ខេត្តស្វាយរៀង ៖ កម្មករ-កម្មការិនីរោងចក្រ សេង យ៉ាវ ចំនួន១៤០០នាក់ផ្ទុះធ្វើកូដកម្មតវ៉ារឿងថៅកែចិនកាត់លុយថ្ងៃទៅបោះឆ្នោត២ថ្ងៃ បានក្លាយទៅជាបាតុកម្មទាមទារហូត១៥ចំណុចចាប់ពីថ្ងៃទី៧ រហូតដល់ថ្ងៃទី១០ ខែសីហា ឆ្នាំ២០១៨…
ខេត្តស្វាយរៀង ៖ កម្មករ-កម្មការិនីរោងចក្រ សេង យ៉ាវ ចំនួន១៤០០នាក់ផ្ទុះធ្វើកូដកម្មតវ៉ារឿងថៅកែចិនកាត់លុយថ្ងៃទៅបោះឆ្នោត២ថ្ងៃ បានក្លាយទៅជាបាតុកម្មទាមទារហូត១៥ចំណុចចាប់ពីថ្ងៃទី៧ រហូតដល់ថ្ងៃទី១០ ខែសីហា ឆ្នាំ២០១៨ នេះត្រូវបានអាជ្ញាធរខេត្ត និងមន្ទីរការងារ និងបណ្តុះបណ្តាលវិជ្ជាជីវៈខេត្តធ្វើការសម្របសម្រួលដោះស្រាយបានបញ្ចប់ហើយនៅវេលាម៉ោង៩និង៥០នាទីព្រឹក ថ្ងៃទី១០ ខែសីហា ឆ្នាំ២០១៨ ហើយកម្មករ-កម្មការិនីក៏បានចូលធ្វើការធម្មតាវិញហើយ ។
កិច្ចប្រជុំដោះស្រាយនេះក្រោមអធិបតីភាពលោក តូច ប៉ូលីវ៉ា អភិបាលរង នៃគណៈអភិបាលខេត្តស្វាយរៀង, លោក ហាស់ ប៊ុនធី ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត, លោកស្រី សេង យ៉ាវ តំណាងក្រុមហ៊ុន សេង យ៉ាវ តំណាងកម្មករនិយោជិត លោកស្នងការរង មេបញ្ជាការរងកងរាជអាវុធហត្ថខេត្ត សហពន្ធ័សហជីពកម្មករខ្មែរជួយខ្មែរ និងសហព័ន្ធសិទ្ធិកម្មករខ្មែរ ។
បើតាមលោក ហាស់ ប៊ុនធី ប្រធានមន្ទីរការងារបណ្តុះបណ្តាលវិជ្ជាជីវៈខេត្តបានឲ្យដឹងថា រោងចក្រ សេង យ៉ាវ អេនធើប្រាយខូអិលឌីធី មានកម្មករនិយោជិតសរុប១៤១៩នាក់ ស្រី៥០៧នាក់ ។ លោក ហាស់ ប៊ុនធី បន្តទៀតថា កម្មករនិយោជិតធ្វើកូដកម្មតវ៉ាទាមទាលក្ខខណ្ឌ១៥ចំណុចដោយមានការសម្របសម្រួលពីលោក តូច ប៉ូលីវ៉ា អភិបាលរងខេត្ត នាព្រឹកថ្ងៃទី១០ ខខែសីហា ឆ្នាំ២០១៨ នេះលទ្ធផលនៃការផ្សះផ្សាគឺភាគីទាំងពីបានព្រមព្រៀងគ្នាទាំង១៥ចំណុចហើយកម្មក និយោជិត បានចូលធ្វើការវិញតាមធម្មតា ។
សូមបញ្ជាក់ ការទាមទារបស់កម្មករទាំង១៥ចំណុចនោះមានទី១-ស្នើសុំក្រុមហ៊ុនកុំបញ្ឈប់កម្មករដោយគ្មានមូលហេតុច្បាស់លាស់, ទី២-សូមកុំឲ្យក្រុមហ៊ុនធ្វើខុសនឹងគោលការច្បាប់កំណត់, ទី៣-សុំឲ្យក្រុមហ៊ុនរៀបចំបន្ទប់ទឹកឲ្យមានអនាម័យ មានទឹកប្រើប្រាស់គ្រប់គ្រាន់ និងមានសាប៊ូលាងដៃផង, ទី៤-ស្នើសុំឲ្យក្រុមហ៊ុនមានថ្នាំពេទ្យគ្រប់គ្រាន់ និងគ្រូពេទ្យប្រចាំការគ្រប់ម៉ោងធ្វើការ, ទី៥-ការបន្ថែមម៉ោងឈលើគោលការណ៍ស្ម័គ្រចិត្ត និងគ្មានការបង្ខិតបង្ខំផ្អែកលើគោលការច្បាប់ស្តីពីការងារ, ទី៦-សូមក្រុមហ៊ុនបន្ថយចំនួនសម្ភារផលិត (ឲ្យនៅដដែល), ទី៧-សូមឲ្យក្រុមហ៊ុនផ្តល់លុយជំនាញបន្ថែមឲ្យកម្មករ, ទី៨-នៅពេលកម្មករសុំច្បាប់សុំឲ្យក្រុមហ៊ុនផ្តល់ភាពងាយស្រួលជូនកម្មករ, ទី៩-សូមកុំឲ្យក្រុមហ៊ុនកាត់លុយរបស់កម្មករថ្ងៃទៅបោះឆ្នោតថ្ងៃទី២៨ រហូតដល់ ថ្ងៃ៣០ ខែកក្កដា ឆ្នាំ២០១៨ តាមសេចក្តីប្រកាសរបស់ក្រសួងការងារ ។
ទី១០-នៅពេលកម្មករ-កម្មការិនីធ្វើការចាប់ពី២ខែឡើងទៅ ស្នើសុំឲ្យក្រុមហ៊ុនបញ្ចូលជាកម្មករពេញសិទ្ធិ, ទី១១-កម្មការិនីមានផ្ទៃពោះដែលមានលិខិតពេទ្យបានទៅពិនិត្យផ្ទៃពោះក្នុងមួយខែបាន១ថ្ងៃ ហើយរក្សារប្រាក់ឈ្នួល និងអត្ថប្រយោជន៍ផ្សេងៗជូនគាត់, ទី១២-ស្នើសុំឲ្យក្រុមហ៊ុនផ្តល់ប្រាក់ឈ្នួលនៅថ្ងៃកម្មវិធីសម្តេចអគ្គមហាសេនាបតីតេជោ ហ៊ុន សែន នៅថ្ងៃ២៩ ខែឧសភា ឆ្នាំ២០១៨ (កម្មករពេញសិទ្ធិប្រើបំណាច់ឆ្នាំ កម្មករបណ្តែតដាក់ច្បាប់ធុរៈ), ទី១៣-សូមឲ្យក្រុមហ៊ុនអនុញ្ញាត្តិឲ្យកម្មករបានប្រើប្រាស់ការឈប់សម្រាកប្រចាំឆ្នាំនៅពេលមានធុរៈផ្សេងៗ, ទី១៤-ស្នើសុំឲ្យក្រុមហ៊ុនធ្វើកិច្ចសន្យាជូនកម្មករ និយោជិត ពេញសិទ្ធិរយៈពេល៦ខែ និងទី១៥-នៅក្នុងពេលធ្វើកូដកម្ម សូមកុំឲ្យក្រុមហ៊ុនកាត់ប្រាក់ឈ្នួល និងអត្ថប្រយោជន៍ផ្សេងៗរបស់កម្មករ និងកុំឲ្យមានការគុំគួន និងបញ្ឈប់កម្មករណាម្នាក់ ។
លទ្ធផលភាគីក្រុមហ៊ុនបានយល់ព្រមតាមការស្នើសុំរបស់កម្មករទាំង១៥ចំណុច ក៏ប៉ុន្តែក្រុមហ៊ុនបានសុំកម្មករកុំឲ្យមានការកូដកម្មបន្តទៀត បើមានការធ្វើកូដកម្មក្រុមហ៊ុនមិនផ្តល់ប្រាក់ឈ្នួល និងអត្ថប្រយោជន៍ផ្សេងៗទេ ៕
ចែករំលែកព័តមាននេះ