ចិនក្នុងការធ្វើយោធូបនីយកម្មនៅទីអវកាស។ លោកក៏លើកដែរពីបណ្ដាគម្រោងអាវុធឡាស័រ និងមីស៊ីលរបស់រុស្ស៊ីសម្រាប់កម្ទេចផ្កាយរណបអាមេរិក៕
ចែករំលែកព័តមាននេះ